2 Samuwiil 6
6
Dawuud dawwar yijiib sanduug Allah
1Wa Dawuud lamma battaan 30 000 raajil min ahsan al-muhaaribiin hana Bani Israaʼiil. 2Wa gamma maʼa kulla l-naas dool wa macho hillit Baʼla Yahuuza achaan yijiibu min hinaak sanduug al-Rabb. Wa da l-sanduug al-foogah usum Allah al-Gaadir, hu al-archah gaaʼid been al-makhluugiin al-samaawiyiin al-masnuuʼiin fi sidaadit al-sanduug. 3Wa humman chaalo sanduug al-Rabb min beet Abinadaab al-gaaʼid fi raas al-hajar wa khattooh fi kaarro jadiid. Wa awlaad Abinadaab, Uzza wa Akhyu, gaado al-kaarro 4al-gaaʼid foogah sanduug al-Rabb wa Akhyu maachi giddaamah. 5Wa Dawuud wa kulla Bani Israaʼiil gaaʼidiin yalʼabo giddaam sanduug Allah fi hiss aalaat al-sawwoohum be hatab al-sarwi misil al-jigindiiye wa amsibeybe wa l-tambal wa l-bukhsa wa l-nuggaara. 6Wa wakit wassalo fi l-madagg hana Naakuun, al-bagar attartaʼo wa Uzza madda iidah wa karab sanduug al-Rabb. 7Wa Allah khidib khadab chadiid didd Uzza wa tawwaali darabah achaan khataayah. Wa Uzza wagaʼ maat hinaak jamb sanduug al-Rabb.
8Wa Dawuud ziʼil zaʼal chadiid achaan Allah khidib didd Uzza wa darabah. Wa samma al-bakaan da Faaris Uzza (maʼanaatah darab Uzza) wa l-usum da gaaʼid lahaddi l-yoom. 9Wa fi l-yoom da, Dawuud khaaf khoof chadiid min Allah wa gaal : «Kan ke da, kikkeef nagdar nijiib sanduug Allah fi beeti ?»
10Wa Dawuud aba ma yiwaddi sanduug Allah fi beetah fi madiinat Dawuud. Wa laakin waddaah fi beet Ubeed Adoom al-min hillit Gaat. 11Wa sanduug Allah gaʼad talaata chahar fi beet Ubeed Adoom. Wa Allah baarak Ubeed Adoom wa kulla aayiltah.
Sanduug Allah wassal fi Uruchaliim
12Wa jo khabbarooh le l-malik Dawuud kadar Allah baarak Ubeed Adoom wa kulla aayiltah wa ayyi cheyy al-indah achaan sanduug al-Rabb gaaʼid fi beetah. Wa khalaas, Dawuud gamma macha chaal sanduug al-Rabb min beet Ubeed Adoom wa waddaah fi madiinat Dawuud be farah. 13Wa wakit al-naas al-chaalo sanduug Allah yisawwu sitte khatwa, Dawuud yadbah toor wa ijil samiin. 14Wa Dawuud gaaʼid yalʼab be kulla gudurtah giddaam Allah wa laabis khalag gisayyir misil rujaal al-diin. 15Dawuud wa kulla Bani Israaʼiil waddo sanduug Allah fi Uruchaliim be zakhraat wa daribiin buug. 16Wa wakit jaabo sanduug Allah fi madiinat Dawuud, Mikaal bineeyit Chaawuul gaaʼide tichiif min al-chubbaak wa hi chaafat al-malik Dawuud gaaʼid yalʼab wa yinattit giddaam Allah. Wa khalaas, hi abatah min daakhil galibha.
17Wa humman jaabo sanduug Allah wa khattooh fi bakaanah fi lubb al-kheema al-Dawuud jahhazaaha leyah. Wa baʼad da, Dawuud gaddam le Allah dahaaya muharragiin wa dahaaya salaama. 18Wa wakit Dawuud gaddam al-dahaaya al-muharragiin wa dahaaya al-salaama dool khalaas, hu baarak Bani Israaʼiil be usum Allah al-Gaadir. 19Wa baʼad da, Dawuud gassam akil le kulla chaʼab Bani Israaʼiil, mara wa raajil. Le ayyi waahid, antaah khubza wa abbuud hana tamur wa abbuud hana inab. Wa khalaas, kulla l-chaʼab chatto wa ayyi waahid gabbal beetah.
20Wa Dawuud gabbal beetah le yibaarik aayiltah. Wa Mikaal bineeyit Chaawuul maragat tilaagiih wa gaalat : «Da ma eeb leek inta malik Bani Israaʼiil ? Al-yoom khalleet jildak aryaan giddaam khaddaamaat naasak misil naadum al-ma yanfaʼ yisawwiih !» 21Wa Dawuud gaal le Mikaal : «Ana sawweet al-cheyy da giddaam Allah al-azalaani ana akheer min abuuki wa aayiltah. Wa sawwaani kabiir hana chaʼabah Bani Israaʼiil. Wa ana nafrah battaan ziyaada giddaam Allah. 22Aywa ! Kan tiʼayyiriini wa tiʼayyibiini kula, nafrah. Wa laakin al-khaddaamaat deel yicharrifanni.»
23Wa Mikaal bineeyit Chaawuul ma ligat sakhiir lahaddi maatat.
Currently Selected:
2 Samuwiil 6: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
