2 تِمُوتَاوُس 2
2
خدّام الربّ مِثِل عسْكري
1وَ إِنْتَ، يَا وِلَيْدِي، أَبْقَى ثَابِتْ فِي النِّعْمَةْ الْعِنْدِنَا فِي الْمَسِيحْ عِيسَى. 2وَ الْكَلَامْ الْإِنْتَ سِمِعْتَهْ مِنْ خَشْمِي قِدَّامْ شُهُودْ كَتِيرِينْ، كَلِّفْ بَيَّهْ نَاسْ أَمِينِينْ الْيَقْدَرَوْا يِعَلُّمُوا بَيَّهْ نَاسْ آخَرِينْ بَتَّانْ.
3أَقْبَلْ التَّعَبْ مِثِلْ عَسْكَرِي عَدِيلْ هَنَا الْمَسِيحْ عِيسَى. 4الْعَسْكَرِي الْقَاعِدْ يِسَوِّي خِدِمْتَهْ مَا لَمَّاهْ بِخِدْمَةْ النَّاسْ الْمَا عَسْكَرْ. هُو يُخُطّ بَالَهْ لِكَلَامْ كَبِيرَهْ الْيَامُرَهْ وَ يِدَوْر رِضَى مِنَّهْ هُو بَسْ. 5وَ بِمَثَلْ تَانِي، كَنْ نَادُمْ يَجْرِي فِي مُسَابَقَةْ، مَا يُقُولُوا هُو سَبَقْ إِلَّا كَنْ جَرَى حَسَبْ الشُّرُوطْ. 6وَ بَتَّانْ، الْحَرَّاتِي التِّعِبْ فِي الزَّرَعْ، وَاجِبْ هُو بَسْ أَوَّلْ نَادُمْ الْيَلْقَى الْغَلَّةْ. 7فَكِّرْ فِي الْكَلَامْ الْقُلْتَهْ لَيْك دَا وَ رَبِّنَا يَنْطِيكْ عَقُلْ أَشَانْ تَفْهَمْ كُلِّ شَيّءْ.
8فَكِّرْ فِي عِيسَى الْمَسِيحْ. هُو مِنْ ذُرِّيَّةْ دَاوُدْ وَ بَعَثْ مِنْ أُسْط الْمَيْتِينْ. وَ دِي بَسْ الْبِشَارَةْ الْأَنَا بَلَّغْتَهَا لِلنَّاسْ. 9وَ بِسَبَبْ الْبِشَارَةْ دِي، أَنَا قَاعِدْ فِي التَّعَبْ مَرْبُوطْ بِجَنَازِيرْ مِثِلْ أَنَا مُجْرِمْ. لَاكِنْ كَلَامْ اللّٰهْ أَبَداً مَا يَقْدَرَوْا يَرْبُطُوهْ. 10وَ بِمِثِلْ دَا، نَحْمَلْ أَيِّ تَعَبْ فِي شَانْ النَّاسْ الْاللّٰهْ عَزَلَاهُمْ وَ نِجَاهِدْ أَشَانْ يَلْقَوْا مَعَايِ النَّجَاةْ بِالْمَسِيحْ عِيسَى وَ يَدْخُلُوا فِي الْمَجْد الْأَبَدِي.
11الْكَلَامْ دَا حَقّ.
كَنْ مُتْنَا مَعَايَهْ،
نَحْيَوْا مَعَايَهْ.
12وَ كَنْ نَحْمَلَوْا التَّعَبْ فِي شَانَهْ،
نَمُلْكُوا مَعَايَهْ.
وَ كَنْ نَنْكُرُوهْ،
هُو كُلَ يَنْكُرْنَا.
13وَ كَنْ مَا عِنْدِنَا أَمَانْ،
هُو يَقْعُدْ دَايْماً أَمِينْ
أَشَانْ هُو مَا يَقْدَرْ يَنْكُرْ نَفْسَهْ.
خدّام الثابِت
14ذَكِّرْهُمْ لِلْأَخْوَانْ بِالْكَلَامْ دَا وَ حَذِّرْهُمْ قِدَّامْ اللّٰهْ أَشَانْ مَا يِلْغَالَطَوْا فِي تَفْسِيرْ الْكَلِمَاتْ. كَلَامْ مِثِلْ دَا مَا عِنْدَهْ فَايْدَةْ وَ يِسَبِّبْ الْهَلَاكْ لِلنَّاسْ الْيَسْمَعَوْه.
15أَعَصِرْ قَلْبَكْ أَشَانْ تَبْقَى نَادُمْ الْاللّٰهْ يَرْضَى بَيَّهْ. أَبْقَى مِثِلْ خَدَّامْ الْخِدِمْتَهْ مَا تِسَبِّبْ لَيَّهْ عَيْب. فَسِّرْ كَلَامْ الْحَقّ بِتَفْسِيرْ عَدِيلْ. 16وَ أَنْقَرِعْ مِنْ الْكَلَامْ الشَّيْن الْمَا عِنْدَهْ فَايْدَةْ. النَّاسْ الْيِتَابُعُوا الْكَلَامْ دَا يِزِيدْهُمْ كُفُرْ بِزِيَادَةْ. 17وَ كَلَامْهُمْ يِشَتِّتْ بَيْن النَّاسْ مِثِلْ مَرَضْ السَّيْرَطَانْ فِي الْجِسِمْ. وَ مِنْهُمْ هَمَانِي وَ فِلِيتُسْ. 18هُمَّنْ مَرَقَوْا مِنْ دَرِبْ الْحَقّ. وَ هَسَّعْ قَاعِدِينْ يُقُولُوا كَدَرْ بُعَاثْ الْمُؤمِنِينْ تَمَّ خَلَاصْ. وَ قَاعِدِينْ يِتَلُّفُوا إِيمَانْ هَنَا نَاسْ وَاحِدِينْ.
19لَاكِنْ الْأَسَاسْ الْقَوِي الْاللّٰهْ خَطَّاهْ قَاعِدْ ثَابِتْ وَ هُو خَطَّ فَوْقَهْ خِتِمْ وَ دَا الْكَلَامْ الْمَكْتُوبْ فِي الْكِتَابْ الْبُقُولْ: <اللّٰهْ يَعَرِفْ نَاسَهْ>#2:19 الكلام دا تلقوه في عَدد 16:5. وَ بَتَّانْ: <وَاجِبْ أَيِّ نَادُمْ الْيِكَرِّمْ أُسُمْ اللّٰهْ يِخَلِّي مِنَّهْ الْفَسَالَةْ مَرَّةْ وَاحِدْ.>
20فِي بَيْت هَنَا نَادُمْ غَنِيْ، فِي مَوَاعِينْ غَالِيِّينْ مِنْ الدَّهَبْ وَ الْفُضَّةْ وَ مَوَاعِينْ رَخِيصِينْ مِنْ الْحَطَبْ وَ الطِّينَةْ. وَ الْوَاحِدِينْ يَخْدُمُوا بَيْهُمْ عَمَلْ نَضِيفْ وَ الْوَاحِدِينْ يَخْدُمُوا بَيْهُمْ عَمَلْ وَسْخَانْ. 21وَ بِمِثِلْ دَا، كَنْ نَادُمْ يِصَفِّي نَفْسَهْ مِنْ كُلَّ الْوَسَاخَةْ، هُو يَبْقَى مِثِلْ مَاعُونْ هَنَا عَمَلْ نَضِيفْ وَ مَاعُونْ خَاصّ الْعِنْدَهْ فَايْدَةْ لِسِيدَهْ. هُو يَبْقَى جَاهِزْ أَشَانْ يِسَوِّي أَيِّ عَمَلْ هَنَا خَيْر.
خدّام الربّ ما واجِب يهارِج
22أَنْقَرِعْ مِنْ شَهْوَاتْ هَنَا الصُّبَى. خُطّ بَالَكْ أَشَانْ تَبْقَى نَادُمْ صَالِحْ وَ تَبْقَى قَوِي فِي الْإِيمَانْ وَ الْمَحَبَّةْ وَ السَّلَامْ مِثِلْ كُلَّ النَّاسْ الْيَدْعُوا الرَّبّ بِقَلِبْ طَاهِرْ.
23وَ أَنْقَرِعْ مَرَّةْ وَاحِدْ مِنْ الْمُنَاقَشَاتْ الْبَاطْلِينْ الْمَا عِنْدُهُمْ فَايْدَةْ. إِنْتَ تَعَرِفْ كَدَرْ الْمُنَاقَشَاتْ الْمِثِلْ دَوْل يِسَبُّبُوا الْهُرَاجْ بَسْ. 24وَ خَدَّامْ الرَّبّ مَا وَاجِبْ يِهَارِجْ. وَ لَاكِنْ وَاجِبْ يِسَوِّي الزَّيْن لِكُلَّ النَّاسْ وَ يَعَرِفْ كِكَّيْف يِعَلِّمْهُمْ وَ يَصْبُرْ لَيْهُمْ. 25بِنَفَسْ بَارِدْ، هُو يِوَصِّفْ الْحَقّ لِلنَّاسْ الْيِخَالُفُوهْ وَ هُو يِدَوْر كَدَرْ اللّٰهْ يَهْدِيهُمْ لِلتَّوْبَةْ وَ يَعَرْفُوا الْحَقّ. 26وَ خَلَاصْ، يَمُرْقُوا مِنْ شَرَكْ إِبْلِيسْ الْأَوَّلْ كَرَبَاهُمْ أَشَانْ يِسَوُّوا لَيَّهْ الشَّيّءْ الْهُو يِدَوْرَهْ.
Currently Selected:
2 تِمُوتَاوُس 2: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
