Popular Bible Verses from 1 بُطْرُس 1

Share

خَلِّي نَشْكُرُوا اللّٰهْ أَبُو رَبِّنَا عِيسَى الْمَسِيحْ! هُو رَحَمَانَا بِرَحْمَةْ كَبِيرَةْ الْبَيْهَا بِقِينَا مَوْلُودِينْ مِنْ جَدِيدْ بِسَبَبْ بُعَاثْ عِيسَى الْمَسِيحْ مِنْ أُسْط الْمَيْتِينْ. وَ بَيْدَا، عِنْدِنَا عَشَمْ مُؤَكَّدْ وَ وَرَثَتْنَا أَبَداً مَا تِدَّمَّرْ وَ لَا تَتْلَفْ وَ لَا تِوَدِّرْ. وَ اللّٰهْ دَمَّهَا لَيْكُو فِي السَّمَاوَاتْ.

وَ أَشَانْ دَا، تَفْرَحَوْا فَرْحَةْ كَبِيرَةْ، حَتَّى كَانْ إِنْتُو قَاعِدِينْ تَتْعَبَوْا لِمُدَّةْ قِصَيْرَةْ كُلَ وَ تَحْزَنَوْا بِسَبَبْ الصُّعُوبَاتْ الشِّقْ شِقْ. نَعَرْفُوا كَدَرْ الدَّهَبْ الْبَعَدَيْن يِدَّمَّرْ، يَكْشُفُوهْ بِالنَّارْ. وَ مِثِلْ دَا، إِيمَانْكُو الْقِيمْتَهْ زِيَادَةْ مِنْ الدَّهَبْ، كُلَ يِجَرُّبُوهْ أَشَانْ ثَبَاتَهْ يِنْشَافْ. وَ بَيْدَا، تَلْقَوْا شُكُرْ وَ مَجْد وَ شَرَفْ فِي الْيَوْم الْعِيسَى الْمَسِيحْ يِبِينْ فَوْقَهْ.

لَاكِنْ، مِثِلْ اللّٰهْ النَّادَاكُو هُو قُدُّوسْ، إِنْتُو كُلَ أَبْقَوْا خَاصِّيْن فِي كُلَّ شَيّءْ التِّسَوُّوهْ. وَ فِي الْكِتَابْ مَكْتُوبْ: <أَبْقَوْا خَاصِّيْن أَشَانْ أَنَا اللّٰهْ قُدُّوسْ.>

أَعَرْفُوا كَدَرْ إِنْتُو عِيَالْ اللّٰهْ وَ تَابُعُوا دَايْماً كَلَامَهْ. آبَوْا مَا تِتَابُعُوا شَهْوَاتْكُو التَّابَعْتُوهُمْ قُبَّالْ مَا تَعَرْفُوا الْمَسِيحْ.

أَشَانْ دَا، خُطُّوا بَالْكُو. أَقْعُدُوا ثَابْتِينْ. خُطُّوا عَشَمْكُو كُلَّ كَيْ فِي النِّعْمَةْ التَّلْقَوْهَا فِي الْيَوْم الْعِيسَى الْمَسِيحْ يِبِينْ فَوْقَهْ.

وَ مَكْتُوبْ فِي الْكِتَابْ: <كُلَّ النَّاسْ مِثِلْ الْقَشّ وَ شَرَفْهُمْ مِثِلْ نُوَّارْ الْقَشّ. وَ الْقَشّ يَيْبَسْ وَ نُوَّارَهْ يِدَفِّقْ لَاكِنْ كَلَامْ اللّٰهْ يَقْعُدْ إِلَى الْأَبَدْ.> وَ الْكَلَامْ دَا، هُو بِشَارَةْ الْمَسِيحْ الْبَلَّغَوْهَا لَيْكُو.