1 Kuruntus 13

Al-mahabba

1Kan nikallim be lukhkhaat al-naas wa be lukhkhaat al-malaaʼika wa ma indi al-mahabba, kalaami ma indah faayde. Be da kalaami bigi misil daggiin al-nahaas walla baki al-jaras. 2Wa kan nitnabbaʼ be kalaam jaayi min Allah wa nafham kulla l-asraar wa kulli cheyy hana ilim wa kan indi iimaan gawi marra waahid lahaddi nihawwil al-jibaal min bakaanaathum kula wa kan ma indi al-mahabba, ana ma cheyy. 3Wa kan nanti kulli cheyy al-indi le l-masaakiin lahaddi nisallim jismi achaan nistakbar#13:3 Aw be tarjama aakhara, nisallim jismi le l-naar achaan yiharruguuh. wa laakin ma indi al-mahabba, ma nalga cheyy.

4Al-naadum al-indah mahabba sabuur wa zeen. Al-indah mahabba ma hasuud. Al-indah mahabba ma fachchaar wa ma mustakbir. 5Hu ma yisawwi cheyy hana eeb. Hu ma yifakkir fi nafsah bas. Wa ma yazʼal ajala. Hu ma yifakkir fi l-khata al-akhwaanah sawwooh. 6Hu abadan ma yafrah be l-zulum laakin yafrah daayman be l-hagg. 7Al-indah mahabba, hu yahmal ayyi cheyy. Hu yiʼaamin fi kulli haal wa achamah saabit fi kulli haal wa hu yasbur fi ayyi cheyy.

8Al-mahabba abadan ma tikammil. Al-tanabbu yikammil. Wa l-lukhkhaat al-yaju min al-Ruuh al-Khudduus yabgo ma fiihum. Wa l-ilim yikammil. 9Achaan al-ilim al-indina, muhaddad. Wa l-tanabbu al-nihajju beyah, muhaddad. 10Laakin wakit kulli cheyy yabga tamaam, al-cheyy al-ma tamaam yikammil.

11Masalan, wakit ana wileed sakhayyar ana hajjeet hije hana iyaal dugaag wa fikri kula hana iyaal dugaag wa agli kula hana iyaal dugaag. Wa laakin wakit ana kibirt khalaas wa bigiit raajil, khalleet minni al-iyaaliiye. 12Achaan hassaʼ fi zamanna da, nichiifu al-hagg misil nichiifuuh fi amchawwaafa al-waskhaane wa fi l-aakhira, nichiifuuh adiil. Hassaʼ da, ana irift chiyya wa baʼadeen naʼarif adiil misil Allah irifni.

13Wa khalaas al-talaata al-yagoodu daayman, humman al-iimaan wa l-acham wa l-mahabba. Wa l-akbar minhum hu al-mahabba.

Currently Selected:

1 Kuruntus 13: ADT19

Highlight

Copy

Compare