1 بُطْرُس 1
1
1جَوَابْ مِنِّي أَنَا بُطْرُسْ رَسُولْ عِيسَى الْمَسِيحْ. أَنَا نَكْتِبْ لَيْكُو إِنْتُو النَّاسْ الْاللّٰهْ عَزَلَاكُو لِتَبْقَوْا شَعَبَهْ. إِنْتُو الْعَايْشِينْ أَجَانِبْ وَ مُشَتَّتِينْ فِي بُلْدَانْ بُنْطُسْ وَ غَلَاطِيَةْ وَ كَبَّدُوكِيَّةْ وَ آسِيَا وَ بِثِنْيَةْ. 2اللّٰهْ أَبُوكُو عَزَلَاكُو حَسَبْ النِّظَامْ الْعِنْدَهْ مِنْ زَمَانْ. وَ إِنْتُو بِقِيتُوا النَّاسْ الْخَاصِّيْن لَيَّهْ بِقُدْرَةْ الرُّوحْ الْقُدُّوسْ. وَ دَا، لِتِتَابُعُوا عِيسَى الْمَسِيحْ وَ تَبْقَوْا طَاهِرِينْ بِدَمَّهْ الدَّفَّقْ فِي شَانْكُو.
عَلَيْكُمْ السَّلَامْ وَ الرَّحْمَةْ بِكَتَرَةْ.
رحْمة اللّه للمُؤمِنين
3خَلِّي نَشْكُرُوا اللّٰهْ أَبُو رَبِّنَا عِيسَى الْمَسِيحْ! هُو رَحَمَانَا بِرَحْمَةْ كَبِيرَةْ الْبَيْهَا بِقِينَا مَوْلُودِينْ مِنْ جَدِيدْ بِسَبَبْ بُعَاثْ عِيسَى الْمَسِيحْ مِنْ أُسْط الْمَيْتِينْ. وَ بَيْدَا، عِنْدِنَا عَشَمْ مُؤَكَّدْ 4وَ وَرَثَتْنَا أَبَداً مَا تِدَّمَّرْ وَ لَا تَتْلَفْ وَ لَا تِوَدِّرْ. وَ اللّٰهْ دَمَّهَا لَيْكُو فِي السَّمَاوَاتْ. 5وَ قُدْرَةْ اللّٰهْ تَحْفَضْكُو بِإِيمَانْكُو أَشَانْ تَلْقَوْا النَّجَاةْ الْاللّٰهْ جَهَّزَاهَا وَ يِبَيِّنْهَا فِي الْيَوْم الْأَخِيرْ.
6وَ أَشَانْ دَا، تَفْرَحَوْا فَرْحَةْ كَبِيرَةْ، حَتَّى كَانْ إِنْتُو قَاعِدِينْ تَتْعَبَوْا لِمُدَّةْ قِصَيْرَةْ كُلَ وَ تَحْزَنَوْا بِسَبَبْ الصُّعُوبَاتْ الشِّقْ شِقْ. 7نَعَرْفُوا كَدَرْ الدَّهَبْ الْبَعَدَيْن يِدَّمَّرْ، يَكْشُفُوهْ بِالنَّارْ. وَ مِثِلْ دَا، إِيمَانْكُو الْقِيمْتَهْ زِيَادَةْ مِنْ الدَّهَبْ، كُلَ يِجَرُّبُوهْ أَشَانْ ثَبَاتَهْ يِنْشَافْ. وَ بَيْدَا، تَلْقَوْا شُكُرْ وَ مَجْد وَ شَرَفْ فِي الْيَوْم الْعِيسَى الْمَسِيحْ يِبِينْ فَوْقَهْ.
8وَ الْمَسِيحْ دَا، إِنْتُو تِحِبُّوهْ حَتَّى كَانْ مَا شِفْتُوهْ كُلَ. وَ كَنْ إِنْتُو مَا قَاعِدِينْ تِشِيفُوهْ كُلَ، إِنْتُو مُؤمِنِينْ بَيَّهْ وَ تَفْرَحَوْا بَيَّهْ بِفَرْحَةْ مَجِيدَةْ وَ كَبِيرَةْ الْأَبَداً مَا تِلْوَصَّفْ. 9أَشَانْ إِنْتُو قَاعِدِينْ تَلْقَوْا نَتِيجَةْ إِيمَانْكُو وَ هِي نَجَاتْكُو.
10وَ الْأَنْبِيَاء الْأَتْنَبَّأَوْا بِالنِّعْمَةْ الْإِنْتُو تَلْقَوْهَا، هُمَّنْ دَوَّرَوْا يَفْهَمَوْا النَّجَاةْ دِي وَ فِي شَانْهَا قَدَّمَوْا سُؤَالَاتْ كَتِيرِينْ. 11وَ رُوحْ الْمَسِيحْ الْقَاعِدْ فِيهُمْ وَصَّفْ لَيْهُمْ مِنْ أَوَّلْ تَعَبْ الْمَسِيحْ وَ دَخُولَهْ فِي الْمَجْد الْبِقِي بَعَدْ التَّعَبْ. وَ سَأَلَوْا أَشَانْ يَعَرْفُوا الْأَشْيَاءْ دَوْل يَجُوا مَتَى وَ كِكَّيْف. 12وَ اللّٰهْ وَصَّفْ لِلْأَنْبِيَاء كَدَرْ هُمَّنْ يَخْدُمُوا لَيْكُو إِنْتُو وَ مَا لِنُفُوسْهُمْ. هُمَّنْ كَلَّمَوْا بِالْأَشْيَاءْ الْيَبْقَوْا فِي وَكِتْنَا. وَ إِنْتُو سِمِعْتُوا بِخَبَرْهُمْ مِنْ النَّاسْ الْبَلَّغَوْا لَيْكُو الْبِشَارَةْ. وَ دَا، بِقُدْرَةْ الرُّوحْ الْقُدُّوسْ الْاللّٰهْ نَزَّلَهْ مِنْ السَّمَاءْ. وَ الْكَلَامْ دَا، الْمَلَائِكَةْ ذَاتْهُمْ دَوَّرَوْا يَفْهَمَوْه.
الحال الواجْبة لناس اللّه
13أَشَانْ دَا، خُطُّوا بَالْكُو. أَقْعُدُوا ثَابْتِينْ. خُطُّوا عَشَمْكُو كُلَّ كَيْ فِي النِّعْمَةْ التَّلْقَوْهَا فِي الْيَوْم الْعِيسَى الْمَسِيحْ يِبِينْ فَوْقَهْ. 14أَعَرْفُوا كَدَرْ إِنْتُو عِيَالْ اللّٰهْ وَ تَابُعُوا دَايْماً كَلَامَهْ. آبَوْا مَا تِتَابُعُوا شَهْوَاتْكُو التَّابَعْتُوهُمْ قُبَّالْ مَا تَعَرْفُوا الْمَسِيحْ. 15لَاكِنْ، مِثِلْ اللّٰهْ النَّادَاكُو هُو قُدُّوسْ، إِنْتُو كُلَ أَبْقَوْا خَاصِّيْن فِي كُلَّ شَيّءْ التِّسَوُّوهْ. 16وَ فِي الْكِتَابْ مَكْتُوبْ: <أَبْقَوْا خَاصِّيْن أَشَانْ أَنَا اللّٰهْ قُدُّوسْ.>#1:16 الكلام دا تلقوه في لاوِيِّين 19:2.
17إِنْتُو تَدْعُوا اللّٰهْ وَ تِنَادُوهْ أَبُوكُو وَ هُو مَا يِشِيفْ نَادُمْ أَخَيْر مِنْ نَادُمْ لَاكِنْ يِحَاسِبْ أَيِّ نَادُمْ حَسَبْ عَمَلَهْ. وَ أَشَانْ دَا، تَابُعُوا دَرِبْ اللّٰهْ بِخَوْف طُولْ الْوَكِتْ الْإِنْتُو عَايْشِينْ فِي الدُّنْيَا مِثِلْ أَجَانِبْ فِي أُسْط الْأُمَمْ. 18تَعَرْفُوا اللّٰهْ فَدَاكُو أَشَانْ تَمُرْقُوا مِنْ الْحَيَاةْ الْبَاطْلَةْ الْوَرَثْتُوهَا مِنْ جُدُودْكُو. وَ هُو مَا فَدَاكُو بِالْأَشْيَاءْ الْبَعَدَيْن يِدَّمَّرَوْا مِثِلْ الْفُضَّةْ وَ الدَّهَبْ. 19هُو فَدَاكُو بِدَمّ الْحَمَلْ الْمَا عِنْدَهْ عَيْب وَ لَا خَطَا وَ هُو دَمّ الْمَسِيحْ الْعِنْدَهْ قِيمَةْ زِيَادَةْ. 20وَ قُبَّالْ بِدَايَةْ الدُّنْيَا، اللّٰهْ قَدَّرْ لِلْمَسِيحْ يَبْقَى ضَحِيَّةْ. وَ خَلَاصْ اللّٰهْ بَيَّنَهْ فِي شَانْكُو إِنْتُو، فِي الْوَكِتْ الْأَخِيرْ. 21وَ بِسَبَبْ الْمَسِيحْ، إِنْتُو آمَنْتُوا بِاللّٰهْ الْبَعَثَهْ مِنْ أُسْط الْمَيْتِينْ وَ أَنْطَاهْ الْمَجْد. وَ خَلَاصْ إِيمَانْكُو وَ عَشَمْكُو ثَابْتِينْ فِي اللّٰهْ.
22وَ إِنْتُو طَهَّرْتُوا نُفُوسْكُو وَكِتْ تَابَعْتُوا كَلَامْ الْحَقّ وَ لِقِيتُوا مَحَبَّةْ أَخَوِيَّةْ بَلَا نِفَاقْ. وَ خَلَاصْ، أَرَّايَدَوْا أَمْبَيْنَاتْكُو بِشِدَّةْ وَ بِقَلِبْ وَاحِدْ. 23بِقِيتُوا مَوْلُودِينْ مِنْ جَدِيدْ وَ دَا مَا مِنْ وَالْدَيْنكُو الْيُمُوتُوا لَاكِنْ هِي مِنْ كَلَامْ اللّٰهْ وَ الْكَلَامْ دَا، أَبَداً مَا يُمُوتْ. 24وَ مَكْتُوبْ فِي الْكِتَابْ:
<كُلَّ النَّاسْ مِثِلْ الْقَشّ
وَ شَرَفْهُمْ مِثِلْ نُوَّارْ الْقَشّ.
وَ الْقَشّ يَيْبَسْ وَ نُوَّارَهْ يِدَفِّقْ
25لَاكِنْ كَلَامْ اللّٰهْ يَقْعُدْ إِلَى الْأَبَدْ.>#1:25 الكلام دا تلقوه في إشَعْيا 40:8، حسب الترْجمة اليونانيّة.
وَ الْكَلَامْ دَا، هُو بِشَارَةْ الْمَسِيحْ الْبَلَّغَوْهَا لَيْكُو.
Currently Selected:
1 بُطْرُس 1: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
