M̀ɛni-sâa Ƃó-ƃelai 21
21
Dí nɛyâa kɔ̀ri Bɛŋsima suui sinaai mɛni ma
1Eezuɛ nuu suu puu káo tɔnɔi dí lɛ́ɛ pâi kɔ́ pɛlɛ̂i Bɛŋsima suui su-ƃelai dîa, dí kɔ̀yɛŋ Misipa taa leei su. Dí dífòo Ɣâla ŋɛ́i túɛ gɔyɛ̂ŋ tí su dîyɛɛi, “Kúta fé pâi ǹônii-nɛyãai da tɛɛ̂i Bɛŋsima suui su nuui da pɔ́ a ŋɔnɛnî.” 2Gɔ́i kpɛɛ́ pôlu ma, dí ŋɔ́nɔ díŋaa tɛ̀ ma Bɛtɛ taai su, ƃɛ́i da kâa Ɣâla fɛ̀li ǹaai. Dí sèe naa Ɣâla ŋɛ́i túɛ a malôŋ-pere, dí wɔ́lɔ kpɔ́ a ŋ̀ánaa é lɛ́ɛ la zu ɣele wûlii é seri. Dí Ɣâla fɛ̀li dîyɛɛ m̀ai, 3“Yâwɛɛ, yá ƃa Eezuɛ-ŋai kélee Díɣâlai. Bɛŋsima nuu suui káa a kúta. Ŋ̀uŋ lá a kɛ́ pilîi. Ƃa ǹɛɛ̂i naa é kɛ́ tí lé mɛni ma?”
4Bôlu ma ɣele walai, dí kɔni sîɣe dí yeŋkêŋ tɔɔ la naa Ɣâla mi. Dí lawoi-laa da kéreŋ sala kùla naa. Dí nyíŋi kɛ̀ a gɛ́ɛ dí Ɣâla líi láa é lûwa láa dîa. 5Dí marê kɛ̂ɛ kɛ̀ dîyɛɛi, “Eezuɛ nuu suui nenɛ̂ ƃé vé kúsama ƃɛ́ Misipa Yâwɛɛ ŋɛ́i túɛi?” Dí m̀arê kɛ̂ɛi ŋí kɛ̀, kpɛ́ni fêi, dí dífòo Ɣâla ŋɛ́i túɛ a gɛ́ɛ da kùla gɔ́i su díkelee dí díŋaa tɛ́ ma Misipa. Kɛ́lɛ núu nyíi vé pâi kɛ̂i naai, da pâi maa núui paâi. 6Bɛŋsima nuu suui malôŋ è tòo Eezuɛ-ƃelai kpéle-ŋai dîa a ŋ̀ánaa. Dí mò dîyɛɛi, “Eezuɛ ŋɔnúu suui dɔnɔ aâ sâa kula ma. 7Kú kúfòo Yâwɛɛ ŋɛ́i túɛ a gɛ́ɛ kúfe pâi kúlônii-nɛyãai da tɛɛ̂i dípɔ a dínɛyâa. Kwa pâi nɛyâa kulâi mí kú dɛɛ zinâai pɔ́ lɛ̀ɛ Bɛŋsima suui su gɔ́i pôlu mai?” 8Eezuɛ-ƃelai kélee kɛ́ɛ da dí díŋaa tɛ̀ ma dí marê kɛ̂ɛ kɛ́ a gɛ́ɛ dí gɔ́lɔŋ Eezuɛ nuu suui nenɛ̂ ƃé vé pá ní gɔyɛŋ su Yâwɛɛ ŋɛ́i túɛ Misipâi. Dí gàa a gɛ́ɛ Zabɛ taai ƃe, nyii kɛ̀ Gilia lɔii kpiniŋ sui. 9Díkɛɛ Eezuɛ kɔ-kuluƃa-ŋai láa tôlii, dí gàa a gɛ́ɛ Zaƃɛ taai su-ƃelai da fé kɛ́ ní naa. 10-11Nya ƃe gɔyɛ̂ŋ su-ƃelai dí kɔ-kuluƃa wála puu káo feerɛ (12,000) tɛ̀ɛ Zaƃɛ taai su, Gilia lɔii kpiniŋ su. Dí mò dîa dîyɛɛi, “Ká lí ká kɔ́ pɛ́lɛ Zaƃɛ taa leei ma Gilia lɔii kpiniŋ su. Ka ǹaa sinaai da nɛyâai kélee páa é pɛ́lɛ ǹía pɛ̀lɛi dîa. Kɛ́lɛ káfe nɛnî-kpela da pàa.” 12Dí nɛnî-kpela ŋuŋ náaŋ (400) kàa Zaƃɛ taa leei su. Dí pà a dia m̀ûui su, Silo taai su, Keena lɔii kpiniŋ su.
13Eezuɛ-ŋai dí ƃɛlɛ tôli ƃò a Bɛŋsima suui su-ƃelai kɛ̀ Limɔŋ Kɔnii mai a gɛ́ɛ da dîa ni dí lawoi-laa mɛni kpɛtɛ díkîe ni loai. 14Tãi Bɛŋsima suui su-ƃelai dí pà la dítoli wooi mai, Dí Zaƃɛ nɛni-kpela-ŋai tɛ̀ɛ dípɔ a dínɛyâa. Kɛ́lɛ ǹɛyâai ŋí dífe kɛ́ ní a dígula kɛ̂ɛ ƃóɔɔ.
15Dímalôŋ è tòo Eezuɛ suui su-ƃelai kpéli-ŋai dîa, kpɛ́ni fêi, ǹawoi-laai kɛ̀ díloai, Yâwɛɛ è gɛ̀ yóo-yoo é tóo zu. 16Nya ƃe Eezuɛ lɔii láa túɛ-ƃelai dí mò dîyɛɛi, “Bɛŋsima suui su nɛyãai kélee da saa. Kwa pâi nɛyâa kulâi mí kú dɛɛ zinâai pɔ́ lɛɛi? 17À kɛ̀ nɛyâa fé naa zinâai ŋí mɛ̂ni ma, dífe pâi nîa-pɛlɛɛ maa sɔlɔ ƃôi. À kɛ̀ tí, gɛ̀ ní ǹúu suui ŋí a pâi kpɛɛ̂i. Fɛ̂ɛ kú pere kɔ́ri a gɛ́ɛ é lɛ́ɛ ɣele ma. 18Kɛ́lɛ kú kúfòo Ɣâla ŋɛ́i túɛ a gɛ́ɛ kúfe pâi kúlônii nɛyãai da tɛɛ̂i díta pɔ́ a nɛnî. Kwa gɛ̀ tí, gɛ̀ ní náɣaŋ a pâi kɛ̂i kûa.”
19Kɛ́lɛ dí mò dîyɛɛi, “Da kúu kɛ́tɛ kɛ̀ Silo taai su Yâwɛɛ ma a kóraŋ kélee. Gúui ŋí ŋ̀ele a kɛ́ lɛɣɛ̂i.” Silo káa Bɛtɛ taa leei ŋûa-pere, Lɛƃanɔŋ lɔii kwára-pere, gɛ́ ƃò bere lêei ma Bɛtɛ da Sɛkɛŋ taa lee-ŋai loai vóloi kulâi-pere. 20Eezuɛ láa túɛ-ƃelai dí mò Bɛŋsima suui su sinaai dîa dîyɛɛi, “Ƃɛ́i ǹɛnî-kpela-ŋai da pâi kɛ̂i mãlai naa gúui ŋí sui, gbɔmɔ-ƃa kpalaŋ káa naa. Ka lí naa ká ka lóo, 21ká kɛ́ naa maa kpɛ̂ɛ. Silo nɛni-kpela-ŋai da pà díkɛ mãla, ka kúla a kîrɛ, ká dí soŋ. Ka dísòŋ, ka lí a dîa Bɛŋsima lɔii kpiniŋ su, ká díkɛ a kánɛyâa. 22À kɛ̀ dínâŋ-ni kpaa máŋ dísaaƃɔlɔ-ni da dílii ŋ̀wana kâa, dí m̀ó kûa, kwa pâi môi dîa kûɛi, ‘Ká kpera kâa, ka ǹɛɛ naa dí lɛ́ɛ díyêei, kpɛ́ni fêi, gɔ́i kpɛ́ɛi kúfe nɛyâa sɔlɔ ƃó ní dímɛni ma. Voo wôoi kú gɛ̀ Ɣâla ŋɛ́i túɛ é pîlaŋ Bɛŋsima nuu suui mai, vé pâi kásoniî, kpɛ́ni fêi, káa fé kálônii-nɛyãai tɛɛ ní dípɔ a nɛyâa.’ ”
23Bɛŋsima suui su-sinaai dí m̀ɛnii kɛ̀ yɛ̂ɛ berei ǹúu láa túɛ-ƃelai dí mò la dîai. Ǹɛyâai kɛ́ɛ mãlai, dí pìli dísama dí dɛi-tɛi sóŋ zu a tɛ̀ɛ-ŋa. Dí lì a dia dípɔ-taai dí díkɛ a dínɛyâa. Dí dítaa-ŋai tɔ̀ɔ pôlu dí sée naa. 24M̀ɛnii ŋí kɛ́ɛ kɛ̂i, Eezuɛ-ƃelai kpéli-ŋai dí lène pôlu dí lí dípɔ-taai a tɛɛ-ŋa.
25M̀aa ɣele-ŋai tí su, kâloŋ fé kɛ́ ní Eezuɛ lɔii mɛi. Ǹûai kélee díkɛ̀ nɔ́ tûai a dínîa pere.
Currently Selected:
M̀ɛni-sâa Ƃó-ƃelai 21: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
