Emɔ 2
2
Môa-ŋai
1Ɣâla Yâwɛɛ è mò ǹyɛɛi, “Môa ŋɔsɔnyɔ̂ŋ saaƃa kpaa náaŋ mɛni ma fé pâi dɔ̀ŋ-kpɛ-maai siɣêi pôlu mà kpɛ́ni fêi, è Idɔŋ kaloŋ kèreŋ é kɛ́ a luu. 2M̀ɛni ma ŋa pâi ŋɔŋ pilîi Môa mà, a gɛɛ é Kâria ŋɔkóli-ŋai kéreŋ, ǹyaŋ Môa a pâi saâi láɣi-woo su da túru-woo. 3Ŋa pâi gâloŋ kulâi dísama, ŋá díkelee páa da gâloŋ-lonii.”
Zuda-ŋai
4Ɣâla Yâwɛɛ è mò, ǹyɛɛ, “Zuda ŋɔsɔnyɔ̂ŋ saaƃa kpaa náaŋ mɛni ma, fé pâi ŋɔtɔŋ-kpɛ-maai siɣêi pôlu mà kpɛ́ni fêi, da díyee kúla Kúnuu-namui ŋɔtɔ̂ŋ mu, dífe mɛi káa ní. Dílɛɛ-mɛni-ŋai dínâŋ-ni dì sìa dípôlui, da díkɛ da láŋ. 5M̀ɛni ma, ŋa pâi ŋɔŋ pilîi Zuda ma, a gɛɛ é Zerusâlɛŋ ŋɔkóli-ŋai kéreŋ.”
Ɣâla a pâi Eezuɛ kula maa kɛ̂i
6Ɣâla Yâwɛɛ è mò, ǹyɛɛi, “Eezuɛ ŋɔsɔnyɔ̂ŋsaaƃa kpaa náaŋ mɛni ma, fé pâi ŋɔtɔŋ-kpɛ-maai siɣêi pôlu ma kpɛ́ni fêi, da dɔ̃yâ-nuui kɔ́lɛ sɛŋ-kao kole pôlu, da gôlo-nuui kɔ́lɛ kɔ́ɔ ŋá-kɔlɔ pôlu. 7Da gôlo-ƃelai ŋuŋ pîlaŋ bɔ̂rɔi su dí maa-yeŋ-ƃelai perêi kpáaŋ. Naŋ-nuu da ǹóŋ da nɛnî tɔnɔ soŋ a wɛ́li a gɛɛ dí ńaa maa waai kara. 8Da láa ŋ̀âla-teƃele-ŋai kɔlɛ dísɛɣɛ-seɣe-ŋai dîa, díkɛ ŋwã̂ai kpèle díɣâla-pɛrɛi mu, nyii da nyà a zɛŋ-kaoi da gula diai dîa da nyà pù dîai.
9“Nyaa ƃe Amorai-ŋai su kàra díŋɛi túɛ, nyii-ŋai dítɔɔ-mɛi e kɛ̀ yɛ̂ɛ sîda wuru-ŋai, dikpanaŋɔɔ yɛ̂ɛ teenâ-wurii. É máŋ kɛ́ tí ŋá sîda-wuru-ŋai su kàra ŋ̀elei su-pere, ŋá dísame su kara ǹɔii mu-pere. 10Ńyãa ƃe kákùla Ize lɔii su ŋá tɔ́ɔ kátuɛ vɛ̃ɛ-kpâlaŋ su a kóraŋ buu-náaŋ a gɛɛ ká Amorai-lɔii sɔlɔ ƃó. 11Ŋá Ɣâla ŋɔlóno kɛ́-ƃela kùla kálônii sáma, ŋá ká nyaŋkpa-ŋai da-ni tɛɛ Ɣâla pɔ́. Vé tí, káai a Eezuɛ-ƃelai? 12Kɛ́lɛ diai ŋá dítɛ̀ɛ Ɣâla pɔ́i, ka díkɛ da ŋwã̂ai kpele, ka m̀ó Ɣâla ŋɔlɔ́no kɛ́-ƃelai dîa a gɛɛ dífe mɛni ƃò ǹaa túɛ. 13Ka gáa berei ŋa pâi káluwanîi la yɛ̂ɛ berei kéleŋ a lɔii lûwaŋ la à kɛ̀ ǹa fɛ̂ɛi. 14Pere fé pâi kɛ̂i kɔɔ-maa fêla-nuu yêei é pú, ŋ̀wála-wâla-nuui ŋɔwála-wâlai a pâi kɛ̂i kpɛ́ni-kpɛni, ŋ̀wála-wâla-nuui fé pâi gbîŋ ŋuŋ ma ƃôi. 15Gerâŋ pili-nûui fé pâi tɔɔ̂i, gɔɔ-maa fêla-nuui fé pâi gbîŋ ŋuŋ ma ƃôi, kpaa máŋ zoo-sia-nûui é gbîŋ ŋuŋ ma ƃó 16Ǹíi kpêle-nuui gáa gɔ́ kɔ́-ƃelai sámai, a pâi pûi a gaŋ a maa-ɣêlei tí.”
Currently Selected:
Emɔ 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia