Lomaŋ 2
2
Ɣâla ŋɔtɔ̃yâ mɛni ŋá-teɛɛi
1M̀ɛni ma, yái íkaa a núu-kpunei, káfalo da kélee fé íyeêi núu da kpɛ́ni ŋɔmɛni ŋá tée mɛni ma, a nɛ̃ɛ ma kpîŋ íkɛ a gbɛ̂ɛ. Yà kɛ̀ núu da kpɛni ŋɔmɛnii ŋa teêi íkaa mɛni lɛɛ̂i íkpîŋ yâ, kpɛ́ni fêi, yái íkaa a mɛni ŋá-tee-nuui íkaa mɛni tɔnɔi tí kɛ̂i. 2Kú gɔ́lɔŋ a gɛ́ɛ Ɣâla ŋɔmɛni ŋá-teɛɛi káa a tɔ̃yâ diai mɛni ma da mɛni-ŋai tí kɛ̂i. 3Gáa íkili ŋá, yái a núu-kpunei, a gɛ́ɛ à kɛ̀ diai da m̀ɛni sîi-ŋai tí kɛ̀i yà dímɛnii ŋá tèe, ǹyaŋ íkɛ m̀aa mɛni-ŋai kɛ̀ ya kpîŋ, íŋuŋ ma a pâi kɛ̂i a m̀óɔɔ Ɣâla ŋɔmɛni ŋá-teɛɛi su? 4Kpaa máŋ ya íŋɛi naɣîŋ ŋɔsɔŋ lɛ̂lɛ-laa su-kɛ́tɛi mɛi, ŋɔmaloŋ-kaai da ŋɔlii-kpelei ma? Ífe gɔ́lɔŋ a gɛ́ɛ Ɣâla ŋɔsɔŋ lɛ̂lɛi su-kulai ƃa é íkɛ í ílii pene? 5Kɛ́lɛ, íwolii kpɔlɔ̂i, ífa ílii pene. M̀ɛni ƃé pâi gɛ̂i ímɛni kula-maai su é kɛ́tɛ a Ɣâla ŋɔtɔ̃yâ mɛni ŋá-tee ɣelei. 6A pâi kɛ̂i tí, kpɛ́ni fêi, a pâi núu kélee fela fêi yɛ̂ɛ berei ŋɔtíi káa lai. 7Diai da mɛni lɛ́lɛɛ kɛ̀ a lii-kpele díkɛ folo-laa kɔ̀ri, ƃaa kɛ́-maa, da wɔ́lɔ-wɔlɔ fulu-laai, Ɣâla a pâi wɔ́lɔ-wɔlɔ fulu-laa tɛɛ̂i dípɔ. 8Kɛ́lɛ, diai da tûa nɔ́ a díkpîŋ nia pere dífa dɔ̃yâi mɛni siɣe a tɔ̃yâ, kɛ́lɛ, díkɛ ŋ̀wana-lɔ̂ɔ mɛni siɣe a tɔ̃yâi, da pâi kɛ̂i Ɣâla a pâi díkula maa kɛ̂i. 9Ǹúui kélee a mɛni nyɔ́mɔɔ kɛ̀i, mɛni kpɔ̂lu a pâi kulâi m̀aa nuui ma é mɛni-soli káa, m̀aa-ŋuŋ ƃa Zûu-nuu da Gurii-nuu máŋ. 10Kɛ́lɛ, folo-laa, ƃaa kɛ́-maa, da lii-sêe káa ǹúui kélee mɛni ma da mɛni lɛ́lɛɛ kɛ̀i, m̀aa-ŋuŋ ƃa Zûu-nuu da Gurii-nuu máŋ, 11kpɛ́ni fêi, Ɣâla káa núu sii kélee mɛni ma.
12Diai kélee dífe Ɣâla ŋɔtɔ̂ŋ kɔ́lɔŋ zɔnyɔ̂ŋ da gɛ̂i da pâi gula maa sɔlɔ ƃôi. Díai dɔ̂ŋ kɔ́lɔŋ da pâi díkula maa kɛ̂i dɔ̂ŋ lá-woo ma. 13Diai da dɔ̂ŋ mɛni kɛ́lɛ dífa sia a ŋ̀óoi dífe a tɔ̃yâ-ƃela Ɣâla ŋɛi, kɛ́lɛ, Ɣâla a pâi dɔ̂ŋ mɛi káa-ƃelai tólîi a tɔ̃yâ-ƃela. 14À kɛ̀ Zɛ̃tai-ŋai, nyíi-ŋai dɔ̂ŋ fe díyêei, da sîa dɔ̂ŋ lá-woo ma dínuu-kpune kɔlɔi su, gɛ̀ ní díkaa a tɔ̂ŋ dia kpîŋ mɛni ma, berei máŋ dɔ̂ŋ fé la díyêei. 15Da nɛ̀ a gɛ́ɛ mɛnii-ŋai dɔ̂ŋ a mòi bɔ̃yɛɛ̂i dílii su. Díkili a sêre-faa kɛ̀ máŋ. Díkili-ŋa-siai a pâi m̀ôi dîa a gɛ́ɛ mɛni da è lɛ̀ɛ dîa, kpaa mɛni da fé lɛ̀ɛ ní dîa 16a m̀aa ɣelei tí, tãi Ɣâla a núu-kpune ŋɔloo-mɛni ŋá tee la Zîsɛ Kôrai sârai, yɛ̂ɛ berei ŋa Duŋ Lɛ́lɛɛi ƃò lai.
Zûu-ŋai da dɔ̂ŋ
17Káta ni kákpîŋ tòli a Zûu-nuu-ŋa. Ka lâai a dɔ̂ŋ ma, kákɛ yoŋka tee a gɛ́ɛ ka Ɣâla ni kákaa kákîe ma. 18Ŋ̀âla-kɔlɔi lónoɔɔ kâa a pâi gɛ̂i ká berei kɔ́lɔŋ Ɣâla a wɛ̂lii a ka tûa la ká tela dɔ̃yâi kɔ́lɔŋ. 19Ílaâi kpɔ́ la yá ƃa ŋ̀ɛi-puu-ƃelai tuɛ-nuu, í ƃo a kwaa-ponoɔɔ diai kélee mɛni ma kpinîi. 20Tãi nɔ́ táre da tɔ̃yâ káa Ɣâla ŋɔtɔ̂ŋ sui, ílaâi la yâ pɔri sɛŋ lɛ̂i ƃoo-ƃela da núu-tɔɔ-ŋa dîa.
21Yâ pɔri sɛŋ lɛ̂i léŋ nûa dîa à kɛ̀ yá kpîŋ ífe wɛ̂lii í sɛŋ maa kɔ́ri? Ya Ɣâla-woo ƃôi nûa a gɛ́ɛ ŋúma fé lɛ́lɛ ní, kɛ́lɛ ya ŋúma kɛ̀? 22Yái ya mò nûa dîa a gɛ́ɛ wulu-wulu kɛ́ɛ fé lɛ́lɛ níi, ya wulu-wulu kɛ̀? Yái ya ɣâla-pɔɔkɔŋ kpɔ̀arai, ya ɣâla-pɔɔkɔŋ ŋuma ŋâla-pɔɔkɔ̂ŋ kɛ́-pɛrɛ-ŋai mu? 23Yái ya yoŋka tèe dɔ̂ŋ sui, ya ƃâa kûla Ɣâla ma a dɔ̂ŋ káraa? 24Bɔ̃yɛɛ̂i Ŋ̀âla-kɔlɔi su, “Ka gɛ́ Ɣâla láa a kara Zɛ̃tai-ŋai sáma.”
25Núu kpɛtɛ mɛ̂ni káa a mɛni lɛ́lɛɛ à kɛ̀ yà dɔ̂ŋ mɛi kàa. Kɛ́lɛ, à kɛ̀ yà dɔ̂ŋ kàra, gɛ̀ ní íkaa yɛ̂ɛ ǹúui dífe gbɛtɛ ní. 26M̀ɛni ma, à kɛ̀ ǹúui dífe gbɛtɛ níi, à dɔ̂ŋ ŋɔtɔ̃yâi mɛi kâa, gɛ̀ ní vé yɛ̂ɛ ǹúui dí gbɛ̀tɛi? 27M̀ɛni ma, diai dífe kpɛtɛ ní kɛ́lɛ, díkɛ dɔ̂ŋ mɛi kaai, da pâi kámɛnii ŋá-têei, káai dɔ̂ŋ kɔ́lɔŋ da núu kpɛtɛ mɛni, kɛ́lɛ, káfa m̀ɛi kâai. 28Gbɛ̂ɛ kpîŋ ƃa Zûu-nuu, ǹúui gbɛ́tɛɛ a tɔ̃yâi? Núu fa kɛ̀ a Zûu-nuu gbonoi pere nɔ́, nyíi ŋɔkpɛtɛ mɛnii káa a ɣéne ŋá mɛnii. 29Kɛ́lɛ Zûu-nuu kpîŋ ƃa ǹúui a dɔ̂ŋ mɛi kâai. Nûu kpɛtɛɛ a tɔ̃yâ káa kpɔ́ a núu líi su-pere mɛni vé a mɛnii a kɛ̀ núu kpono mai. Ɣâla ŋɔmɔ̂leŋ ƃa gɛ nyíŋ é kɛ́. M̀ɛni ma, ka laa-maa-tɛ kɔ́ri Ɣâla yêei kɛ́lɛ núu-kpune fêi.
Currently Selected:
Lomaŋ 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia