Tasniya 6

Waajib tihibb Allah Ilaahak

1Daahu al-wasaaya wa l-churuut wa l-gawaaniin al-amar beehum Allah Ilaahku le niʼallimhum leeku wa titabbuguuhum fi l-balad al-intu maachiin tichiiluuha warasa. 2Wa da achaan takhaafo min Allah Ilaahku intu wa iyaalku wa iyaal iyaalku wa tahfado fi kulla muddit hayaatku kulla l-churuut wa l-wasaaya al-nantiihum leeku. Wa be da, umurku yabga tawiil.

3Asmaʼo ! Ya Bani Israaʼiil, ahfado al-churuut wa l-wasaaya wa tabbuguuhum. Wa da achaan talgo al-kheer wa tabgo katiiriin misil gaalah leeku Allah Rabb juduudku fi l-balad al-malaane be l-laban wa l-asal. 4Asmaʼo, ya Bani Israaʼiil ! Allah Ilaahna hu Allah al-Waahid. 5Hibbu Allah Ilaahku be kulla guluubku wa be kulla fikirku wa be kulla gudritku. 6Wa l-wasaaya al-nantiihum leeku al-yoom dool, ahfadoohum fi guluubku. 7Wa allumuuhum le iyaalku wa kallumu beehum fi l-beet wa fi l-safar wa wakit raagdiin wa gaaymiin. 8Wa sawwuuhum misil alaama al-tarbutuuha fi iideeku wa misil hilaal al-tiʼalluguuh fi jabhaatku ambeenaat uyuunku. 9Wa aktubuuhum fi iidaan biibaan buyuutku wa fi madkhal hillaalku.

10Wa Allah Ilaahku yiwaddiiku fi l-balad al-hu halaf le juduudku Ibraahiim wa Ishaakh wa Yaakhuub wa gaal yantiiha leeku, be mudunha al-kubaar wa adiiliin al-intu ma baneetuuhum. 11Wa l-ard indaha buyuut al-malaaniin be l-khumaam al-intu ma sabbeetuuh wa biyaar al-intu ma nakattuuhum wa jineenaat inab wa zaytuun al-intu ma maggantuuhum. Wa wakit taakulu wa tachbaʼo, 12fakkuru ma tanso Allah al-maragaaku min Masir balad al-ubuudiiye. 13Wa akhaafo min Allah Ilaahku wa leyah hu bas, aʼabuduuh wa be usmah hu bas, ahalfu. 14Ma titaabuʼu ilaahaat aakhariin hana l-chuʼuub al-mujaawiriinku 15achaan Allah Ilaahku al-gaaʼid fi usutku hu Ilaah khayyuur yaʼni ma yidoor taʼabudu ilaah aakhar. Wa kan khidib leeku khadabah yikammilku min wijh al-ard. 16Ma tijarrubu Allah Ilaahku misil awwal jarrabtuuh fi Massa (maʼanaatah al-tajriba).#6:16 jarrabtuuh fi Massa Al-taariikh da talgooh fi Khuruuj 17:1-7.

17Wa waajib tahfado adiil wasaaya Allah Ilaahku wa l-muʼaahada wa l-churuut al-amaraaku beehum. 18Wa tisawwu al-adiil wa l-zeen giddaam Allah. Wa da, achaan talgo al-kheer wa tichiilu al-balad al-adiile al-fi chaanha Allah halaf yantiiha le juduudku. 19Wa yatrud udwaanku baʼiid minku misil hu gaalah.

20Wa kan iyaalku yasʼalooku wa yuguulu : «Maala Allah Ilaahna amaraaku be l-faraayid wa l-churuut wa l-gawaaniin», 21khalaas guulu leehum : «Awwal aniina bigiina abiid le Firʼoon malik Masir wa laakin Allah maragaana min Masir be iid chadiide. 22Wa fi uyuunna Allah sawwa alaamaat wa ajaayib kubaar wa mukhiifiin le yahlik Masir wa l-malik Firʼoon wa kulla beetah. 23Wa maragaana min al-bakaan da wa waddaana le yantiina al-balad al-hu halaf yantiiha le juduudna. 24Wa Allah Ilaahna amaraana nitabbugu kulla l-churuut dool wa nakhaafo minnah. Wa da achaan nalgo al-kheer al-daayim wa yahfadna hayyiin misil hu sawwaah leena al-yoom. 25Wa nabgo saalihiin kan nahfado wa nitabbugu kulla l-wasaaya dool giddaam Allah Ilaahna misil hu amaraana beyah.»

Currently Selected:

Tasniya 6: ADT19

Highlight

Copy

Compare