Adad 25
25
Bani Israaʼiil abado ilaah aakhar
1Wakit Bani Israaʼiil gaʼado fi Chittiim, gammo yafsudu maʼa banaat al-Muwaabiyiin. 2Banaat al-Muwaabiyiin yaʼaziman Bani Israaʼiil fi gaddimiin al-dahaaya le ilaahaathin. Wa humman yaakulu maʼaahin laham dahaayaahin wa yasjudu le ilaahaathin. 3Wa be misil da, Bani Israaʼiil chaarako fi ibaadat ilaah Baʼal hana jabal Faʼuur wa Allah khidib khadab chadiid didduhum.
4Wa Allah gaal le Muusa : «Akrub kulla kubaaraat al-chaʼab al-fasado wa jiibhum giddaami ana Allah wa gaabilhum le l-harraay wa achnighum. Wa be da, khadabi al-muhrig battaan ma yalhaghum le Bani Israaʼiil.»
5Wa Muusa gaal le l-gudiya hana Bani Israaʼiil : «Ayyi waahid minku yaktul rujaalah al-chaarako fi ibaadat ilaah Baʼal hana jabal Faʼuur.»
6Wa wakit Bani Israaʼiil gaaʼidiin yabku fi madkhal kheemat al-ijtimaaʼ, fi raajil min Bani Israaʼiil jaayi le akhwaanah maʼa mara Midyaaniiye. Wa Muusa wa kulla mujtamaʼ Bani Israaʼiil chaafooh. 7Wa khalaas fi l-bakaan da, Fiinhaas wileed Aliʼaazar wileed Haaruun raajil al-diin, gamma min usut mujtamaʼ Bani Israaʼiil wa chaal harba fi iidah. 8Wa taabaʼ al-raajil lahaddi fi lubb al-kheema wa taʼanaahum humman al-itneen taʼne waahide bas. Al-raajil wa l-mara taʼanaahum fi butuunhum. Wa khalaas al-waba wagaf min Bani Israaʼiil. 9Wa l-maato min al-waba da, adadhum 24 000 naas.
Al-muʼaahada maʼa Fiinhaas
10Wa Allah hajja le Muusa wa gaal : 11«Fiinhaas wileed Aliʼaazar wileed Haaruun raajil al-diin waggaf khadabi min Bani Israaʼiil wakit wassaf khiirti ana Allah fi usuthum. Wa be sabab al-cheyy al-sawwaah Fiinhaas, ana battaan ma niwassif khiirti wa nikammil Bani Israaʼiil. 12Achaan da, guul leyah ana nantiih muʼaahadati hana l-salaam. 13Wa l-muʼaahada di tabga maʼaayah hu wa zurriiytah al-yaju min baʼadah. Wa hi tadman leehum khidmit rujaal al-diin le l-abad achaan hu wassaf khiirtah fi chaani ana Ilaahah wa sawwa kaffaara le zunuub Bani Israaʼiil.»
14Wa l-raajil al-min Bani Israaʼiil al-katalooh maʼa l-Midyaaniiye usmah Zimri wileed Saalu cheekh hana aayila min gabiilat Chimʼuun. 15Wa l-mara al-Midyaaniiye al-katalooha usumha Kuzbi bineeyit Suur kabiir hana khachum beet min khuchuum buyuut Midyaan.
16Wa khalaas, Allah hajja le Muusa wa gaal : 17«Ahjumu al-Midyaaniyiin wa aktuluuhum. 18Achaan humman khachchooku fi muchkilat Faʼuur wa fi muchkilat akhuthum Kuzbi bitt kabiir Midyaan al-katalooha fi yoom al-waba al-nazal fi muchkilat Faʼuur.»
Currently Selected:
Adad 25: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
