2 Samuwiil 7
7
Dawuud dawwar yabni beet le Allah
1Wa baʼad Allah nasarah le l-malik Dawuud fi kulla udwaanah al-mujaawiriinah, khalaas hu sakan fi beetah be l-salaama. 2Wa yoom waahid, al-malik gaal le l-nabi Naataan : «Chiif, ana saakin fi beet jamiil hana hatab al-arz. Wa laakin sanduug al-Rabb gaaʼid fi kheema bas.» 3Wa Naataan radda le l-malik wa gaal : «Amchi sawwi kulla cheyy al-fi galbak achaan Allah maʼaak.»
4Wa laakin fi l-leele di, Allah hajja le Naataan wa gaal : 5«Amchi guul le abdi Dawuud : ‹Daahu Allah gaal : “Da ma inta al-tabni leyi beet al-ana naskun foogah. 6Achaan ana abadan ma sakant fi beet min yoom al-ana maragt Bani Israaʼiil min Masir lahaddi l-yoom. Wa laakin ana sirt maʼaahum wa sakant fi kheema. 7Wa fi ayyi bakaan, ana sirt maʼa kulla Bani Israaʼiil. Wa ana abadan ma kallamt le waahid min kubaaraat gabaayil Bani Israaʼiil al-ana amartuhum le yahkumu foog chaʼabi wa la saʼaltah maala ma bana leyi beet hana hatab al-arz.”›
8«Wa hassaʼ da, amchi guul le abdi Dawuud : ‹Daahu Allah al-Gaadir gaal : “Ana jibtak min sarhit al-khanam achaan tabga kabiir hana chaʼabi Bani Israaʼiil. 9Wa ana kunt maʼaak fi ayyi bakaan al-inta macheet foogah wa gachcheet kulla udwaanak min giddaamak. Wa nisawwi usmak aali misil al-asaame hana l-naas al-kubaar fi l-ard. 10Wa ana nanti bakaan le chaʼabi Bani Israaʼiil wa nimakkinhum. Wa humman yaskunu fi l-bakaan da bala khoof. Wa naas fasliin ma yazulmuuhum battaan misil awwal. 11Wa min wakit al-ana kallaft hukkaam fi chaʼabi Bani Israaʼiil, ana najjeetak min kulla udwaanak. Wa nikhabbirak kadar ana Allah nisabbit beet aayiltak. 12Wa wakit ayyaamak yikammulu, tumuut wa talhag abbahaatak. Wa ana naʼazil waahid min zurriiytak, hu al-yamrug min sulbak, wa ana nisabbit mulkah. 13Wa hu bas al-yabni beet le yimajjudu foogah usmi wa ana nisabbit aayiltah fi l-muluk ila l-abad. 14Wa ana nabga leyah abuuh wa hu yabga leyi ibni. Wa kan ma maachi adiil, ana niʼaddibah misil al-insaan yiʼaddib iyaalah. 15Wa laakin ma nichiil minnah rahmati misil chiltaha min Chaawuul al-ana tarraftah achaan inta tabga malik. 16Wa aayilat beetak tahkim daayman baʼadak wa mulkak yasbit ila l-abad.”›»
17Wa Naataan hajja le Dawuud be kulla l-kalaam al-gaalah leyah Allah fi l-ruʼya di.
Salaat Dawuud
18Wa l-malik Dawuud dakhal fi l-kheema fi hadarat Allah wa gaal : «Ana yaatu, ya Allah Rabbi ? Wa aayilti tisaawi chunu lahaddi tantiini daraja misil di ? 19Wa da cheyy hayyin saakit leek inta, ya Allah Rabbi, wa inta aahadt aayilat beeti ana abdak fi l-mustakhbal. Wa ya Allah Rabbi, cheyy misil da yichaabih leyi ana al-insaani walla ? 20Ya Allah Rabbi, inta taʼarifni tamaam ana abdak. Wa nagdar nuguul chunu battaan ? 21Wa be sabab kalaamak wa niiytak, inta sawweet leyi al-achya al-kubaar dool wa arraftuhum leyi ana abdak. 22Ya Allah al-Rabb, inta al-akbar. Inta ma indak chabiih wa abadan ma fi ilaah illa inta. Wa da hasab kulla l-kalaam al-simiʼnaah. 23Fiyah umma fi kulla l-ard misil chaʼabak Bani Israaʼiil walla ? Ya Rabb, inta fadeethum wa sawweethum chaʼabak achaan usmak yabga aali. Wa inta sawweet ajaayib kubaar al-bikhawwufu le baladak wa giddaam chaʼabak al-inta fadeethum le nafsak min balad Masir. Wa taradt al-umam al-aakhariin wa ilaahaathum giddaam chaʼabak. 24Wa inta sabbatt chaʼabak Bani Israaʼiil le yabgo daayman chaʼabak halaalak. Ya Allah, inta bigiit leehum Ilaahhum. 25Wa hassaʼ da, ya Allah Ilaahi, al-kalaam al-gultah foogi ana abdak wa foog aayilti da, khalli yilhaggag ila l-abad. Wa tammim kulla cheyy al-gultah. 26Wa khalli yimajjudu usmak ila l-abad wa yuguulu : ‹Allah al-Gaadir, hu bas Ilaah Bani Israaʼiil.› Wa khalli beeti ana abdak Dawuud yagood saabit giddaamak. 27Achaan inta zaatak, ya Allah al-Gaadir Ilaah Bani Israaʼiil, khabbartini ana abdak wa gult leyi : ‹Nisabbit beet aayiltak fi l-muluk.›
«Wa fi chaan da, ana abdak ligiit al-chajaaʼa wa gaddamt leek al-sala di. 28Wa hassaʼ da, ya Allah Rabbi, inta bas al-Ilaah wa kalaamak hagg. Wa inta aahadtini ana abdak be kulla l-kheer da. 29Wa khalaas hassaʼ da, akhbal suʼaali wa baarik aayilti ana abdak le yamulku giddaamak ila l-abad. Ya Allah Rabbi, achaan inta bas gult be barakatak, aayilat beeti talga baraka daayme.»
Currently Selected:
2 Samuwiil 7: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
