Azaya 39
39
Gela-ŋai kùla Babelɔŋ
(Kâloŋ-ŋa Veerɛi 20:12-19)
1Tãi tɔnɔi tí yée-mu, Baladaŋ ǹóŋ Mɛrodasi nyii kɛ̀ a Babelɔŋ kaloŋ, è mɛ̀ni a gɛɛ Gâloŋ Ɛsekaya è kɛ̀ kɔ̂lɛi, kɛ́lɛ a nâa ƃálo. È kéla-ŋa tɛ̀ɛ bɔ́ naa a kɔlɔ da sama-sɛŋ. 2Dí liɛɛ a zama-sãai ŋí Gâloŋ Ɛsekaya pɔ́i, è ǹyée sèe dímu. È ŋɔtɔɔ-sãai kélee lɛ̀ dîa. È ŋɔkánei, gôoi, gúŋ sãai, ŋ̀ulɔ kúŋ nɛ̃ɛ-ŋai da ŋɔkɔ́ kɔ́-sãai kélee lɛ̀ dîa kɛ̀ ŋɔsãâ pûi kɛ́-pɛrɛ-ŋai mui. Zãâi kélee kɛ̀ ǹyêei ŋɔkâloŋ-laai sui, è gélee lɛ̀ dîa. Vé da lɛ̀ɛ ní pôlu. 3Nya ƃe Ɣâla ŋɔlóno kɛ́-nuui Azaya è pà Gâloŋ Ɛsekaya pɔ́ naa ǹyɛɛ mai, “Zinâai ŋí dîyɛɛ lé? Ǹɔii nênɛ ƃé dí kùla zui?”
Gâloŋ Ɛsekaya ǹyɛɛi mai, “Dí kùla kwaa kôyaa ma Babelɔŋ lɔii su.”
4Azaya è marê kɛ̀, “Lé ƃé í nɛ̀ dîa gâloŋ-pɛrɛ kɛ́tɛi mui?”
Ɛsekaya è zu tòo, “Dí ńyêei sãai kélee kàa. Sɛŋ da kélee fé zãâ pûi kɛ́-pɛrɛ-ŋai mu nyii dífe gáa-nii. Ŋá gélee lɛ̀ dîa.”
5Nya ƃe Azaya è m̀o Gâloŋ Ɛsekaya ma ǹyɛɛi, “M̀ɛnii mɛ́ni Ŋ̀wála-wâla kélee Yâwɛɛ a m̀ôi. 6Gáa, ɣele-ŋa da pâi, zãâi kélee gáa gâloŋ pɛrɛi mui, da nyii-ŋai kélee ínuu pɔ̂lɔ-ŋai dí ǹâai kɛ̀ gâloŋ-pɛrɛi ŋí mui, é tóo nyii-ŋai yaâ dísɔlɔ ƃôi, nûa da pâi gélee kpɔ́ siɣêi dí lí a dia Babelɔŋ lɔii su. Dɔnɔ kpîŋ fé pâi lɛɛ̂i naa. 7Da pâi ísuui su sinaai da-ŋa siɣêi dí lí a dia Babelɔŋ. Da pâi da-ni tɛɛ̂i Babelɔŋ kaloŋ ŋɔpɛ́rɛi mu a gɛɛ díkɛ tíi kɛ̀ naa.”
8Gâloŋ Ɛsekaya è kɛ̀ gíli ŋá siâi ǹíi su-pere gɛ́ mò gbîŋ ma, “Kwa pâi nâa kɛ̂i lii-see su, kú kúfii tɔ́ɔ a tãi da, tãi nɔ́ ŋ́gaa niî la ɣele mai.” Nya ƃe è mò Azaya ma ǹyɛɛi, “Ŋ̀orɛ̂-wooi í pà la ḿbɔ é kúla Yâwɛɛ yêei, ǹɛ̂lɛɛi.”
Currently Selected:
Azaya 39: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
