Azaya 38

Gâloŋ Ɛsekaya è kɔ̀lɛ, é ƃálo

(Kâloŋ-ŋa Veerɛi 20:1-11; Kɔlɔnikɔ Veerɛi 32:24-26)

1Tãi tɔnɔ da Gâloŋ Ɛsekaya è kɔ̀lɛ kpɔ́ ǹaa é lɛ́ɛ a gùro-té gɛ́ pà saâi. Nya ƃe Emɔ ǹóŋ Azaya è lì bɔ́ naa a gɛ́ɛ é gáa. Azaya è kɛ̀ a Ɣâla ŋɔlóno kɛ́-nuu. È m̀o Gâloŋ Ɛsekaya ma ǹyɛɛi, “Yâwɛɛ a m̀ôi yâ a gɛ́ɛ í íkɛ-mɛni-ŋai kélee pú ŋ̀ɛli ma, kpɛ́ni fêi, ífe pâi kulâi gɔlɔ-fêlai ŋí su. Ya pâi saa tí-ti ƃôi.”

2Nya ƃe Gâloŋ Ɛsekaya è tìnaŋ bɛ́rɛ kâŋ ma pere é Ɣâla fɛli ǹyɛɛi, 3“Óo Ŋáɣâlai Yâwɛɛ, ḿaa mɛ̂ni kíli é lɛ́ɛ íŋa. Gáa, ŋa tíi kɛ́ yɛ̂ a ńii kélee a teniŋ ƃô-pere. Ŋa kɔ́ kpɔ́ a zu kôyaa a gɛ́ɛ ŋá m̀ɛni-ŋai kɛ́ nyii-ŋai yà m̀o ḿâi.” Nya ƃe Ɛsekaya è wɔ̀lɔ kpɔ́ a ŋ̀ánaa.

4Ǹaa pôlu ma, Yâwɛɛ è mò Azaya ma 5a gɛɛ é lí pôlu Ɛsekaya pɔ́ naa a ŋorɛ̂-wooi ŋí. “Ɛsekaya, ńyãa ƃa Yâwɛɛ Ɣâla nyii ínâŋ pɔlɔi Deeƃé a kâa vɛ̀lii. Ŋaâ ífɛli-wooi mɛ́ni, ŋa íkaa íkɛ wɔ́lɔ ḿâ. Ŋa pâi ǹɛɛ̂i naa íkɛ ɣele ma a kóraŋ puu káo lɔ́ɔlu. 6Ŋa pâi íŋuŋ-maa ƃôi ka Zerusâlɛŋ taa-leei ŋí Asiria kaloŋ yêei. Ŋa pâi daa-lêei ŋí maa-kɔ̃ɔ̂i.

7“Ńyãa Yâwɛɛ ŋa pâi ŋɛi-kɛ-maa sîi da lɛ̂i yâ nyii pâi ǹɛ̂i yâ a gɛ́ɛ m̀ɛnii ŋa m̀ôi, ŋa pâi ŋ̀aa-see kɛ̂i. 8Gâlai Gâloŋ Eeɣa è dɔ̀ɔi, ŋa a pâi gɛ̂i ǹinîŋ é lí pôlu-pere a kɔ́ɔ ƃɔ́rɔnîi puu.” Nya ƃe vóloi è lène pôlu a kɔ́ɔ ƃɔ́rɔnîi puu.

9Tãi Gâloŋ Ɛsekaya è kùla la gɔlɔ-fêlai sui, è laa maa-tɛ̂ wule tɔnɔ pɔ̃̀yɛ ǹyɛɛi,

10“Ŋá kɛ̀ gâai ŋa pá saâi nɔ́ tãi kpua yée mu,

ŋá lí zaa-ƃelai pɔ́ naa,

ŋá ŋáɣeniɛi kpéli kpɛ́ɛ naa-pere.

11Ŋá kɛ̀ gâai fúlu-sãa kélee sáma ŋ̀éniɛi ŋí su,

fé kɛ́ ní ŋɔ́nɔ pâi Yâwɛɛ kâai,

kpaa máŋ núu-kpune da.

12Ŋáfulu-laai è kɛ̀ nɔ́ pâi kùla ńyêei

yɛ̂ɛ da ƃûu tàa.

È kùla nɔ́ ńyêei yɛ̂ɛ yee a kùla gena ma.

Ŋá kɛ̀ gâai yɛ̂ɛ Ɣâla a pá ŋáfulu-laai kulâi ńyêei ƃe tí.

13Ŋá wɔ̀lɔ a kpíni da fólo

yɛ̂ɛ ǹyaa ƃé yala-sûlu a kɛ̀ ŋ́gao ɣâlei ŋ́gbonôi.

Ŋá kɛ̀ gâai yɛ̂ɛ Ɣâla a pá ŋáfulu-laai kulâi ńyêei ƃe tí.

14Ŋ́gɔlɔ è kɛ̀ saâi ḿâ, ŋ́oo ŋá yeŋɔɔ.

Ŋá kɛ̀ nyîɣɛi yɛ̂ɛ tòloŋ,

ŋ́ɛi fa ŋɔ́nɔ kwaa kâa a ǹɛ́lɛɛ.

Ǹuu-namui, ŋ́uŋ ma ƃó í ŋ́gula m̀ɛni-kpɔ̂lui ŋí su.

15Lé ƃé ŋa pɔ̂ri m̀ôi?

Yâwɛɛ ǹyaa kpîŋ a m̀ɛnii ƃó ḿâ a pâi gɛ̂i, ǹyaŋ a gɛ̂i.

Ńii ŋwânai, nyii fé pâi ŋ́ɛi.

16Ǹuu-namui, ŋa pâi kɛ̂i ɣele ma yá tɔnɔ í mɛni ma.

Ḿalo mî, í ǹɛɛ naa ŋá lɛ́ɛ ɣele ma.

17Ya ŋá lii-ŋwânai pene a lii-nɛ̃ɛ.

Ya ŋ́uŋ ma ƃó, ya ŋ́gula mɛni nyɔ́mɔɔ támaa perei.

Ya ńzu mɛ̂ni lɛɛ ŋásɔnyɔ̂ŋ-ŋai kélee mɛ̂ni ma.

18Saa-nûu da fa pɔ̂ri ílaa maa tɛ̂i saa-táa.

Kili kɛ-zu fé saa-nûu da yêei íteniŋ ƃô-laai mɛ̂ni ma.

19Vúlu-ƃelai nɔ́ ƃé da pɔ̂ri ílaa maa tɛ̂i

yɛ̂ɛ berei ŋa gɛ̂i lai.

Ǹóŋ káa-ƃelai nɔ́ ƃé da íteniŋ ƃô-laai maa mɛni ƃò dínîa-pɛlɛɛi dîa.

20Yâwɛɛ, ya ŋ́uŋ ma ƃó.

Kwa pâi wule toôi, kú ɣale-sãa ɣale,

kú ílaa maa tɛ́ a fólo da kpíni Ípɛrɛ Kɛ́tɛi mu.”

21Gâloŋ Ɛsekaya é lɛ́ɛ pâi ƃâloi, Azaya é mò ma a gɛ́ɛ é fîi-wurii m̀á da kùla é gîiŋ é gbɔrɔ pɛ́lɛ m̀ũai-ŋá, gɛ̀ ní a pâi ƃâloi. 22Gâloŋ Ɛsekaya è Azaya marê kɛ̀ ǹyɛɛ mai, “Ŋ̀ɛi kɛ́-maa ƃa lé pâi ǹɛ̂i ḿâ a gɛ́ɛ ŋa pâi ƃalôi, pɔrî kɛ́ ƃò ńyêei ŋɔ́nɔ a gɛɛ ŋá lí pôlu Ŋ̀âla-pɛrɛ Kɛ́tɛi mui?”

Currently Selected:

Azaya 38: KWB

Highlight

Copy