1 بُطْرُس 2
2
1أَشَانْ دَا، خَلُّوا مِنْكُو كُلَّ الْفَسَالَةْ وَ كُلَّ النَّجَاضَةْ وَ النِّفَاقْ وَ الْحُسُدْ وَ الْقَطِيعَةْ. 2وَ مِثِلْ الصَّغِيرْ الْيِتْمَنَّى لَبَنْ أَمَّهْ، إِنْتُو كُلَ أَتْمَنَّوْا كَلَامْ اللّٰهْ الْمِثِلْ لَبَنْ صَافِي. وَ بِالْكَلَامْ دَا، تَكْبُرُوا وَ تَلْقَوْا النَّجَاةْ. 3أَشَانْ إِنْتُو دُقْتُوا وَ عِرِفْتُوا كَدَرْ رَبِّنَا الْمَسِيحْ رَحِيمْ.
عِيسَى هو الحجر الحيّ
4قَرُّبُوا لَيَّهْ. هُو بَسْ الْحَجَرْ الْحَيّ الْاللّٰهْ عَزَلَهْ الْمُهِمّ بِلْحَيْن لَاكِنْ النَّاسْ مَا دَوَّرَوْه. 5وَ إِنْتُو كُلَ مِثِلْ حُجَارْ الْحَيِّينْ الْاللّٰهْ قَاعِدْ يَبْنِي بَيْكُو بَيْت هَنَا رُوحَهْ. وَ إِنْتُو رُجَالْ دِينْ خَاصِّيْن وَ قَاعِدِينْ تِقَدُّمُوا لِلّٰهْ ضَحَايَا بِإِذِنْ الرُّوحْ الْقُدُّوسْ الْاللّٰهْ يَرْضَى بَيْهُمْ بِوَاسِطَةْ عِيسَى الْمَسِيحْ. 6وَ اللّٰهْ قَالْ فِي الْكِتَابْ:
<أَسْمَعَوْا. أَنَا نُخُطّ فِي جَبَلْ صَهْيُون حَجَرْ زَاوِيَةْ.
وَ هُو الْحَجَرْ الْغَالِي الْأَنَا عَزَلْتَهْ.
وَ الْيِآمِنْ بَيَّهْ، أَبَداً مَا يَخْجَلْ.>#2:6 الكلام دا تلقوه في إشَعْيا 28:16.
7وَ لَيْكُو إِنْتُو الْمُؤمِنِينْ، الْمَسِيحْ هُو الْحَجَرْ الْعِنْدَهْ قِيمَةْ كَبِيرَةْ. وَ لَاكِنْ لِلنَّاسْ الْمَا مُؤمِنِينْ، هُو بِقِي مِثِلْ الْكَلَامْ الْمَكْتُوبْ فِي الْكِتَابْ الْبُقُولْ:
<الْحَجَرْ الْبَنَّايِينْ الْبَيْت أَوَّلْ مَا دَوَّرَوْه
بِقِي الْحَجَرْ الْمُهِمّ فِي بُنَى الْبَيْت.>#2:7 الكلام دا تلقوه في زَبُور 118:22.
8وَ بَتَّانْ بُقُولْ:
<أَسْمَعَوْا، أَنَا نُخُطّ حَجَرْ فِي صَهْيُون.
بِسَبَبَهْ، النَّاسْ يِنْطَقَّوْا وَ يَقَعَوْا.>#2:8 الكلام دا تلقوه في إشَعْيا 8:14.
وَ يِنْطَقَّوْا فَوْقَهْ أَشَانْ أَبَوْا مَا يِتَابُعُوا كَلَامْ اللّٰهْ وَ دَا مُقَدَّرْ لَيْهُمْ.
9لَاكِنْ كَنْ لَيْكُو إِنْتُو، بِقِيتُوا الْقَبِيلَةْ الْاللّٰهْ عَزَلَاهَا وَ رُجَالْ دِينْ هَنَا الْمَلِكْ الْكَبِيرْ وَ أُمَّةْ مُخَصَّصَةْ لِلّٰهْ وَ شَعَبْ اللّٰهْ ذَاتَهْ. هُو نَادَاكُو أَشَانْ تَمُرْقُوا مِنْ الضَّلَامْ وَ تَدْخُلُوا فِي نُورَهْ الْعَجِيبْ وَ خَلَاصْ تِبَلُّغُوا خَبَرْ هَنَا أَعْمَالْ اللّٰهْ الْكُبَارْ. 10وَ مَكْتُوبْ فِي الْكِتَابْ:
<أَوَّلْ إِنْتُو مَا شَعَبْ اللّٰهْ
لَاكِنْ هَسَّعْ إِنْتُو بِقِيتُوا شَعَبَهْ.
أَوَّلْ رَحْمَةْ اللّٰهْ مَا جَاتْ فَوْقكُو
لَاكِنْ هَسَّعْ رَحْمَتَهْ جَاتْ فَوْقكُو خَلَاصْ.>#2:10 الكلام دا تلقوه في هُوشَع 2:23.
عبيد اللّه أجانِب في الدُنْيا
11يَا أَخْوَانِي النِّحِبُّكُو الْعَايْشِينْ فِي الدُّنْيَا مِثِلْ أَجَانِبْ وَ ضِيفَانْ، نُقُولْ لَيْكُو أَنْقَرْعُوا. شَهْوَاتْ الْإِنْسَانْ عَدُو. آبَوْا مَا تِتَابُعُوهُمْ. 12خَلِّي حَالْكُو فِي أُسْط النَّاسْ الْمَا مُؤمِنِينْ تَبْقَى عَدِيلَةْ. وَ بِمِثِلْ دَا، كَنْ يَكْدُبُوا فِيكُو وَ يُقُولُوا إِنْتُو نَاسْ فَسْلِينْ كُلَ، يِشِيفُوا عَمَلْكُو السَّمَحْ وَ فِي الأَخِيرْ، يِمَجُّدُوا اللّٰهْ فِي يَوْم الْفَرَجْ.
13فِي شَانْ رَبِّنَا، تَابُعُوا كَلَامْ هَنَا أَيِّ نَادُمْ الْعِنْدَهْ سُلْطَةْ. تَابُعُوا كَلَامْ الْمَلِكْ، كَبِيرْ الْبَلَدْ، 14وَ الْحُكَّامْ الْهُو خَطَّاهُمْ لِيَحْكُمُوا الْمُجْرِمِينْ وَ يَشْكُرُوا النَّاسْ الْيِسَوُّوا الْخَيْر. 15وَ دَا الْيِدَوْرَهْ اللّٰهْ لَيْكُو. بِالْخَيْر التِّسَوُّوهْ، تِوَقُّفُوا الْكَلَامْ الْبَاطِلْ الْيُقُولُوهْ فَوْقكُو النَّاسْ الْجُهَّالْ. 16عِيشُوا بِحُرِّيَّةْ لَاكِنْ مَا تِشِيلُوا الْحُرِّيَّةْ دِي فُرْصَةْ لِتِسَوُّوا بَيْهَا الْفَسَالَةْ وَ مَا تَنْسَوْا كَدَرْ إِنْتُو عَبِيدْ اللّٰهْ. 17كَرُّمُوا كُلَّ النَّاسْ. حِبُّوا كُلَّ أَخْوَانْكُو الْمُؤمِنِينْ. أَخَافَوْا اللّٰهْ. كَرُّمُوا الْمَلِكْ.
وصايا للعبيد
18وَ لَيْكُو إِنْتُو الْعَبِيدْ، أَسْمَعَوْا كَلَامْ سِيَادْكُو بِكُلَّ إِحْتِرَامْ. كَنْ هُمَّنْ زَيْنِينْ وَ كَلَامْهُمْ بَارِدْ وَلَّا كَنْ كَلَامْهُمْ مُرّ كُلَ، أَسْمَعَوْا كَلَامْهُمْ. 19وَ أَعَرْفُوا أَيِّ نَادُمْ الْيَحْمَلْ التَّعَبْ بِصَبُرْ فِي شَانْ اللّٰهْ وَكِتْ النَّاسْ يَظُلْمُوهْ، النَّادُمْ دَا اللّٰهْ يِبَارِكَهْ. 20وَ كَنْ تِسَوُّوا خَطَا وَ بِسَبَبَهْ يُدُقُّوكُو وَ إِنْتُو تَحْمَلَوْه بِصَبُرْ، شُنُو الْفَايْدَةْ؟ لَاكِنْ كَنْ إِنْتُو تِسَوُّوا الْخَيْر وَ يِتَعُّبُوكُو بِسَبَبَهْ وَ إِنْتُو تَحْمَلَوْه بِصَبُرْ، خَلَاصْ اللّٰهْ يِبَارِكُّو.
21دَا بَسْ الدَّرِبْ وَ اللّٰهْ نَادَاكُو لِتِشِيلُوهْ. أَشَانْ الْمَسِيحْ كُلَ تِعِبْ فِي شَانْكُو وَ بِقِي لَيْكُو مَثَلْ أَشَانْ تِتَابُعُوهْ.
22<هُو مَا أَذْنَبْ
وَ فِي خَشْمَهْ مَا فِي غَشّ.>#2:22 الكلام دا تلقوه في إشَعْيا 53:9.
23وَكِتْ عَيَّرَوْه،
هُو مَا رَدَّ لَيْهُمْ بِمُعْيَارْ.
وَكِتْ تَعَّبَوْه،
هُو مَا هَدَّدَاهُمْ.
فِي بَدَلَهْ، هُو أَتْوَكَّلْ عَلَيْ اللّٰهْ
الْيِحَاسِبْ بِالْحَقّ.
24وَ فِي الصَّلِيبْ، هُو بِنَفْسَهْ
حَمَلْ ذُنُوبْنَا فِي جِسْمَهْ
أَشَانْ نِخَلُّوا الذُّنُوبْ مَرَّةْ وَاحِدْ
وَ نِعِيشُوا بِحَالْ صَالْحَةْ.
وَ بِوَاسِطَةْ جِرَاحَهْ،
إِنْتُو لِقِيتُوا الشِّفَاءْ.
25أَشَانْ أَوَّلْ إِنْتُو مِثِلْ غَنَمْ مُوَدِّرِينْ
لَاكِنْ هَسَّعْ قَبَّلْتُوا لِرَاعِيكُو الْيَحْفَضْكُو.#2:25 الكلام دا تلقوه في إشَعْيا 53:6.
Currently Selected:
1 بُطْرُس 2: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
