M̀ɛni-sâa Ƃó-ƃelai 16

Saŋsiŋ è lì Geza kpiniŋ su

1Ɣele tɔ̂nɔ da, Saŋsiŋ kɛ́ɛ Geza kpiniŋ sui, è wɛ́li soŋ naa wulu-wulu kɛ́ nɛni da ma. È lì a gɛ́ɛ da ǹyaa dí nyíi. 2Saŋsiŋ kɛ́ɛ ǹɛnîi ŋɔpɛ́rɛi mui, Geza-ƃelai dí gɔ̀lɔŋ. Dí gbɛ̀tɛ a gɛ́ɛ dí báa a ɣele wâla pɛ-pɛ. Nya ƃe daa lêe su sinaai dí lì dí tínaŋ bɛ́rɛi ma Saŋsiŋ è kɛ̀ mui. Dí ŋɔ́nɔ ǹúui da-ŋa sèe daa lêei ŋɔgalai lá m̀éla veerɛ ma, díkɛ Saŋsiŋ maa kpɛ̂ŋ. 3Kɛ́lɛ Saŋsiŋ è mù sìɣe a kpíni sáma, é lí daa lêei ŋɔgalai lá. È daa lêei ŋɔgalai gbôŋ da zoŋ-sãai kélee kùla é ǹáa garâŋ ŋá é tɛ́ la ǹyéei ma kɛ̀ Iburɔŋ taa leei mɛi.

Dilala è ǹyée làa Saŋsiŋ ma

4M̀ɛnii ŋí kɛ́ɛ pôlu ma, Saŋsiŋ è wɛ́li sòŋ nɛnî tɔnɔ ma. Ǹáa ƃé kɛ̀ a Dilala. Ǹɛnii ŋí seɛ́ɛ è kɛ̀ Sorɛi Diŋ-tiŋ su. 5Kâloŋ lɔ́ɔlu díkɛ̀ Felesia lɔii mɛi. Dí lì Dilala pɔ́-naa dîyɛɛ mai, “Íyee láa Saŋsiŋ ma a gɛ́ɛ é ƃɛ́i lɛ́ yâ ŋɔwála-walai a kûla naai, da berei kwa pɔ̂ri zonîi la kú ŋ̀iri kɔlɔ é kpɛ́ɛ mai. Ya nyíŋi kɛ̀ kûɛ, kwa pâi káne kpua-kpua wála tɔnɔ pôlu ŋuŋ tɔ̂nɔ tɛɛ̂i ípɔ tɛi-tɛi.”

6Nya ƃe Dilala è mò Saŋsiŋ ma ǹyɛɛ, “Kpera yɛ̂ ƃɛ́i lɛ́ ḿâ íwala-wala-laai a kûla naai. Núu da a kɛ̀ ŋ̀wɛ́lii é íɣiri, kɔlɔ é kpɛ́ɛ yâ, maa nuui a pɔ̂ri gɛ̂i léŋ?”

7Saŋsiŋ ǹyɛɛ m̀ai, “À kɛ̀ da ŋ́îri a kerâŋ tɛ́ ɣɛli nina lɔ́ɔlu mɛi feerɛ, gɛ̀ ní ŋáwala-walai a pâi kulâi ńyêei, kɔlɔ é kpɛ́ɛi ḿâ, yɛ̂ɛ berei nɔ́ a kɛ̂ la a núu sîi da kéleei.”

8Felesia kaloŋ-ŋai dí lì dí pá a gerâŋ ɣɛli nina lɔ́ɔlu mɛi feerɛ dí dɛɛ Dilala pɔ́. Dilala è Saŋsiŋ ɣìri la. 9Felesia kaloŋ ŋai dí pa a díkɔ-kuluƃa-ŋai dí díloo Dilala ŋɔlôŋpoi dɔnɔ su a gɛ́ɛ a làɣi dí pá dí Saŋsiŋ soŋ. Nya ƃe è làɣi ǹyɛɛ m̀ai, “Saŋsiŋ, Felesia-ŋai daâ ísoŋ!” Kɛ́lɛ Saŋsiŋ è mù sìɣe a kîrɛ, é gerâŋ ɣɛlii su tée yɛ̂ɛ ŋɔŋ a yee kâro su tee. Kɛ́lɛ dí fé pɔri ní ƃɛ́i kɔ̂lɔnii Saŋsiŋ ŋɔwála-walai a kûla nàai.

10Naa kɛ́ɛ tíi, Dilala è mò Saŋsiŋ ma ǹyɛɛ, “Í lɛ́ɛ kɛ̀ ḿâ, í ḿòo. Pá nâa í berei lɛ́ ḿâ ŋa pɔ̂ri íɣirîi lai.”

11Saŋsiŋ è ŋɔ́nɔ mò ma ǹyɛɛ, “À kɛ̀ núu da a ŋ́iri kpɔ́ a gbanaŋɔɔ a ɣɛli nyíi dífe niî tíi da kɛ́ ní lai, ŋáwala-walai a pâi kulâi ńyêei, kɔlɔ é kpɛ́ɛ ḿâ, yɛ̂ɛ berei nɔ́ a kɛ̂ la a núu sîi da kéleei.”

12Nya ƃe Dilala è ɣɛli nîna sìɣe é Saŋsiŋ ɣiri la. Dilala è Saŋsiŋ tòli ǹyɛɛ m̀ai, “Saŋsiŋ, Felesia-ŋai daâ ísoŋ!” Gɔ-kuluƃa-ŋai díkɛ̀ lôŋpoi da kpɛ́ni su. Kɛ́lɛ Saŋsiŋ è ŋ̀ɛlii su tèe ǹyée ma nɔ́ a vîŋ tɔnɔ yɛ̂ɛ yee kâro.

13Dilala è ŋɔ́nɔ mò Saŋsiŋ ma ǹyɛɛ, “Íkaa nɔ́ sâa ḿoôi íkɛ lɛ́ɛ kɛ̀ ḿâ. Ye berei lɛ́ ḿâ ŋa pɔ̂ri íɣirîi la a ǹɛ́lɛɛi.”

Saŋsiŋ ǹyɛɛ m̀ai, “À kɛ̀ yà seɣe pâla yee sìɣe í ŋ́uŋ láa la a gbaa lɔ́ɔlu mɛi feerɛ, í gbaa kpíniŋ a gîe í zoŋ kpɔ́ a gbanaŋɔɔ a gòniŋ, gɛ̀ ní ŋáwala-walai a pâi kulâi ńyêei, kɔlɔ é kpɛ̂ɛ ḿâ yɛ̂ɛ berei nɔ́ a kɛ̂ la a núu sîi da kéleei.” 14Saŋsiŋ kɛ́ɛ nyiî, Dilala è ŋuŋ lâa a seɣe pala yee a gbaa lɔ́ɔlu mɛi feerɛ é gbíniŋ a gîe é zoŋ kpɔ́ a gbanaŋɔɔ a gòniŋ. Nya ƃe è ŋɔ́nɔ Saŋsiŋ tòli ǹyɛɛ m̀ai, “Saŋsiŋ, Felesia-ŋai daâ ísoŋ!” Saŋsiŋ è ŋ̀ɛ́i lá ƃò é gòniŋ wêeŋ ŋ̀ûa é ŋuŋ fúloŋ.

15Gɛ́ɛ tíi, Dilala è mò Saŋsiŋ ma ǹyɛɛ, “Ya pɔ̂ri kɛ̂i léŋ yɛ̂ í ŋ́wɛlini à kɛ̀ ífa lâa a ńyãa? Tãi zaaƃa ɣelei ká ŋí íkɛ ḿòo nɔ́ ífa íwala-walai kulâi lɛ̀ ḿâ.” 16Ǹɛnîi è kɛ̀ Saŋsiŋ pôlu a mɛni tɔnɔ̂i ŋí a ɣele kélee. È kpɔ̀lu kpɔ́ ǹá va pɔ̂ri seêi. 17Nya ƃe è dɔ̃yâi ƃò ma yɛ̂ɛ mai, “Ŋa wɔ́lɔ mu siɣe ní ŋá tɔ́ɔ, dífe tá kɔli lɔ́ ní ŋ́ûa, kpɛ́ni fêi, Eezuɛ Ɣalai a ŋ́zîɣe a ŋɔyée mu nuu. M̀ɛni ƃé da ńdôli la a Nâzarɛ-nuu. À kɛ̀ núu da a kɔli lɔ̀ ŋ́ûa, gɛ̀ ní ŋáwala-wala laai a pâi kulâi ŋ́gbonôi, kɔlɔ é kpɛ́ɛ ḿâ.”

18Dilala è làa la a gɛ́ɛ Saŋsiŋ aâ dɔ̃yâi ƃó ma. Nya ƃe è worɛ̂ tɛ̀ɛ Felesia a kaloŋ-ŋai dínûai pɔ́-naa ǹyɛɛ dîai, “Ka pá ŋɔ́nɔ pôlu, kpɛ́ni fêi, Saŋsiŋ aâ tela dɔ̃yâi ƃó ḿâ.” Felesia kaloŋ-ŋai da dí díkɔ-kuluƃa-ŋai dí lì pôlu Dilala ŋɔpɛ́rɛi lá. Dí lì a gánei dí díkono tèe la ǹyêei m̀ɛni mai. 19Dilala è Saŋsiŋ ŋuŋ lâa gɔ́ɔ mɛi é lɛ́ɛ la zu Saŋsiŋ é nyíi. Nya ƃe è nalôŋ tɔnɔ tòli é pá é ŋuŋ-kpaa lɔ́ɔlu mɛi feerɛi kélee tée ŋ̀ûa. Gɛ́ɛ tí, Saŋsiŋ ŋɔwála-walai su è sàa, kɔlɔ é kpɛ́ɛ ma. Ŋɔwála-walai kélee è nâa kùla ǹyêei. 20Dilala è ŋɔ́nɔ làɣi ǹyɛɛ m̀ai, “Saŋsiŋ, Felesia-ŋai daâ ísoŋ!” Saŋsiŋ è mu sìɣe é m̀ó ǹíi su-pere ǹyɛɛ, “Ŋa pâi ŋ́gbîŋ fûlonii ŋá lí yɛ̂ɛ berei nɔ́ ŋá gɛ̀ la a bɔlɔi.” Kɛ́lɛ vé kɛ́ ní a gɔ́lɔŋɔɔ a gɛ́ɛ Yâwɛɛ aâ kula bôlu. 21Nya ƃe Felesia-ŋai dí pà dí Saŋsiŋ soŋ. Dí ŋ̀ɛ́i-gao wòlo dí ziɣe dí yéŋ la Geza kpiniŋ su. Dí dòo ƃara yɔlɛ ŋá, dí ǹɔ́ kpini pɛrɛ mu. Díwîi fũa kwaai ma è kɛ̀ gbini-pɛrɛi ŋí mu. Dí Saŋsiŋ kɛ̀ gɛ́ díwîi fũa kɔni kɛ́tɛi tìnaŋ. 22Saŋsiŋ kɛ́ɛ a namu gbini pɛrɛi ŋí mui, ŋ̀uŋ-leɣa è ŋɔ́nɔ pɛ̀lɛ tɛ̂i pôlu.

Berei Saŋsiŋ è sàa lai

23Felesia-ŋai díɣâlai láa ƃé kɛ̀ a Dagɔŋ. Ɣele tɔ̂nɔ da díkâloŋ-ŋai dí díŋaa tɛ̀ ma a gɛ́ɛ dí kúu kɛ́tɛ kɛ́ dí sâla kula díɣâlai Dagɔŋ ma. Dí kɛ̀ lii-nɛ̃ɛ kulâi díkɛ wule tôo dîyɛɛi, “Kúɣâlai a gɛ́ kwa kúkpɔara-nuui Saŋsiŋ yée mɛi ɣále.” 24-25Dílii è ǹɛ̃ɛ kpɔ́ gúui su a ŋ̀ánaa. Nya ƃe dí mò dîyɛɛi, “Ka pá a Saŋsiŋ é la ɣɛ̂lɛ mɛni-ŋa kɛ́ kúŋɛi, kú ɣɛ́lɛ maa kúla gbonôi.” Dí páa a Saŋsiŋ, dí dɔ̀ɔ bɛ́rɛi sâmai kpɛnɛ kpaya-kpayai loai dí pɛ́lɛ ɣɛ́lɛ maa támaa kulâi gbonôi. Dí laa maa tɛ̂ wule tòo díɣâlai ma dîyɛɛi, “Kúɣâlai a gɛ́ kwa kúkpɔara-nuui yéei mɛi ɣále. Nya ƃe kúlɔii su kàra é kúnûai dámaa páa.” 26Saŋsiŋ fé ŋɔ́nɔ kɛ́ ní pɔrîi kwaa kâai. È mò zurɔ̂ŋ-looi ma kɛ̀ ǹyée sonîi ǹyɛɛ m̀ai, “Lí a ńyãa í ńyee pɛ́lɛ bɛ́rɛ kpɛnɛ-ŋai dîa nyíi bɛ́rɛi sonîi. Ŋa ŋ̀wɛ̂lii ŋá tiɣîŋ dîa.” 27Bɛ́rɛi lá è kɛ̀ a vɛ́ɛ kpɔ́ a sinâa da nɛyâa a maa ɣelei tí. Felesia kaloŋ lɔ́ɔlui díkɛ naa. Sinâa da nɛyâa kɛ́ɛ yɛ̂ɛ wála saaƃa díkɛ bɛ́rɛi ɣelei pere díkɛ ɣɛ́lɛ maa kùla Saŋsiŋ gbonôi.

28Saŋsiŋ è Yâwɛɛ fɛ̀li ǹyɛɛ m̀ai, “Óo Ŋ̀wála-wâla kélee Yâwɛɛ, ŋ́gili é lɛ́ɛ íŋa. Óo Ɣâla, kpera yɛ̂, ye wála-wala tɛɛ ḿbɔ ŋɔ́nɔ. Felesia-ŋai dí ŋ́ɛi gao veerɛ kùla. Gɛ́ ŋá dísu-kara a ḿvîŋ tɔnɔ.” 29Saŋsiŋ è kɛ̀ tɔɔni bɛ́rɛi sámai kpɛnɛ feerɛi loai. È gɔɔ-yee pɛ̀lɛ gbɛnɛi dɔnɔ ma é ǹáa m̀ii yee pɛlɛ gbéli ma. 30È làɣi a ŋ̀óo su kɛ́tɛ ǹyɛɛ, “Ǹɛɛ naa kwa Felesia-ŋai kú sáa gîe ma!” È mò nɔ́ tí, é gbɛnɛi veerɛŋɔɔ tuâŋ a ŋɔwála-wala laai kélee. Bɛ́rɛi è wòlo é pú diai kélee mɛi kɛ̀ ǹaai. Felesia kaloŋ lɔ́ɔlui díkɛ ǹûai ŋí sáma. Saŋsiŋ ǹyaa máŋ è sàa. È núu támaa pàa a ŋ̀elei tí é tɛ́ɛ nyii-ŋai dîa è dípàa gɛ́ɛ kɛ̀ la ɣele mai.

31Nya ƃe ǹêɣe-ni da ŋɔkáayɔɔ kpéle-ŋai dí lì Geza boma kânai. Dí lì la dípɔ-taai Zola. Dí ǹoo ǹâŋ Manoa kɔlɛ ma. Zaa loo kwaai ŋí ma káa Zora da Ɛtaɔ taa-ŋai loai. Saŋsiŋ è kɛ̀ Eezuɛ mɛi a kóraŋ buu feerɛ.

Currently Selected:

M̀ɛni-sâa Ƃó-ƃelai 16: KWB

Highlight

Copy

Compare