1 Samuwiil 19

Chaawuul haawal yaktul Dawuud

1Wa Chaawuul kallam le wileedah Yuunataan wa kulla khaddaamiinah kadar hu yidoor yaktul Dawuud. Wa laakin Yuunataan wileed Chaawuul indah mahabba chadiide le Dawuud. 2Wa Yuunataan ja khabbarah le Dawuud wa gaal leyah : «Abuuyi Chaawuul yidoor yaktulak ! Abga hadiir ambaakir fajur. Fattich leek bakaan wa labbid foogah. 3Wa ana namrug wa namchi maʼa abuuyi fi l-zereʼ al-inta mullabbid foogah. Wa ana nihajji leyah beek wa nasmaʼ hu yuguul chunu. Wa baʼadeen nikhabbirak.»

4Wa Yuunataan hajja le Chaawuul abuuh be kulla l-kheer al-Dawuud sawwaah wa gaal : «Ya l-malik ! Ma takhta fi khaddaamak Dawuud achaan hu ma khiti foogak. Wa hu sawwa leek daayman al-kheer. 5Wa dassa nafsah fi l-khutuura wakit hu katal al-Filisti. Wa be da, Allah nasar kulla Bani Israaʼiil nasur kabiir. Wa inta zaatak chiftah wa firiht beyah. Wa maala takhta wa tidaffig damm hana insaan bari misil Dawuud wa taktulah bala janiiye ?» 6Wa Chaawuul simiʼ kalaam Yuunataan wileedah wa halaf wa gaal : «Nahlif be Allah al-Hayy, battaan le Dawuud ma naktulah !»

7Wa khalaas, Yuunataan naadaah le Dawuud wa khabbarah be kulla l-kalaam da. Wa battaan jaab Dawuud le abuuh Chaawuul. Wa Dawuud gaaʼid yakhdim leyah misil awwal.

Mikaal najjat Dawuud min al-moot

8Wa l-harib maʼa l-Filistiyiin bada battaan wa Dawuud macha hajamaahum wa khassaraahum khasaara kabiire. Wa humman arrado minnah. 9Wa ruuh fasle min Allah nazalat fi Chaawuul. Wa hu gaaʼid fi beetah wa haribtah fi iidah. Wa Dawuud kamaan gaaʼid yudugg fi jigindiiytah. 10Wa Chaawuul dawwar yilassigah le Dawuud fi l-durdur be haribtah. Wa laakin Dawuud khanas wa l-harba lisgat fi l-durdur. Wa be da, Dawuud jara faat fi l-leele di. 11Wa Chaawuul rassal naas fi beet Dawuud le yiraakhubuuh wa ambaakir fajur kamaan, yaktuluuh. Laakin Mikaal marit Dawuud khabbarat raajilha wa gaalat : «Kan ma arradt fi l-leele di, ambaakir fajur yaktuluuk !»

12Wa khalaas, Mikaal saaʼadat raajilha Dawuud wa maragatah min al-chubbaak. Wa be misil da, Dawuud arrad wa niji. 13Wa baʼad da, Mikaal chaalat sanam wa raggadatah fi l-sariir wa khattat farwa hana khanam fi raasah wa khattatah be khalag. 14Wa wakit Chaawuul rassal naas le yakurbu Dawuud, Mikaal gaalat leehum : «Hu mardaan.» 15Wa Chaawuul gabbalaahum le l-naas dool wa gaal : «Jiibuuh leyi fi lubb sariirah le nitammimah marra waahid !»

16Wa wakit al-rujaal dakhalo fi beet Dawuud, ma ligooh. Laakin ligo al-sanam fi l-sariir wa farwit al-khanam fi raasah. 17Wa Chaawuul naadaaha le Mikaal wa gaal leeha : «Maala khachcheetiini wa khalleeti aduuyi jara wa niji ?» Wa Mikaal raddat le Chaawuul wa gaalat : «Hu gaal leyi : ‹Khalliini namchi ! Walla tidoori naktulki ?›»

Dawuud arrad wa Chaawuul taabaʼah

18Wa be misil da, Dawuud arrad wa niji. Wa macha le Samuwiil fi hillit al-Raama wa hajja leyah be kulla cheyy al-Chaawuul sawwaah leyah. Wa humman gammo macho sakano fi hillit Nayuut. 19Wa naas jo khabbaro Chaawuul wa gaalo leyah : «Daahu Dawuud macha Nayuut, gariib le hillit al-Raama.»

20Wa khalaas, Chaawuul rassal naas le yakurbu Dawuud. Wa laakin wakit wassalo, chaafo majmuuʼa min al-anbiya gaaʼidiin yitnabbaʼo wa fi raashum Samuwiil waagif be tuulah. Wa Ruuh Allah nazal fi l-naas al-rassaloohum wa humman kula bado yitnabbaʼo.

21Wa jo khabbaro Chaawuul be l-cheyy da wa hu gamma rassal naas aakhariin. Laakin humman kula bado yitnabbaʼo. Wa rassal naas aakhariin le taalit marra wa humman dool kula bado yitnabbaʼo.

22Wa fi l-akhiir, Chaawuul zaatah gamma macha le hillit al-Raama. Wa wakit wisil fi l-biir al-kabiire al-gaaʼide fi hillit Siiku, hu saʼal wa gaal : «Ween Samuwiil wa Dawuud ?» Wa raddo leyah wa gaalo : «Humman gaaʼidiin fi Nayuut gariib le hillit al-Raama.» 23Wa wakit hu maachi le Nayuut gariib le hillit al-Raama, Ruuh Allah nazal foogah hu kula wa maachi wa gaaʼid yitnabbaʼ lahaddi wisil fi Nayuut. 24Wa khalaas, Chaawuul salla khalagah wa hu kula gaaʼid yitnabbaʼ giddaam Samuwiil. Wa wagaʼ aryaan wa gaaʼid waagiʼ tuul al-yoom da wa tuul al-leele di. Wa be sabab da bas, al-naas yuguulu : «Chaawuul kula bigi nabi maʼaahum walla ?»

Currently Selected:

1 Samuwiil 19: ADT19

Highlight

Copy

Compare