Zasua 18
18
Zasua è ǹɔii gbéli ŋáa kɔ̀lɛ
1Eezuɛ-ŋai kɛ́ɛ da ǹɔii kélee síɣei, dí díŋaa tɛ̀ ma Silo taa-leei su dí Yâwɛɛ ŋɔsua kɔ̂lɔ seɣe pɛrɛi pîlaŋ naa. 2Eezuɛ suu lɔ́ɔlu mɛi feerɛ ƃé lɛ̀ɛ nyíi Zasua fé niî kɛ̀ lɔii tɛɛ ní dípɔi. 3Nya ƃe Zasua è Eezuɛ-ŋai marê kɛ̀ ǹyɛɛ dîai, “Lé ƃé ka gɛ̂i káfe liî ká ǹɔii síɣe nyíi Yâwɛɛ kánâŋ-ni Díɣâlai a dɛ̀ɛ kápɔi? 4Ka kpakolo saaƃa-saaƃa kula kásuui su tɛi-tɛi ká dítɛɛ ḿbɔ. Ŋa pâi dítɛɛ̂i a gɛ́ɛ dí ǹɔii maa kpɛ́ɛ dí ǹaa mɛni-ŋai pɔ̃yɛ dí pá pôlu a maa koraŋ-ƃoi ḿbɔ ƃɛ́i da ŋ̀wɛ̂lii kámɛni mai ŋá gɔ́lɔŋ. 5Da pâi ǹɔii ŋáa kɔ̂lɛi gîei lɔ́ɔlu mɛi feerɛ, Zuda ŋɔsuui su-ƃelai dílɛɛ ǹɔii kwára pere, Zosɛ ŋ̀ɔ-ŋai dílɛɛ ǹɔii ŋûa-pere. 6Ka pâi ǹɔii kpua-kpua lɔ́ɔlu mɛi feerɛi kɛ́-pere pɔ̃yɛ̂i kɔlɔ ma ká pá la ḿbɔ. Gɛ̀ ní ŋa pâi kpɛɛŋ toôi káɣâlai Yâwɛɛ ŋɛ́i ŋá gɔ́lɔŋ ƃɛ́i a ǹaa wɛ̂lii kámɛni mai. 7Fé ǹɔii da tɛ̀ɛ ní Liiva-ŋai pɔ́, kpɛ́ni fêi, Yâwɛɛ ŋɔsâla láa soŋ tii ƃa díwɔ̂ pɔɔ-sɛŋ. Gâa, Lubiŋ da Manasɛ suui su-ƃelai gbéli-ŋai dí díwɔ̂i sɔlɔ ƃô Mose, Yâwɛɛ yée mu-nuui yêei Zɔdiŋ Ya-leei kɔlɛ vóloi kulâi-pere.”
8Gbakolo-ŋai ŋí kɛ́ɛ da dímu sìɣe a gɛ́ɛ dí líi, Zasua è mò dîa ǹyɛɛi, “Ka lí ká sía ǹɔii su ká gɛ́ pere pɔ̃yɛ kɔlɔ ma ká pá la ḿbɔ. Gɛ̀ ní ŋa pâi kpɛɛŋ toôi Silo ƃɛ́ Yâwɛɛ ŋɛ́i.” 9Nya ƃe gbalolo-ŋai dí lì dí sía ǹɔii kpîniŋ su. Dí ǹɔii kɛ́-pere mɛni da ǹaa taa-ŋai kélee láa pɔ̃yɛ kɔlɔ ma, dí ŋáa kɔ́lɛ gîei lɔ́ɔlu mɛi feerɛ. Gɛ́ɛ tí, dí pà pôlu Zasua pɔ́ m̀ûui su Silo a m̀aa koraŋ-ƃoi. 10Nya ƃe Zasua è kpɛɛŋ tôo naa Yâwɛɛ ŋɛ́i é ǹɔii ŋáa kɔ́lɛ naa Eezuɛ-ŋai dîa.
Zasua è lɔii tɛ̂ɛ Bɛŋsima ŋɔsuui su-ƃelai pɔ́
11Ǹúu suui maa-ŋuŋ Zasua è ǹɔii tɛ̂ɛ bɔ́i ƃé kɛ̀ a Bɛŋsima ŋɔsuui su-ƃelai. Dí lɔii è kɛ̀ Zuda da Zosɛ dísuui su-ƃelai dílɔii loai. 12Dílɔii ŋûa-pere goyaŋ perei kɔ́ɔ è pìlaŋ Zɔdiŋ Ya-leei ma é kúla naa é lí Zɛleko. È kùla naa é lí ǹyée lɔii su vóloi liî-pere é tɛ́ɛ naa é kóyaŋ Bɛaveŋ fɛ̃ɛ-kpâlaŋ ma. 13Goyaŋ perei ŋí è ŋɔ́nɔ kùla naa é tɛ́ɛ é yéŋ Lu taa-leei kwára pere. (Lu taa-leei láa da ƃa Bɛtɛ.) Gɛ̀ ní goyaŋ perei è kùla naa é yéŋ Atarɔ Ada. Ataro Ada káa ǹyéei ma Bɛorɔŋ kwára pere. 14Goyaŋ perei ŋí è tìnaŋ é kúla ǹyéei kwára pere é tɛ́ɛ naa é kóyaŋ Kiria-aba taa-leei ma nyíi da dòli máŋ a Kiria-Zeriŋ. Daa-lêei ŋí káa a Zuda ŋɔsuui su-ƃelai pɔ́ɔ nyíi kɛ̀ a vóloi liî-pere goyaŋ pere kóyaŋ. 15Ǹɔii kwára pere goyaŋ perei kɔ́ɔ è pìlaŋ Kiria-Zeriŋ taa-leei kɔlɛ. Goyaŋ perei ŋí è kùla naa é lí Efurɔŋ taa-leei ma, é kúla naa é lí Nɛtoa Ya-toŋ ma. 16È ŋɔ́nɔ kùla naa é yéŋ ǹyéei kóyaŋ ma Inɔŋ Potoi mɛi, nyíi gáa a Liifaŋ Potoi ŋɔgoyaŋ perei. È ŋɔ́nɔ yèŋ Inɔ̃ŋ Potoi su é tɛ́ɛ naa é lí Zerusâlɛŋ taa-leei kwára gɛ̀ yèŋ Erogee Yai ma. 17Goyaŋ perei ŋí è tìnaŋ é tɛ́ Ɛsimɛɛ Yai ŋûa pere, é tɛ́ɛ naa é lí Gelilo nyíi gáa Adumiŋ Yeei téniŋ mai. Goyaŋ perei è yèŋ Lubiŋ ǹóŋ Boaŋ ŋɔkɔnii ma. 18È ŋɔ́nɔ kùla naa é tɛ́ Bɛ-araba ŋûa pere é yéŋ Araba Tiŋ-tiŋ su. 19Gɛ̀ ní goyaŋ perei è tɛ̀ɛ naa é tɛ́ Bɛola taai ŋûa pere. Ǹɔii ŋûa pere goyaŋ perei è làa a Ǹyúo Saai kóo, ǹɔii kwára pere goyaŋ perei kɛ́ ƃò a Zɔdiŋ Ya-leei pîlanii. 20Vóloi kulâi-pere goyaŋ perei ƃé kɛ̀ a Zɔdiŋ Ya-leei. Ǹɔii ŋí ƃé lɛ̀ɛ Bɛŋsima ŋɔsuui su-ƃelai yêei yɛ̂ɛ berei dísuui è kɛ̀ lai.
21Daa lêe-ŋai kɛ̀ ǹɔii ŋí ma dí dɛ̀ɛ Bɛŋsima ŋɔsuui su-ƃelai pɔi, dîa ƃa: Zɛleko, Bɛ-ogila, Imɛkezi, 22Bɛ-araba, Zemaraiŋ, Bɛtɛ, 23Aviŋ, Para, Ofura, 24Kefa-famɔni, Ofini da Geƃa. Gélee káa a taa-lêe puu káo feerɛ da díkpanâŋ ŋai. 25Daa-lêe-ŋai ŋí díkɛ̀ Bɛŋsima ŋɔsuui su-ƃelai dílɔii ma: Giƃiyɔŋ, Lama, Bɛ-ɛro, 26Mipɛ, Sifira, Moza, 27Lekɛŋ, Iripee, Tarala, 28Zela, Aielɛ, Zabusi (zu-kulâi ƃa Zerusâlɛŋ) Giƃe-a da Kiria-Zeriŋ. Gélee káa a taa-lêe puu káo náaŋ da díkpanâŋ-ŋai. Ǹɔii ŋí ƃé dí dɛ̀ɛ Bɛŋsima ŋɔsuui su-ƃelai pɔi.
Currently Selected:
Zasua 18: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
