Zasua 19
19
Ǹɔii dí dɛ̀ɛ Simiɔŋ ŋɔsuui su-ƃelai pɔi
1Ǹúu suui veerɛi Zasua è lɔii tɛ̂ɛ bɔ́i ƃé kɛ̀ a Simiɔŋ ŋɔsuui. Simiɔŋ da Zuda dílɔii è kɛ̀ a búɔɔ gîei. 2Simiɔŋ ŋɔtaa-ŋai ƃé kɛ̀ a: Bɛɛsiba, Seƃa, Molada, 3Aza-sua, Beela, Iizeŋ, 4Ɛɛtola, Bɛtu, Oma, 5Zikila, Bɛ-maikabo, Aza-susa, 6Bɛ-lebao da Sarueŋ. Da-ŋai ŋí díkɛ̀ a taa-lêe puu káo saaƃa da díkpanâŋ-ŋai.
7Simiɔŋ ŋɔtaa-lêei da-ŋa ƃé kɛ̀ a Aiŋ, Limɔŋ, Etɛ da Asaŋ-taa-lee é pɛ́lɛ dí díkpanâŋ-ŋai dîa. 8Daa lêe-ŋai ŋí da maa kpânaŋ-ŋai kélee káa ǹɔii ŋí ma é lɛ́ɛ la zu é seri Beela Biɛ taai ma nyíi gáa ǹɔii kwára perei. (Beela-biɛ taai láa kpéli ƃa Lama.) Ǹɔii ŋí ƃé dí dɛ̀ɛ Simiɔŋ ŋɔsuui su-ƃelai pɔ́ yɛ̂ɛ berei dísuui è kɛ̀ lai. 9Dí Zuda ŋɔlɔii da tɛ̀ɛ Simiɔŋ ŋɔsuui su-ƃelai pɔ́, kpɛ́ni fêi, Zuda lɔii è kɛ̀ a gɛ́tɛ é tɛ́ɛ ŋɔsuui su-ƃelai dîa.
Ǹɔii dí dɛ̀ɛ Zɛbulɔŋ ŋɔsuui su-ƃelai pɔi
10Ǹúu suui zaaƃai dí lɔii tɛ̂ɛ zu-ƃelai pɔ́i ƃé kɛ̀ a Zɛbulɔŋ. Dí ǹɔii ŋí tɛ̀ɛ dípɔ yɛ̂ɛ berei dísuui è kɛ̀ lai. Dílɔii è seri Sari taai ma. 11Goyaŋ perei è kùla Sari é lí vóloi liî-pere Mariɛ taai ma é pîlaŋ Dabesɛ taai ma. Goyaŋ perei ŋí è kùla naa é lí ǹyá-loŋ ma Zonia vóloi kulâi-perei. 12Goyaŋ perei è kùla ŋɔ́nɔ Sari taai ma é lí vóloi kulâi-pere é síɣe Kure-tabɔ taa-leei kóyaŋ ma. Goyaŋ perei è kùla naa é lí Dabɛra taai ma, é tɛ́ɛ naa é lí Zafia. 13È kùla naa é tɛ́ɛ vóloi kulâi-pere é lí Gaifɛ taai su, é tóo Ɛdeziŋ é tɛ́ɛ naa é tóo Limɔŋ, é tínaŋ Nea taa-leei ma pere. 14Gɛ̀ ní goyaŋ perei è tɛ̀ a ǹɔii é tínaŋ é lí Anatɔ̃ŋ taa-leei ma, é kóyaŋ Ifitaɛɛ Potoi ma. 15Daa-ŋai ǹɔii ŋí mai da-ŋa ƃa Kata, Naala, Siŋrɔŋ, Idala da Bɛpeleɣɛ̃ɛ. Díkɛ̀ a taa-lêe puu káo feerɛ da díkpanâŋ-ŋai. 16Ǹɔii ká ŋí dí dɛ̀ɛ Zɛbulɔŋ ŋɔsuui su-ƃelai pɔ́ da ǹaa taa lee-ŋai é pɛ́lɛ díkpanâŋ-ŋai dîa kɛ̀ naai yɛ̂ɛ berei dísuui è kɛ̀ lai.
Ǹɔii dí dɛ̀ɛ Isaka ŋɔsuui su-ƃelai pɔi
17Ǹúu suui ǹáaŋ ɣelei dí lɔii tɛ̂ɛ zu-ƃelai pɔ́i ƃé kɛ̀ a Isaka ŋ̀ɔ-ŋai. Dí dɛ̀ɛ dípɔ yɛ̂ɛ berei dísuui è kɛ̀ lai. 18Daa-ŋai kɛ̀ naai ƃa: Zariɛɛ, Sesulo, Suneŋ, 19Afaraiŋ, Siyiɔŋ, Aneara, 20Lebi, Kesiɔŋ, Ibezi, 21Lemɛ, Eŋ-ganiŋ, Eŋ-ada da Bɛ-paze. 22Dílɔii ŋɔgoyaŋ perei è sèri máŋ Tabɔ taa-leei ma, Saazuma da Bɛ-semɛɛ taa-leei. Goyaŋ perei è kòyaŋ Zɔdiŋ Ya-leei ma. Taa-lêe puu káo lɔ́ɔlu mɛi-da ƃé kɛ̀ naa da díkpanâŋ-ŋai. 23Dí ǹɔii ŋí tɛ̀ɛ Isaka ŋɔsuui su-ƃelai pɔ́ yɛ̂ɛ berei dísuui è kɛ̀ lai.
Ǹɔii dí dɛ̀ɛ Asa ŋɔsuui pɔi
24Ǹúu suui ǹɔ́ɔlu ɣelei dí lɔii tɛ̂ɛ zu-ƃelai pɔ́i ƃé kɛ̀ a Asɛ. 25Dítaa-ŋai ƃé kɛ̀ a: Ɛɛka, Ali, Beteŋ, Asa, 26Elaŋmelɛ, Ema da Misaa. Vóloi liî-pere goyaŋ perei è kòyaŋ Kamɛɛ Yeei ma da Siɔɔ-lina Ya-loŋ. 27Goyaŋ perei è tìnaŋ é lí vóloi kulâi-pere é lí Bɛ-dagɔŋ taai ma é pîlaŋ Zɛbulɔŋ lɔii ma da Ifitaɛɛ Potoi ǹɔii ŋûa pere, é tóo Bɛ-iɛmɛ da Nɛiɛɛ taai ma. È sìɣe naa tɛ́ ǹɔii ŋûa pere é sèri Kabɔ, 28Iburɔŋ, Leo, Amɔŋ, Kana, é lɛ́ɛ la zu é seri Sidɔŋ taai ma. 29Goyaŋ perei ŋí è tìnaŋ é lí Lama, é tɛ́ɛ naa é seri Taya taa-leei ma. Goyaŋ perei ŋí è tìnaŋ ŋɔ́nɔ naa é lí Osãŋ taai su, é kóyaŋ Mɛditɛrenia Yuoi ma. Asa lɔii su taa-ŋai da-ŋa ƃé kɛ̀ a: Maala, Aizi, 30Uma, Afɛ da Leo. Taa-lêe buu feerɛ káo feerɛ ƃé kɛ̀ naa da díkpanâŋ-ŋai. 31Ǹɔii ká ŋí zu taa lee-ŋai da gbanâŋ-ŋai dí dɛ̀ɛ Asɛ suui su-ƃelai pɔi. Dí dɛ̀ɛ dípɔ yɛ̂ɛ berei dísuui è kɛ̀ lai.
Ǹɔii ká ŋí dí dɛ̀ɛ Nɛfɛtɛli ŋɔsuui su-ƃelai pɔi
32Ǹúu suui ǹɔ́ɔlu mɛi da ɣelei dí lɔii tɛ̂ɛ zu-ƃelai pɔ́i ƃé kɛ̀ a Nɛfɛtɛli. Dí ǹɔii tɛ̂ɛ dípɔ yɛ̂ɛ berei dísuui è kɛ̀ lai. 33Ǹɔii ŋí ŋûa pere goyaŋ perei è kùla Ɛlɛ é tóo Za-ananiŋ wuru kɛ́tɛi ma, Adami-neke da Zanee taai, é seri Lakuŋ. Ǹɔii ŋí kóyaŋ ƃé kɛ̀ a Zɔdiŋ Ya-leei. 34Goyaŋ perei è ŋɔ́nɔ kùla naa é lí vóloi liî-pere é seri Anɔtaƃɔ, é tɛ́ɛ naa é pîlaŋ Ukɔ taai ma, é yéŋ é pîlaŋ Zɛbulɔŋ lɔii ma, é pîlaŋ Asɛ lɔii ma vóloi liî-pere, é lí Zɔdiŋ Ya-leei ma vóloi kulâi-pere. 35Daa-ŋai siɣãŋ è kɛ̀ a dínaŋɔɔ dîa Nɛfɛtɛli ŋɔlɔii ŋí sui ƃa Zidiŋ, Zeɛɛ, Ama, Leka, Kinere, 36Adama, Lama, Azɔ, 37Kedɛ, Eŋ-dure-i, Eŋ-azɔ, 38Yirɔŋ, Migida-eɛ, Ore, Bɛ-ana da Bɛɛsimɛ. Taa-lêe puu káo lɔ́ɔlu mɛi náaŋ ƃé kɛ̀ naa da díkpanâŋ-ŋai. 39Ǹɔii ká ŋí da zu taa lee-ŋai da díkpanâŋ-ŋai dí dɛ̀ɛ Nɛfɛtɛli suui su-ƃelai pɔ́i. Dí dɛ̀ɛ dípɔ yɛ̂ɛ berei dísuui è kɛ̀ lai.
Ǹɔii ká ŋí dí dɛ̀ɛ Daŋ ŋɔsuui su-ƃelai pɔi
40Ǹúu suui ǹɔ́ɔlu mɛi feerɛ ɣelei dí lɔii tɛ̂ɛ zu-ƃelai pɔ́i ƃé kɛ̀ a Daŋ ŋɔsuui su-ƃelai. Dí dɛ̀ɛ dípɔ yɛ̂ɛ berei dísuui è kɛ̀ lai. 41Dítaa-ŋai ƃé kɛ̀ a: Zora, Ɛssit-o, I-semɛ, 42Sa-alabiŋ, Aizalɔŋ, Iila, 43Ɛlɔŋ, Tiŋna, Ɛkulɔŋ, 44Ɛtekɛ, Giƃetɔ̃ŋ, Beela, 45Zeu, Bene-bera, Gaa-rimɔŋ, 46Me-zakɔ̃ŋ da Lekɔ̃ŋ é tóo Zâpa-taai kɔlɛ ma. 47Gɛ́ɛ ǹûai ŋí ni dífe pɔri ní ǹɔii ŋí kúla yêei kɛ̂i, dí lì dí kɔ́ tóo Lesɛŋ taa-lee ma dí ǹaa-ƃela kélee páa. Nya ƃe dí dínâŋ pɔlɔi Daŋ láa sèe Lesɛŋ taai ma. 48Ǹɔii ká ŋí zu taa-ŋai da díkpanâŋ-ŋai dí dɛ̀ɛ Daŋ ŋɔsuui su-ƃelai pɔi. Dí dɛ̀ɛ dípɔ yɛ̂ɛ berei dísuui è kɛ̀ lai.
Zasua ŋɔlɔii ká ŋí Eezuɛ-ŋai dí dɛ̀ɛ bɔ́i
49Zasua-ni kɛ́ɛ da kpɛɛ a ǹɔii ŋáa kɔlɛɛi, Eezuɛ-ŋai dí ŋɔlɔii tɛ̂ɛ bɔ́. 50Yâwɛɛ è mò Eezuɛ-ŋai dîa a gɛ́ɛ dí daai tɛ́ɛ Zasua pɔ́ nyíi a ŋ̀wɛ̂lii. M̀ɛni ma dí Tina-sera taa-leei tɛ̂ɛ bɔ́ nyíi kɛ̀ ǹyée lɔii su Ifiraŋ lɔii mai. Nya ƃe è daai tɔ̂ɔ pôlu é sée naa.
51Ǹɔii ká ŋí zâla láa soŋ-nuui Elieza, Nuŋ ǹóŋ Zasua da Eezuɛ láa túɛ-ƃelai dí ŋ̀áa kɔ̀lɛ Eezuɛ-ŋai diai. Dí díŋaa tɛ̀ ma Silo taai su, dí ǹɔii ŋí ŋáa kɔ́lɛ a kpɛɛŋ tóɔɔ. Dí gbɛɛŋ ŋí tòo Yâwɛɛ ŋɔsua kɔ̂lɔ pɛrɛi ŋɛ́i túɛ. Ǹyaŋ ǹɔii ŋáa kɔlɛ pêre ká kɛ̀ tí dîɛ.
Currently Selected:
Zasua 19: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
