Táre-woo-ŋa 31
31
Ǹia-woo-ŋai kâloŋ mɛni mai
1Gâloŋ Lɛmuɛ nyii kùla Masai ǹee wóo-ŋai ká ŋí nyii è nɛ̀ mài.
2“Óo ńoŋ, óo ŋ́goi lôŋ! Ŋákono-tee-loŋ, lé ƃé ŋá m̀ó yâi? 3Ífe íwala-walai kélee pù lɔ-pɔ̂rɔŋ kɛ́ɛ su. Nyíŋi kɛ́ɛ a kâloŋ ŋuŋ lá pìli. 4Óo Lɛmuɛ, vé lɛ́lɛ ni a gɛɛ kâloŋ-ŋa dí kɛ́ nɔ́ ŋwã̂ai kpaa máŋ kpele-sɛŋ kpanaŋ támaa kpèle. 5Dà gɛ̀ tí, da pâi niâi dɔ̂ŋ-ŋai dîa dí gôlo-ƃelai dímɛni-ŋai ŋá tée a nyɔ́mɔɔ. 6Kpele-sɛŋ kpanaŋ tɛɛ diai pɔ́ da saa yêe tɛ̂i, ŋwã̂ai tɛɛ diai pɔ́ mɛni kpɔ̂lu a pâ dípɔi. 7Tɔɔ dí díkpele dí nia díkôlo-laai ma da dímɛni sôli kaai.
8“Lóno diai mɛni ma dífa pɔ̂ri lônoi díkpîŋ mɛni ma, í ƃò a dímɛni lɛ́lɛɛ-ŋai maa-kɔ̃ɔ-nuu. 9Lóno dímɛni ma í ƃò a dítɔ̃yâ mɛni saa-ƃo-nuu. Gôlo-ƃelai dímɛni lɛ́lɛɛ-ŋai maa kɔ̃ɔ da diai pɔ̂ri maa fé dîɛi.”
Nɛnî sɔŋ lɛ́lɛɛ
10Gbɛ̂ɛ ƃa pɔ̂ri nɛnî sɔŋ lɛ́lɛɛi kâai? Ǹɛnîi tí sɔ̃ɔ kɛ̂tɛi é tɛ́ɛ kɔni sɔ̃ɔ kpanaŋɔɔ ma.
11Ŋɔsurɔ̂ŋ a gíli tɔ̀ɔ ma, ǹyaŋ va kôlo.
12Ǹɛnîi ŋí a kɛ̂ nɔ́ mɛni lɛ́lɛɛ kɛ̂i ŋɔfúlu-laai su ŋɔsurɔ̂ŋ mɛni ma. Va mɛni nyɔ́mɔɔ kɛ̀ la.
13A ƃála-leɣa kɔ̀ri da yee, gɛ́ tíi kɛ̀ a ǹyée a lii-nɛ̃ɛ pere.
14Gáa yɛ̂ɛ pɔni-tɔɔ-ƃela díya-ŋa-keleŋ a pà a mii-sɛŋ nyii a kûla kwaa kôya mai.
15A mu sìɣe gbínii su gɛ́ mii-sɛŋ kpɛ̀tɛ ŋɔnûai mɛni ma, gɛ́ ǹyée mu-nɛyãai dítii-ŋai lɛ̀ dîa.
16À lɔii maa kpɛ̂ɛ é ǹyá. A kpɔmɔ-ƃa kpalaŋ kɛ̀ a zɛŋ-kaoi è zɔlɔ ƃô ŋɔpɔni-tɔɔi sui.
17Gáa a tíi kpanaŋ kɛ́-nuu.
18A gàa berei ŋɔpɔni-tɔɔ-tii a pâ la a gênii. A tíi kɛ̀ a gbanaŋɔɔ é lɛ́ɛ la zu gbínii é lí zâmai.
19A gbɔ́ɔi yee pɔ̃lɔ, gɛ́ bàla.
20Ǹyée foaŋɔ̂ɔi ma gôlo-ƃelai mɛni ma gɛ́ diai sàma sɛŋ fé díyêei.
21Va yâo kɔ́lɛ ma ŋɔpɛ́rɛi-mu-ƃelai mɛni ma. Kpɛ́ni fêi, kɔ́lɛ-sêɣe káa ǹyêei ŋɔnûai kélee mɛni ma.
22A gbìŋ ŋá-seɣe pàla gbîŋ mɛni ma. Ŋɔseɣei káa a seɣe kpɔ̂lu mu teɣiɛɛ nenɛ-fɛfɛ.
23Da ŋɔsurɔ̂ŋ kɔ̂lɔŋ goyâŋ su, ƃɛ́i da ǹɔii-ƃelai túɛ-ƃelai da sêe naai.
24A seɣe pâla da bɛ̂ti gɛ́ gɔ̀lɛ bɔni-tɔɔ-ƃelai dîa.
25Dɔɔ̂i lɛ̂lɛɛi ƃaa-kɛ-maa kɛ́ ƃò mà, va yâo tínaa tuɛ-pere mɛni ma.
26A lôno a táre-pere gɛ́ nûa lia-woo ƃò a ƃaa kɛ́-maa-pere.
27A ŋɔpɛ́rɛi mu mɛni-ŋai ŋ̀aa-see kɛ̀. Vé nyɛ̃-nyɛŋ ní.
28Ŋɔnîa-pɛlɛɛi da ǹáa-maa tɛ̀, ŋɔsurɔ̂ŋ kɛ́ ƃaa-kɛ-maa tɛ̀ɛ bɔ́ ǹyɛɛi,
29“Nɛnî sɔŋ lɛ́lɛɛ támaa káa naa, kɛ́lɛ ítɛɛ̂i díkelee dîa.”
30Nɛnî lóno-woo lɛ́lɛɛ ǹá a núu pɛ̀lɛ. Núu ŋɔlɛ́lɛ-laa kɛ́ pù, kɛ́lɛ nɛnî nyii a yâo Ɣâla Yâwɛɛ mai, nûa da ǹáa-maa tɛ̀.
31Ǹɛ̂lɛɛi í ƃaa-kɛ-maa tɛ́ɛ bɔ́ ŋɔtíi lɛ́lɛɛi mɛni ma. Ǹɛ̂lɛɛi ǹúui kélee dí ǹáa maa tɛ́ panaŋ ma.
Currently Selected:
Táre-woo-ŋa 31: KWB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2012 Bible Society in Liberia