Zia-ƃelai Kɛ́-mɛni-ŋai 22

1“Sinâa, ŋánûa, da ńâŋ-ni, ka ŋámaa kɔ̃ɔ-wooi mɛni ŋ́gaa m̀ôi kâai.”

2Gɛ́ɛ kɛ̀ lônoi Ibulu-wooi sui, dí dímɛi sãa kpɔ́ tɔ̀ŋ-tɔŋ. È mò, ǹyɛɛi:

3“Ńyãa kpîŋ ŋ́gaa a Zûu-nuu. Dí ḿaa sɔlɔ ƃò Taasɔ taa-leei su, Sɛlisia lɔii su. Kɛ́lɛ, dí ŋákɔ̀ŋ ƃɛ́ daa kɛ́tɛi ŋí su. Ŋa sɛŋ maa kɔ̀ri Gɛmelia yée mu, yɛ̂ɛ berei kúnâŋ pɔlɔ-ŋai dítɔ̂ŋ maa mɛni káa lai, nyíi-ŋai Ɣâla mɛni è kɛ̀ dílii su, yɛ̂ɛ berei gáa la kákelee kálii su sâai. 4Ŋá Berei ŋí kpɔ̀ara ŋá zu-ƃelai da-ni paa máŋ. Ŋá sinâa da nɛyâa ɣìri ŋá dípili kpini-pɛrɛ mu. 5Zâla láa soŋ-nuu kɛ́tɛi da ǹúu pɔlɔ-ŋai kélee da pɔ̂ri m̀aa sêre-faa kɛ̂i. Ŋá kɔlɔ kùla díyêei máŋ ḿarâai mɛni ma ŋá lí Dimɛika a gɛ́ɛ ŋá díɣiri ŋá pá a dîa Zerusâlɛŋ a gɛ́ɛ dí tɔ̂ŋ kpɛ́ dîa.

Pɔ̂ɔ è ǹíi maa faleŋ mɛnii ƃò

6“Ŋ́gɛɛ liî, ŋá sèri Dimɛika kɔlɛ ma. Vóloi kɛ́ɛ yɛ̂ɛ nya ƃé a tɛ́ ŋuŋ mai, ḿaa è pòno kpɔ́ a maa félaa a kwaa ponoɔɔ nyíi kùla ŋ̀elei sui. 7Ŋá tòo ǹɔii ma ŋá wóo da mɛni, ǹyɛɛ ḿâi, ‘Sɔ̂ɔ, Sɔ̂ɔ, ya ŋ́gbɔarâi lé mɛni ma?’ 8Ŋá ŋ̀óo su tòo, ǹyɛɛi, ‘Gbɛ̂ɛ ƃa yá, Ŋánuu-namui?’ E mò ḿâ, ǹyɛɛi, ‘Ńyãa ƃa Nâzarɛ Zisɛi nyíi íkaa gbɔarâi.’ 9Diai kwa dîa-ni kú kɛ̀ naai, dí gwaa ponoɔi kàa, kɛ́lɛ, dífe ŋ̀óoi mɛni ní kɛ̀ lônoi ḿbɔi. 10Ŋá mò, ǹyɛɛ, ‘Lé ƃé ŋa pɔ̂ri gɛ̂i, Ŋánuu-namui?’ Kúnuu-namui ǹyɛɛ ḿâi, ‘Ímu siɣe í lí Dimɛika. Da pâi m̀ɛnii kélee ƃôi naa yâ, nyíi-ŋai ŋa ŋ̀wɛ̂lii í gɛ̂i.’ 11Ŋ́gɛɛ kɛ̀ fa pɔ̂ri kwaa kâai, kpɛ́ni fêi, gwaa ponoɔi ŋɔfóloi è kɛ̀ a gbanaŋɔɔi, diai kɛ̀ ŋ́gɔlɛi, dí ńzòŋ a ńyee dí lí a ńyãa Dimɛika.

12“Nalôŋ tɔnɔ è kɛ̀ naa, ǹáa ƃé kɛ̀ a Ananaya, nyíi kɛ̀ a Ɣâla mɛni kɛ-nuu yɛ̂ɛ berei dítɔ̂ŋ è kɛ̀ lai. Zûu-ŋai kélee kɛ̀ naai, dí lòno a ǹɛ́lɛɛ é pîlaŋ ma. 13È pà ḿbɔ é tɔ́ɔ ŋ́gɔlɛ, ǹyɛɛi, ‘Ḿarâŋ Sɔ̂ɔ, kwaa káa.’ Ŋ́ɛi è fùloŋ ŋ̀á ma ŋá kwaa káa. 14È mò, ǹyɛɛi, ‘Kúnâŋ-ni Díɣâlai a ílɛ a gɛ́ɛ í ŋɔnîa-mɛnii kɔ́lɔŋ í Dɔ̃yâ Ɣalai káa í ǹá woo mɛni. 15Ya pâi kɛ̂i a ŋɔsêre núu kélee ŋɛ́i m̀ɛni-ŋai ya gáai mɛni ma, da nyíi-ŋai ya mɛnîi. 16Lé ƃé ya maa kpɛnîi? Ímu siɣe dí íbatâi kɛ́ ísɔnyɔ̂ŋ é wáa yâ, í Kúnuu-namui láa tóli.’

Dí Pɔ̂ɔ tòli a gɛ́ɛ é lí Zɛ̃tai-ŋai pɔ́

17“Ŋá pà pôlu Zerusâlɛŋ. Ŋ́gɛɛ Ɣâla fɛlîi Ŋ̀âla-pɛrɛ kɛ́tɛi mui, zĩa è tɛ̀ɛ a ńyãa. 18Ŋá Ǹúu-namui kàa gɛ́ m̀o ḿâ, ǹyɛɛi, ‘Gɛ́ lono í kúla Zerusâlɛŋ a m̀aa félaa, kpɛ́ni fêi, dífe pâi díyee seêi ísêre-wooi mu ḿaa mɛni ma.’ 19Ŋá mò, ǹyɛɛi, ‘Kúnuu-namui, dia kpîŋ dí gɔ́lɔŋ kpɔ́ a ǹɛ́lɛɛ a gɛ́ɛ ŋá lì Ŋ̀âla-fɛli kêre-ŋai kélee mu, diai làa a yái ŋá dípù kpini-pɛrɛ mu ŋá dílokwa. 20Tãi ísêre-faa-kɛ-nuui Tiƃiŋ ŋãai è kɛ̀ pûi lai, ŋá kɛ̀ máŋ tɔ̂ɔni nàa kɔlɛ ḿvaa mà. Ŋa díseɣe-ŋai mɛi kâa diai baai.’ 21Nya ƃe, e mò mâ, ǹyɛɛi, ‘Kula naa. Kpɛ́ni fêi, ŋa pâi ítɛɛ̂i kwaa kôya ma Zɛ̃tai-ŋai pɔ naa.’ ”

Pɔ̂ɔ káa ǹɔii maa kpɛ́-ƃelai mɛi-nuu kɛ́tɛi yêei ŋɛi-gao-kpɔnɔ ŋá

22Dí díwoli tɔ̀ɔ ma é lɛ́ɛ zu é ŋ̀óo-ŋai ŋí ƃó. Dí díwoo tɛ̀ ɣelêi, dîyɛɛi, “Ka ǹúu sîi ŋí kúla ǹɔii ma! Vé a sɛŋ a gɛ́ɛ é kɛ́ ɣele ma.” 23Dí kɛ̀ lâɣii díkɛ díseɣe-ŋai kpúmuŋ díkɛ muluŋ píli. 24Ǹɔii maa kpɛ́-ƃela mɛi-nuu kɛ́tɛi è mò a gɛ́ɛ dí pá la ǹɔii maa kpɛ́-ƃelai dítaai su a gɛ́ɛ dí m̀arê kɛ́ a ǹókwaa a gɛ́ɛ é m̀ɛnii kɔ́lɔŋ dí kɛ̀ lâɣii tí la mài. 25Dí Pɔ̂ɔ ɣìri a gɛ́ɛ dí ǹókwa. È mò ǹɔii maa kpɛ́-ƃelai mɛi-nuui ma nyíi kɛ̀ tɔ̂ɔni gɔlɛi, ǹyɛɛ mài, “Gáa a tɔ̂ŋ a gɛ́ɛ í Lomaŋ lɔii-loŋ lókwa, nyíi mɛni fé lɛɛ ní mai?” 26Ǹúu kɛ́tɛi kɛ́ɛ a mɛ̀nii, è lì ǹɔii maa kpɛ́-ƃelai mɛi-nuu kɛ́tɛi pɔ́-naa, ǹyɛɛ mài, “Lé ƃé yɛ̂ɛ í gɛ́i? Ǹalôŋ ŋí káa a Lomaŋ lɔii-loŋ.” 27Nya ƃe ǹɔii maa kpɛ́-ƃelai mɛi-nuu kɛ́tɛi è pà, ǹyɛɛ mài, “M̀ó ḿâ, íkaa a Lomaŋ lɔii-loŋ?” Ǹyɛɛ m̀ai, “Ooei.” 28Gɔkuluƃa-ŋai mɛi-nuu kɛ́tɛi è zu tòo, ǹyɛɛi, “Ŋá ŋálɔii-loŋ-laai yà a sɛŋ-kao kɛ́tɛ.”

Pɔ̂ɔ è zu tòo, ǹyɛɛi, “Kɛ́lɛ, dí ḿaa sɔlɔ ƃò a lɔii-loŋ.” 29M̀ɛni ma diai kɛ̀ pâi m̀arê kɛ̂i, dí dímaa kùla ma a maa félaa. Gɔkuluƃa-ŋai mɛi-nuu kɛ́tɛi máŋ è kɛ̀ yaôi, gɛ́ɛ a gɔ́lɔŋ a gɛ́ɛ Pɔ̂ɔ è kɛ̀ a Lomaŋ lɔii-loŋ, kpɛ́ni fêi, è dòo yɔlɔ ŋá.

Pɔ̂ɔ káa goyâŋ su-ƃelai ŋɛi tuɛ

30Bôlu ma ɣele ƃɔ́ɔi, ǹɔii maa kpɛ́-ƃelai mɛi-nuu kɛ́tɛi kɛ́ɛ kɛ̀ ŋ̀wɛ̂lii a gɛ́ɛ é m̀ɛnii kɔ́lɔŋ Zûu-ŋai dí mò a Pɔ̂ɔ láai, è Pɔ̂ɔ fùloŋ é m̀ó zâla láa soŋ-ƃela kpaya-kpayai dîa da goyâŋ su-ƃelai kélee a gɛ́ɛ dí díŋa tɛ́ díkîe ma. È pà a Pɔ̂ɔ é zee díŋɛi tuɛ.

Currently Selected:

Zia-ƃelai Kɛ́-mɛni-ŋai 22: KWB

Highlight

Copy