M̀ɛni-sâa Ƃó-ƃelai 15
15
1Ɣele kpɛ́-kpɛɛ tɛɛ́ pôlu ma, wîi tée tãi seriɛɛi, Saŋsiŋ è lì ŋɔnɛnîi nàa kâai. È lì a ƃoli-lôŋ tɔnɔ bɔ́ a sama-sɛŋ. È mò nɛniî ǹâŋ ma ǹyɛɛ, “Ŋa ŋ̀wɛ̂lii ŋá lí ŋánɛnîi ŋɔlôŋpoi su.”
Kɛ́lɛ ǹɛnîi ǹâŋ fé fáa ní ma. 2Ǹyɛɛ Saŋsiŋ mai, “Tɔ̃yâ ma ŋá kɛ̀ nɔ́ gâai ŋ̀wɛ́li fé yâ. M̀ɛni ma, ŋá dɛ̀ɛ ǹyaŋkpâi dɔnɔ pɔ́ kɛ̀ íkɔlɛ ma gúui í gɛ̂i zu. Kɛ́lɛ ƃa pɔ̂ri ǹêɣe-nɛnii kulâi a nɛnî bɔ́ɔ ŋá. Ǹɛ̂lɛɛi é tɛ́ɛ ma.”
3Saŋsiŋ ǹyɛɛ m̀ai, “Lônii ma sâpo káa ńyêei ŋá mɛni nyɔ́mɔɔ kɛ́ a Felesia-ŋai.” 4Nya ƃe Saŋsiŋ è lì é kɛlɛ̂ŋ ŋuŋ saaƃa sóŋ. È dí kpùlɔŋ díkîe ma feerɛ-feerɛ a díwoŋ a seɣe kpua-ŋa. È wîi kpaŋ ɣìri zeɣe kpua-ŋai ŋí dîa. 5È ŋɔŋ tôo wîi kpaŋ-ŋai dîa, é tée gɛlɛ̂ŋ-ŋai dîa ŋɔŋ kɛ́ ƃò dîa, dí lí Felesia-ŋai díwîi kpalaŋ ŋá. Wîi ǹûai dí dèei, ŋɔŋ è gélee kèreŋ da nyii-ŋai kɛ̀ gbaŋ ŋái, é pɛ́lɛ díɔle dóu-kpɔ̂lui ma. 6Felesia-ŋai da-ŋa dí marê kɛ̂ɛ kɛ̀ dîyɛɛi, “Gbɛ̂ɛ ƃé a m̀ɛni saŋ ŋí kɛ̂i?” Núu da è mò dîa ǹyɛɛ, “Saŋsiŋ ƃé gɛ̀ tí. È Tiŋna ǹalôŋ tɔnɔ ǹóŋ kùla a nɛnî. Kɛ́lɛ ǹaloŋ ŋí è Saŋsiŋ ŋɔnɛnîi sìɣe é dɛɛ surɔ̂ŋ da kpɛ́ni pɔ́.” Nya ƃe Felesia-ŋai dí lì dí nɛniî ŋí kéreŋ da ǹâŋ ŋɔpɛ́rɛi.
7Saŋsiŋ è m̀ɛnii ŋí m̀ɛni. È lì é m̀ó dîa ǹyɛɛ, “Dûai ŋí ká gɛ̀ a ńyãai, ŋa ḿvoo ŋa pâi gba tí-ti kulâi kâa. Ḿvii fé pâi kpɛɛ̂i.” 8Nya ƃe è kɔ́ pɛ̀lɛ dîa a ŋɔwála-walai kélee é dámaa páa. Nyíŋi pôlu ma, è kùla Felesia-ŋai dílɔii su, é lí Itaŋ Kɔni woloi su gɛ̀ ƃò naa.
Saŋsiŋ è Felesia-ŋai yée mɛi ɣâle
9Naa kɛ́ɛ tíi, Felesia kɔ-kuluƃa-ŋai dí lì dí díƃûui pú Zuda kpiniŋ su. Dí kɔ́ pɛ̀lɛ Lɛi taai ma. 10Zuda sinaai dí Felesia-ŋai marê kɛ̀ dîyɛɛi, “Ka kɔ́ pɛlɛ̂i kûa lé mɛni ma?”
Felesia-ŋai dí Zuda-ƃelai wóo su tòo dîyɛɛi, “Saŋsiŋ a mɛni nyɔ́mɔɔ kɛ́ a kûa. M̀ɛni ƃé kú pà la a gɛ́ɛ kú zoŋ, kú tûa la yɛ̂ɛ berei è tùa la a kûai.” 11Nya ƃe sinâa wála saaƃa dí kùla Zuda kpiniŋ su dí lí Itaŋ Kɔni woloi su dí m̀ó Saŋsiŋ ma dîyɛɛi, “Ífe gɔ́lɔŋ a gɛ́ɛ kúkaa Felesia-ŋai yée mu? Ya ŋ̀wɛ̂lii í kúmɔ̃lɛ laai da pú ŋɔ́nɔ ma?”
Saŋsiŋ ǹyɛɛ dîai, “M̀ɛni tɔ̂nɔi dí gɛ̀ a ńyãai, ǹyaa nɔ́ ƃé ŋá gɛ̀ a dia.”
12Dí mò ma dîyɛɛi, “Kú pà a gɛ́ɛ kú ísoŋ kú íɣiri kú lí a yá dípɔ.”
Saŋsiŋ è mò dîa ǹyɛɛ, “Ka káfoo ńyêei a gɛ́ɛ káa kpîŋ káfe pâi ḿbaâi.”
13Dí mò ma dîyɛɛi, “Tɔ̃yâ ma kúfe pâi ípaâi. Kwa pâi nɔ́ íɣirîi kú lí a yá dípɔ.” Nya ƃe dí ŋ̀iri a ɣɛli nina feerɛ dí gula gɔni wôloi su dí lí la.
14Dí tɛɛ́ Lɛi taai sui, Felesia-ŋai dí pà bɔ́-naa pêre a kîri díkɛ làɣi. Yâwɛɛ ŋɔmɔ̂leŋ è pà bɔ́ é wála-wala laa tɛɛ bɔ́. Ŋ̀ɛlii kɛ̀ ǹyée mai zu è tèe nɔ́ yɛ̂ɛ ŋɔŋ a yee su tèe. 15Gɛ́ɛ tíi, è wɛlɛ-sôo nɛɣɛŋ-káo nina tɔnɔ kàa lâa-ni gɔlɛ ma. È zìɣe é pɛ́lɛ ǹûai lôkwai la. È sinâa wála tɔ̂nɔ pàa la. 16Saŋsiŋ è m̀ɛnii ŋí tòo a wule ǹyɛɛ,
“Ŋá sinâa wála tɔnɔ pàa a wɛlɛ-sôo ǹɛɣɛŋ kao tɔnɔ.
Wɛlɛ soo nɛ̂ɣɛŋ káo tɔnɔ ƃé ŋa dípàa la, ŋá dípoma ŋáa tɛ̀ gîe ma túŋ-kpaŋ.”
17Gbɛ́ɛ ŋ̀ulei toôi, è zua káoi tòo. Dí gwaai ŋí ma láa sèe a Lama Lɛi.#15:17 Lama Lɛi: Ǹáai ŋí su kulâi ƃa Zua-nɛɣɛŋ kao Yeei Ibulu wooi su.
18Gɛ́ɛ tíi, kpele wɛ̂li ŋánaa è zòŋ. È Yâwɛɛ fɛ̀li ǹyɛɛ m̀ai, “Ya wála-wala laa tɛɛ ḿbɔ ŋa ǹûai ŋí yée mɛi ɣále. Ya pâi ǹɛɛ̂i naa kpele wɛ̂li é ḿbaa, Felesia-ŋai ŋí dífe Ɣâla kɔ́lɔŋ dí ńzoŋ?” 19Lóa da è kɛ̀ Lɛi taai su ǹɔii mu. Ɣâla è ǹóai ŋí lá ƃò yá é kúla naa. Saŋsiŋ è da kpèle é tóo gbonôi. È ǹyái ŋí láa sèe a Akori.#15:19 Akori: Ǹáai ŋí su kulâi ƃa Tóli-nuu Ya-ɣiliŋ, Ibulu wooi su. Ǹyaŋ ǹáa ká tí é tóo sâa ma.
20Saŋsiŋ è kɛ̀ Eezuɛ lɔii láa túɛ a kóraŋ buu feerɛ. Felesia-ŋai díkɛ̀ Eezuɛ lɔii mɛi tãi ŋí yée mu.
Currently Selected:
M̀ɛni-sâa Ƃó-ƃelai 15: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
