1 Samuwiil 18
18
Yuunataan habbaah le Dawuud
1Wa wakit Dawuud kammal kalaamah maʼa Chaawuul, Yuunataan galbah allag foog Dawuud wa hu habbaah misil nafsah. 2Wa min al-yoom da, Chaawuul khatta Dawuud maʼaayah wa ma khallaah yigabbil bakaan abuuh. 3Wa Yuunataan sawwa alaakha maʼa Dawuud achaan hu habbaah misil nafsah. 4Wa Yuunataan salla jallaabiiytah wa antaaha le Dawuud. Wa antaah khulgaanah hana l-askar wa seefah wa nubbaalah wa hizaamah kula.
5Wa fi ayyi muhimma al-Chaawuul yirassilah foogha, Dawuud yanjah. Wa Chaawuul khattaah khaayid fi l-rujaal al-muhaaribiin. Wa kulla l-chaʼab wa rujaal Chaawuul raadooh le Dawuud.
Chaawuul kirihah le Dawuud
6Wa baʼad Dawuud katal Jaaluut al-Filisti, humman gabbalo min bakaan al-harib wa l-awiin al-min kulla hillaal balad Israaʼiil maragan le yilaagan al-malik Chaawuul be khine wa liʼib wa nagaagiir wa jigindiiye wa zakhraat. 7Wa hinna kullihin ke gaaʼidaat yalʼaban wa yikhannan wa yuguulan : «Chaawuul katal aalaaf wa Dawuud katal acharaat al-aalaaf !»
8Wa l-khine da harrag galib Chaawuul wa hu ziʼil zaʼal chadiid wa fakkar wa gaal : «Kan hinna yuguulan Dawuud katal acharaat al-aalaaf wa ana katalt aalaaf bas, faddal leyah illa l-muluk !» 9Wa min al-yoom da, Chaawuul kirihah le Dawuud.
10Wa ambaakir, ruuh fasle min al-ilaahaat jaat fi Chaawuul. Wa hu gaaʼid yitnabbaʼ fi beetah wa Dawuud kamaan gaaʼid yudugg fi jigindiiytah misil awwal. Wa Chaawuul indah harba fi iidah. 11Wa tawwaali, zaragah le Dawuud wa gaal fi nafsah : «Khalli nilassigah fi l-durdur !» Laakin Dawuud khanas minnah marrateen.
12Wa Chaawuul khaaf min Dawuud achaan Allah kaan maʼaayah wa khallaah leyah hu. 13Wa fi chaan da, Chaawuul baʼadah minnah wa khattaah khaayid fi alif askar wa hu yamchi wa yaji fi raashum. 14Wa Dawuud gaaʼid yanjah fi l-harib achaan Allah maʼaayah. 15Wa wakit Chaawuul chaaf Dawuud gaaʼid yanjah be ziyaada fi l-harib, hu khaaf minnah bilheen. 16Wa laakin kulla Bani Israaʼiil wa naas gabiilat Yahuuza yiriiduuh le Dawuud achaan hu bas khaayid al-deech wa gaaʼid yamchi wa yaji fi raashum.
Dawuud akhad bineeyit Chaawuul
17Wa yoom waahid, Chaawuul gaal le Dawuud : «Di hi bineeyti al-kabiire Miirab, nantiiha leek mara ! Wa laakin be chart tabga raajil fahal wa tihaarib fi huruub Allah.» Wa fi galbah, Chaawuul gaal : «Khalli ana ma naktulah laakin narmiih fi iid al-Filistiyiin.»
18Wa Dawuud radda leyah wa gaal : «Ana ke yaatu ? Wa khachum beet abuuyi fi Bani Israaʼiil ke chunu ? Wa kikkeef nabga nasiib al-malik ?» 19Wa fi wakit al-Dawuud yichiil foogah martah Miirab bineeyit Chaawuul, tawwaali abuuha gamma antaaha le Adriyiil min hillit Mahuula.
20Wa laakin Mikaal bineeyit Chaawuul al-sakhayre habbatah le Dawuud. Wa wakit Chaawuul simʼah, hu firih 21wa gaal fi galbah : «Khalli nantiiha leyah achaan tabga leyah charak ! Wa l-Filistiyiin yaktuluuh !» Wa Chaawuul gaal le Dawuud : «Hassaʼ da, di fursa aakhara al-beeha inta tabga nasiibi !»
22Wa Chaawuul gaal le khaddaamiinah : «Guulu le Dawuud be achiir : ‹Al-malik farhaan beek wa kulla khaddaamiinah yihibbuuk. Ma taaba ! Abga nasiib al-malik !›» 23Wa khaddaamiin Chaawuul gaalo al-kalaam da le Dawuud wa Dawuud gaal : «Intu tichiifu al-cheyy da hayyiin, le nabga nasiib al-malik ? Ana miskiin wa ma nisaawi cheyy !»
24Wa l-khaddaamiin jaabo al-radd hana Dawuud le l-malik. 25Wa Chaawuul gaal : «Guulu le Dawuud : ‹Al-malik ma bidoor minnak maal fi bineeytah. Laakin hu yidoor miya khulaf hana l-Filistiyiin al-taktulhum. Achaan Chaawuul yichiil al-taar fi udwaanah.›» Wa be da, Chaawuul yahsib yarmi Dawuud fi iid al-Filistiyiin.
26Wa khaddaamiin Chaawuul hajjo be l-kalaam da le Dawuud. Wa hu khassad le yabga nasiib al-malik. Wa gubbaal al-waʼad ma yitimm, 27Dawuud chaal rujaalah wa macha katal miiteen rujaal min al-Filistiyiin. Wa jaab adad al-khulaf wa antaahum le l-malik achaan yabga nasiibah. Wa khalaas, Chaawuul antaah bineeytah Mikaal.
28Wa Chaawuul irif tamaam kadar Allah gaaʼid maʼa Dawuud wa bineeytah Mikaal kula habbatah. 29Wa be da, Chaawuul khaaf min Dawuud be ziyaada. Wa min al-yoom da, hu chaafah misil aduuh. 30Wa fi ayyi wakit kan kubaaraat al-Filistiyiin yahjumu, Dawuud yinnasir fooghum. Wa nasrah bigi ziyaada min nasur kulla l-khuyyaad al-aakhariin hana Chaawuul. Wa be da, usmah talaʼ.
Currently Selected:
1 Samuwiil 18: ADT19
Highlight
Copy
Compare
Share
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
