Lûfi 4
4
Bôa è Lûfi kùla a nɛnî
1Bôa è lì góraŋ la é sée naa. Elîmɛlɛ ŋɔkáayɔɔi, nyíi Bôa è maa mɛni ƃôi, è pà naa. Nya ƃe Bôa è mò mà ǹyɛɛi, “Ŋ̀wɛ̂lii, pá í ímaa yéŋ.” Nya ƃe è lì é sée. 2Bôa è daa-ƃela kpaya-kpayai buu tòli a gɛ́ɛ dia máŋ dí pá dí m̀ɛnii ḿɛni a pâi m̀ôi. Dí pà dí sée naa. 3Nya ƃe è mò Elîmɛlɛ ŋɔkáayɔɔi ma è dòlii ǹyɛɛ m̀ai, “Neomi nyíi kùla Môa lɔii su é pá pôlui, gáa ǹɔii kpuai kɔlɛ̂i nyíi gáa a kúkáayɔɔi Elîmɛlɛ pɔ́ɔi. 4Mɛni ma, ŋá gbɛ̀tɛ ŋ́gili ŋá a gɛ́ɛ ŋá m̀ó yâ a gɛ́ɛ í ǹyá dîai ŋí seeni ƃɛ́ da ŋánûa pɔlɔ-ŋai ŋɛ́i à kɛ̀ ƃa pâi ǹyai, ǹya. Kɛ́lɛ à kɛ̀ ífe pâi ǹyai, m̀ó ḿâ a gɛ́ɛ ŋá gɔ́lɔŋ, kpɛni fêi, núu da kélee fé naa é kúla ípôlu ǹɔii ŋí yá mɛni ma fɛ̂ɛ nɔ́ ńyãa.”
È mò ǹyɛɛ, “Ŋa pâi ǹyâi.”
5Nya ƃe Bôa è mò ǹyɛɛi, “À kɛ̀ ƃà yà Neomi yêei, gɛ̀ ní íkaa máŋ Môa nɛnii Lûfi yâi nyíi gáa a bɔɔ-nɛnii, a gɛ́ɛ zaa-nuui láa é lɛ́ɛ ǹɔii ma.” 6Ǹalôŋ è mò ǹyɛɛ m̀ai, “À kɛ̀ a bere sîi ti, gɛ̀ ní fa pɔri ǹɔii yâi, kpeni fêi, ŋá máŋ ǹyá, gɛ̀ ní ŋ́gaa ŋ́gbɔɔi nia-pɛlɛɛi filîi, kpɛ́ni fêi, dípɔɔ fé pâi kɛ̂i ma. M̀ɛni ma, fa pɔri ǹyâi. Ye ǹyá.”
7Eezuɛ-ŋai tûa-perei wɔ́lɔ kɛ̀ lɔii yá mɛni ma da lɔii maa fáleŋ mɛnii, ƃé kɛ̀ a gɛ́ɛ ǹɔii kɔlɛ-nuui é ŋɔkpáŋ-kpalii kúla gɔ́ɔ ŋá é dɛɛ ǹɔii yá-nuui pɔ́. Bere sîi tí ƃé Eezuɛ-ŋai dí kâa dílɔii mɛni-ŋai kpɛ̀tɛ la. 8Mɛni ma, tãi ǹalôŋ è mò la Bôa ma a gɛ́ɛ é ǹɔii yái, é ŋɔkpâŋ-kpalii kùla gɔ́ɔ ŋá é dɛ̀ɛ Bôa pɔ́. 9Bôa ǹyɛɛ ǹûai kélee naai dîa, “Kákaa sâa a ŋásêre-ŋa a gɛ́ɛ zãai kélee kɛ̀ a Elimɛlɛ da ǹônii-sinaai Kîliɔŋ da M̀alɔŋ pɔ́ɔi, ŋa ǹyá Neomi yêei. 10Ŋa Môa nɛnii Lûfi yá máŋ nyíi gáa a M̀alɔŋ ŋɔpɔɔ-nɛnii, a gɛ́ɛ gɛ́ ƃò a ŋánɛnîi. Ŋá nyíŋi kɛ̀ a gɛ́ɛ zaa-nuui láa é lɛ́ɛ ŋɔpɔɔ-sɛŋ ma ŋɔnûai dífe nîa ǹáa ma. Kákaa a ŋásêre-ŋa sâa.”
11Nya ƃe diai kélee kɛ̀ góraŋ la da ǹúu pɔlɔ-ŋai dí mò dîyɛɛi, “Kúkaa a ísêre-ŋa. Ǹɛnîi pâi ípɛrɛi mui, tɔɔ Kúnuu-namui é gɛ́ yɛ̂ɛ Leesɛ da Lîɛ nyíi-ŋai nîa-pɛlɛɛ támaa maa sɔlɔ ƃò Eezuɛ mi ŋɔpɛ́rɛi láa é fɛ̀ɛi. Tɔɔ í Ƃûu ƃó Ɛfata kolii su ílaa é lɛ́ɛ Bɛpeleɣɛ̃ɛ. 12Ǹîa-pɛlɛɛi Ǹuu-namui a pâi gɛ̂i ka ǹɛnî-kpelai ŋí ka dímaa sɔlɔ ƃôi da pâi gɛ̂i ísuui maa mɛni kɛ́ ƃò yɛ̂ɛ Pêle, Tâma Zuda díloŋ-surɔŋ suui maa mɛni.”
Bôa da ǹônii
13Nya ƃe Bôa è Lûfi siɣe a ŋɔnɛnî, lɔ́ la pɔ̂rɔŋ. Kúnuu-namui è lûwai làa ma é koo síɣe é lóŋ-surɔŋ maa sɔlɔ ƃó. 14Ǹɛyâai dí mò Neomi ma dîyɛɛi, “Kwa Kúnuu-namui sɛɣɛ̂i fé, kpɛni fêi, a ímɛi-kaa nuu tɛɛ. Tɔɔ ǹáa é sía Eezuɛ gwaa kélee. 15A pâi íŋa nɛnɛ̂i é ípɔlɔ ŋá kɔ́ŋ, kpɛ́ni fêi, gáa a íloŋ-surɔŋ ŋɔnɛnîi. È íwɛlini, ǹyaŋ m̀aa mɛni kpanaŋɔɔ̂i yâ kpîŋ é tɛ́ɛ íkpɔɔi lonii-sinaa lɔ́ɔlu mɛi feerɛ dîa.” 16Gɛ́ɛ tíi, Neomi è ǹôloŋ sìɣe é ǹáa gɔ́ɔ mɛi. Ǹyaa ƃé kɛ̀ ǹolôŋ ŋí m̀ɛi káa-nuu. 17Naa kɔlɛ-ma nɛyãai dí ǹôloŋ láa sèe a Obɛɛ dîyɛɛi, “Neomi a lóŋ-surɔŋ maa sɔlɔ ƃó.” Obɛɛ è kɛ̀ a Zɛ̂se nyíi kɛ̀ a Deeƃé ǹâŋ ŋɔnàŋ.
18Pîrɛɛ suui pîlaŋ pere ká ŋí: Pîrɛɛ è kɛ̀ a Esɛlɔŋ ǹâŋ, 19Esɛlɔŋ kɛ́ ƃò a Araŋ ǹâŋ. Araŋ è kɛ̀ a Amênɛda ǹâŋ, 20Amênɛda kɛ́ ƃò a Nâsuŋ ǹâŋ. Ǹasuŋ ǹóŋ ƃé kɛ́ ƃò a Sâmoŋ ǹâŋ. 21Sâmoŋ è kɛ̀ ƃò a Bôa ǹâŋ, Bôa kɛ́ ƃò a Obɛɛ ǹâŋ. 22Obɛɛ ƃé kɛ̀ a Zɛ̂se ǹâŋ, Zɛ̂se kɛ́ ƃò a Deeƃé ǹâŋ.
Currently Selected:
Lûfi 4: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia