Samia Maa-ŋuŋ Tuɛ mɛni ƃóɔɔ
Tuɛ mɛni ƃóɔɔ
Samia kɔlɔi maa-ŋuŋ a Eezuɛ-ƃelai láa túɛ-ƃelai díkâloŋ-laa koraŋ-ŋai loai lɛ̀ é síɣe m̀ɛni-sâa ƃó-ƃelai dítãi ma é tóo tãi ma kâloŋ-ŋa dí kɛ̀ la Eezuɛ lɔii mɛi. M̀ɛni maa fáleŋɔɔi ŋí pîlaŋɔɔi sinâa saaƃa dîa: Samia ƃé kɛ̀ a m̀ɛni-sâa ƃó-nuu kɛ́tɛi gbɛɛ ŋái. Sɔ̂ɔ ƃé kɛ̀ a Eezuɛ kaloŋ maa-ŋuŋ. Deeƃé è Samia ŋɔkâloŋ-laa tii gbua da kɛ̀ é Sɔ̂ɔ ŋ̀ɔi gbua da kɛ́ é lɛ́ɛ pâi ŋ̀ɔi kɔ́ɔ pîlanii.
M̀ɛni-ŋûŋ kpîŋ Samia kɔlɔi ŋí káa mɛni mai káa a mɛni kpânaŋ lɛ́lɛɛ nɔ́ yɛ̂ɛ berei m̀ɛni pɔlɔ-ŋai dípɔ̃yɛ̂ɛi Gbanaŋ-kɛɛ Pɔlɔ kɔlɔi gbeli-ŋai sui díkaa lai. Ǹyaa ƃa laa-la kpanaŋ à núu kɛ̀ da yêei Ɣâla mɛni ma maa nuui kɛ́ mɛni kélee ŋ̀aa-see a kɛ̀ ǹyêei a ǹɛ́lɛɛ, ǹyaŋ ǹúui va ŋ̀óli tɔ̀ɔ Ɣâla mai gáa nɔ́ mɛni kpɔ̂lu su a ɣele kélee. M̀ɛnii ŋí ŋáa lɛɛ̂i kpɔ́ a zu ponoɔɔ Ɣâla ŋɔworɛ̂-wooi su è dɛ̀ɛ ŋɔlóno kɛ́-nuui Ilai pɔ́-naai gɔlɔi ŋuŋ 2:30 ǹyɛɛi, “Ŋa pâi ƃâa kɛ̂i diai dîa da ƃâa kɛ̀ ḿâi, dîai da tɔ̀ɔ ḿâi ŋá díkula maa kɛ́.”
Gɔlɔi ŋí a lòno é pîlaŋ ǹii-too pôlu sãŋ ma kɛ̀ gâloŋ-ŋai see mɛni sui. Yâwɛɛ ǹyaa kpîŋ è kɛ̀ a Eezuɛ kaloŋ. Gɛ́ɛ da kpála Ɣâla lá a gɛ́ɛ é kâloŋ tɛɛ dípɔ gɛ́ ƃò dímɛi, Ɣâla ǹyaa kpîŋ è kâloŋ sìɣe é bú dímɛi. Kɛ́lɛ m̀ɛni kpânaŋ lɛ́lɛɛi kɛ̀ naai ǹyaa ƃa gâloŋ kpîŋ da Eezuɛ-ŋai dí kɛ̀ ǹyaa Ɣâla ŋɔwála-walai mu (gɔlɔ-ŋuŋ 2:7-10). Ɣâla ŋɔtɔ̂ŋ-ŋai díkaa a tɔ̃yâ tɔŋ-ŋa núu kélee mɛni ma, tɔɔ-nuu da kôlo-nuu. Ǹyaŋ dɔ̂ŋ-ŋai ŋí ƃé m̀aa nɛ̃ɛ̂i kɛ̀ Eezuɛ-ŋai dí m̀ɛi káa kɛ̀. Ɣâla ŋɔlóno kɛ́-nuu tɔnɔ è kɛ̀ naa, ǹáa ƃé kɛ̀ a Samia. Samia ŋí è kɛ̀ máŋ a Eezuɛ-ŋai láa túɛ-nuu. Samia kɔlɔi ŋí ŋáa kɔlɛɛ̂i gîei feerɛ, maa-ŋuŋ da veerɛi.
Tɔ̃yâ ma gɔlɔi ŋí káa nɔ́ a kɔlɔ tɔnɔ. Kɛ́lɛ dí ŋ̀áa kɔ̀lɛ gîei feerɛ, kpɛni fêi, gáa a kɔlɔ kɛ́tɛ.
Samia kɔlɔi m̀aa-ŋuŋ ŋí ŋáa kɔlɛ̂i gîei saaƃa. Gbua duɛ-tuɛi (1--7) è lòno é pîlaŋ Samia ŋɔfúlu-laai ma da berei è kpɔ̀ŋ la Eezuɛ kɔ-kuluƃa-ŋai dîa díkɛ dí kpɔara-ƃelai yée mɛi ɣâlei.
Kɛ́lɛ tãi Samia è pɔ̀lɔ lai, Eezuɛ-ƃelai dí Yâwɛɛ m̀arê kɛ̀ a gɛ́ɛ é kâloŋ tɛɛ dípɔ yɛ̂ɛ díkɔlɛ ma lɔii ŋuŋ-ŋai a gɛ́ɛ gɛ́ lì a díkɔ-kuluƃa-ŋai kɔ́ ma.
Veerɛi (8:1--15:35) è lòno é pîlaŋ berei ma Samia è wúlɔ pù la Kêsi ǹóŋ Sɔ̂ɔ ŋûa a gɛ́ɛ é kɛ́ a Eezuɛ ŋɔkâloŋ maa-ŋuŋ.
Sɔ̂ɔ da ǹóŋ surɔŋ maa-ŋuŋ Zonetaŋ dí kɔ́ támaa kɔ̀ dí Amɔŋ-ŋai da Felesia-ŋai yée mɛi ɣale. Kɛ́lɛ Sɔ̂ɔ fé m̀ɛnii kélee kɛ́ ní nyíi Yâwɛɛ è mò mai.
Zaaƃa-ɣelei (16:1--31:13) è lòno é pîlaŋ berei ma Samia è wúlɔ pù la Deeƃé ŋûa loôi pere a gɛ́ɛ é lɛ́ɛ Sɔ̂ɔ pɔ́ɔ ŋái. È ŋɔ́nɔ nɛ̀ berei Deeƃé è kɛ̀ la a ǹɔii ŋɔkɔ́-kuluƃa kɛ́tɛi, gɛ́ɛ a Felesia-ŋai díkɔ-kuluƃa kɛ́tɛi Golaya pàa lai. Golaya ŋí è kùla Gâa taa-leei su.
Gɔlɔ kpûai ŋí a nɛ̀ berei Sɔ̂ɔ è tɔ̀ɔ la Deeƃé ma berei máŋ è kɛ̀ la a m̀ɔ̂lɔi. Berei máŋ Sɔ̂ɔ è Deeƃé kpɔ̀ara lai, Sɔ̂ɔ ǹóŋ Zonetaŋ da Deeƃé díkɛ̀ lawoi-laa kpanaŋɔɔ su.
Deeƃé kpɔara perei ŋí Sɔ̂ɔ mìi, è gɛ̀ Deeƃé da ŋɔpôlu-ƃela kpulu-loŋ dí pú dí lí vɛ̃ɛ-kpâlaŋ su dí kɛ́ ƃò naa.
Kɛ́lɛ Sɔ̂ɔ è lɛ̀ɛ kpɔ́ dípôlu dí pú dí lí Felesia-ŋai dí lɔii-kpiniŋ su dí kɛ́ ƃò naa.
Ǹyaŋ mɛni-pɔ̂lɔi dí gɔlɔi ŋí lá tɛ̀ lai ƃa Sɔ̂ɔ da ǹônii-sinaai paa mɛni gɔ́i su dí kɛ̀ gɔi.
M̀ɛni-ŋûŋ-ŋai gɔlɔi ŋí sui
Samia a kɛ́ a mɛni sâa ƃó-nuu Eezuɛ (1:1--7:17)
Sɔ̂ɔ a kɛ́ a kâloŋ Eezuɛ (8:1--10:27)
Sɔ̂ɔ ŋɔkâloŋ-laa koraŋ-ŋai (11:1--15:35)
Deeƃé da Sɔ̂ɔ (16:1--30:31)
Sɔ̂ɔ da ǹônii saa mɛ̂ni (31:1-13)
Currently Selected:
Samia Maa-ŋuŋ Tuɛ mɛni ƃóɔɔ: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia