Zia-ƃelai Kɛ́-mɛni-ŋai 21

Pɔ̂ɔ è lì Zerusâlɛŋ

1Kú kúfɛ̀li dîa, kú píli yá ŋá-keleŋ su kú berei siɣe a zã́a kú pá Kôo. Bôlu ma ɣelei kú pà Lôo. Kú kùla naa kú lí Patara da Maira. 2Kú kéleŋ da kpɛ́ni kàa gɛ́ lì Fonisia, kú píli zu kú lí. 3Kú lɛ̀ɣɛ nɔ́ Sapɔrɔ ma, kú nàa lɛ̀ɛ kɔɔ-yee mɛi-pere kú lí Siria kú pîlaŋ Taya, kpɛ́ni fêi, è kɛ̀ a sɛŋ a gɛ́ɛ dí géleŋ su-sãai lɛ́ɛ naa. 4Kú Zîsɛ ŋɔpôlu-ƃelai kɔ̀ri naa kú díkaa. Kwa dîa-ni ku ɣele kûu lɔ́ɔlu mɛi feerɛ kɛ̀ naa. M̀ɔlêŋ sârai dí mò Pɔ̂ɔ ma a gɛ́ɛ vé lì Zerusâlɛŋ. 5Kúɣele kûu lɔ́ɔlu mɛi feerɛi kpɛɛ ŋá-ɣelei, kú kùla naa kú nâa kúsiai kúla. Zîsɛ ŋɔpôlu-ƃelai kélee, dínɛyâai da dínîa-pɛlɛɛi dí pà kútɔɔ̂i perei é lɛ́ɛ la zu kú kúla daai ma. Kú pɛ̀lɛ kúŋume ŋá zîŋ ma ku Ɣâla fɛli, kú kúfɛli kúkîe-ni dîa. 6Nya ƃe kú tɛ̀ géleŋ su, díaŋ dí lí pôlu dípɔ naa.

7Kú kúlaa Tayai, kú pìlaŋ Tolemai. Kú kula tí kúƃarâai dîa, kwa dîa-ni kú ɣele kûu tɔnɔ kɛ́ naa. 8Bôlu ma ɣele ƃɔ́ɔi kú kùla naa ku lí Sɛsɛria. Kú lɔ̀ Duŋ Lɛ́lɛɛi ƃó-nuui Fele ŋɔpɛ́rɛi mu, nyíi kɛ̀ a ǹúu lɔ́ɔlu mɛi feerɛi dɔnɔi. Kwa dîa-ni kú kɛ̀ naa. 9Ńônii-nɛyaai náaŋ dí kɛ̀ mà. Dífe niî kɛ̀ surɔ̂ŋ kula ní. Dí kɛ̀ a Ɣâla ŋɔlóno kɛ́-ƃela. 10Kúkɛɛ naa a ŋ̀ele kûu-ŋai tí, Ɣâla ŋɔlóno kɛ́-nuu tɔnɔ è kùla Zuda é pá, ǹáa ƃé kɛ̀ a Agabɔ. 11È pà kúpɔ, è Pɔ̂ɔ ŋɔseɣe mu ɣiri-ɣɛlii síɣe é gbɔɔ̂i kɔɔi ɣiri la da ǹyée, ǹyɛɛi, “M̀ɔlêŋ Maa Waai ƃé mò, ǹyɛɛi, ‘Bere ƃé Zûu-ŋai díkaa Zerusâlɛŋ da pâi nalôŋ ɣirîi la nyíi bɔ́ɔ ƃa zeɣe mu-ɣiri ɣɛlii ŋí. Da pâi dɛɛ̂i Zɛ̃tai-ŋai pɔ́.’ ”

12M̀ɛni-ŋai ŋí mɛniɛɛ kûɛ kwa diai kɛ̀ naai, kú Pɔ̂ɔ kpera fê a gɛ́ɛ vé li Zerusâlɛŋ. 13Kɛ́lɛ Pɔ̂ɔ è kúwoo su too, ǹyɛɛi, “Lé ƃé kákaa wɔ̂lɔi kákɛ ńii solii? Ŋ́gbîŋ fé kpɛtɛ ní nɔ́ a gɛ́ɛ dí ŋíri, kɛ́lɛ, ŋ́gbîŋ kpɛtɛ̂ɛi a gɛ́ɛ máŋ ŋá sáa Zerusâlɛŋ Kúnuu-namui Zîsɛ láai mɛni ma.” 14Gɛ́ɛ vé fáa ní kúwoo mai, kú tèe ma, kûɛi, “Tɔɔ Kúnuu-namui ŋɔnîa mɛnii é kɛ́.”

15Nyíŋi pôlu ma kú kúsãâi kpɛ̀tɛ kú lí Zerusâlɛŋ. 16Kwa Zîsɛ ŋɔpôlu-ƃelai, nyíi-ŋai kɛ̀ Sɛsɛriai da-ni kú lì. Dí lì a kúa Nesɔŋ ŋɔpɛ́rɛi lá a gɛ́ɛ kú nyíi naa. Nesɔŋ è kɛ̀ a Sapɔrɔ-nuu, gɛ́ ƃò a Zîsɛ ŋɔpôlu-ƃelai maa-ŋuŋ dɔnɔ.

Pɔ̂ɔ è Zĩi naa kàa

17Kúpaa Zerusâlɛŋ, kúƃarâai dí díyee sèe kúmu a lii-nɛ̃ɛ. 18Bôlu ma ɣelei kwa Pɔ̂ɔ-ni kú lì Zĩi pɔ-naa. Ǹúu pɔlɔ-ŋai kélee dí kɛ̀ naa. 19Pɔ̂ɔ è ǹá tì dîa, m̀ɛni-ŋai ƃò tɔnɔ-tɔnɔ Ɣâla è gɛ̀ Zɛ̃tai-ŋai sáma ǹyaa Pɔ̂ɔ ŋɔtíi sârai. 20M̀ɛni-ŋai ŋí mɛniɛɛ dîɛi, dí Ɣâla láa maa tɛ̀ ŋɔfólo-laai mɛni ma dîyɛɛ Pɔ̂ɔ mai, “Kúƃarâŋ, gáa berei Zûu-ŋai nyíi-ŋai laa-la káa díyêei dítâmaai la díkelee da dɔ̂ŋ soŋ a gbanaŋɔɔ. 21Da ímaa mɛni ƃó dîa a gɛ́ɛ íkaa sɛŋ lɛ̂i Zûu-ŋai kélee dîa nyíi-ŋai díkaa Zɛ̃tai-ŋai sámai, a gɛ́ɛ dí dípôlu tɔɔ Mose ma, íkɛ mò dîa a gɛ́ɛ dífe dílônii-sinaâi kpɛ̀tɛ, dí ƃó ŋɔ́nɔ dítûa-pere pɔlɔ-ŋai dîa. 22Lé ŋaŋ ƃa pɔ̂ri gɛ̂i? Tɔ̃yâ ma da pâi mɛnîi a gɛ́ɛ ya pá. 23M̀ɛni ma m̀ɛnii kwa mò yâi, gɛ́. Kpakolo náaŋ káa ƃɛ́ nyíi-ŋai díkaa kono-tee-woo tɔnɔ mui. 24Ǹûai ŋí síɣe ka dîa-ni ka kákpîŋ maa wáa, í dímaa-sɛŋ kɔlɛ a gɛ́ɛ dí díŋuŋ ƃo, a gɛ́ɛ ǹûai kélee dí gɔ́lɔŋ mɛni-ŋai dí mò dîa e pîlaŋ yâi gáa nɔ́ kpɛni-kpɛni. Kɛ́lɛ, yá kpîŋ íkaa siâi dɔ̂ŋ lá-woo ma íkɛ mɛi kâa. 25Kɛ́lɛ, à kɛ̀ a Zɛ̃tai-ŋai nyíi-ŋai laa-la káa díyêei, kwa kɔlɔ tɛ́ɛ dípɔ naa kúmɛni ŋá-teɛɛi pôlu ma a gɛ́ɛ dífe díyee pu sɛŋ kélee mɛni su nyíi da gula a sâla ɣâla da kpɛni-ŋa diai, da sua-ŋãa, da sua nyíi ŋãa káa zui. Dífe tela díyee pìli wulu-wulu kɛ́ mɛni da su.” 26Bôlu ma ɣelei, Pɔ̂ɔ è ǹúu náaŋ ŋí síɣe da dîa-ni dí díkpîŋ maa waa. Dí lì Ŋ̀âla-pɛrɛ kɛ́tɛi mu dí m̀o dîa ɣele kûu ɣɛɛlu ƃé da pâi ziɣêi íkpîŋ maa waa mɛnii ŋí é lɛ́ɛ pâi kpɛɛ̂i da zâlai da pâi gulâi dímɛni ma tɔnɔ-tɔnɔi.

Dí Pɔ̂ɔ sòŋ Ŋ̀âla-pɛrɛ kɛ́tɛi mu

27Ŋ̀ele kûu lɔ́ɔlu mɛi feerɛi kɛ́ɛ pâi kɛ̀ kpɛɛ̂i, Zûu-ŋai kùla Eesia kpiniŋ su dí Pɔ̂ɔ kàa Ŋ̀âla-pɛrɛ kɛ́tɛi mu. Nya ƃe dí ǹûai kélee líi mu siɣe dí Pɔ̂ɔ soŋ. 28Dí kɛ̀ lâɣii, dîyɛɛi, “Eezuɛ-ƃela, ka kpɔŋ kûa! Ǹalôŋ ká ŋí a sɛŋ lɛ́ nûa dîa kwaa kélee a gɛ́ɛ dí kúnûai kpɔara da dɔ̂ŋ, é pɛ́lɛ ƃɛ́ ma. Nyíŋi pôlu ma, a pá a Gurii-ŋa máŋ Ŋ̀âla-pɛrɛ kɛ́tɛi ŋí mu a gwaa ma maa waai ŋí naa kara.” 29Dí nyíŋi ƃò, kpɛ́ni fêi, dí Ɛfesɛ nuui Turofimɔ kàa da Pɔ̂ɔ dí kɛ́ ƃo daa kɛ́tɛi su. Dí kɛ̀ gâai Pɔ̂ɔ ƃé pà la Ŋ̀âla-pɛrɛ kɛ́tɛi mu. 30Daai su-ƃelai kélee dí kɛ̀ wúlee, dí kîrɛ siɣe gîe ma dí Pɔ̂ɔ soŋ dí ŋ̀ála dí gula Ŋ̀âla-pɛrɛ kɛ́tɛi mu. Dí gbôŋ lá tɛ̀ kpɔ́ a maa félaa. 31Díkɛɛ kɔ̂i a gɛ́ɛ dí baai, worɛ̂-woo è sèri ǹɔii maa kpɛ́-ƃela mɛi-nuu kɛ́tɛi ma a gɛ́ɛ Zerusâlɛŋ gwaa kélee è kɛ̀ wúlee. 32È lɔii maa kpɛ́-ƃelai mɛi-nuui è ǹyée mu-ƃelai da-ŋa sìɣe da dímɛi-ƃela dí lí naa a kîrɛ. Gɔkuluƃa-ŋai Tãi dí ǹɔii maa kpɛ́-ƃelai ŋí kàa la da dímɛi-nuu kɛ́tɛi, ǹûai dí nâa kpera Pɔ̂ɔ lókwaa ma. 33Gɔkuluƃa-ŋai mɛi-nuu kɛ́tɛi è pà é zoŋ é m̀ó a gɛ́ɛ dí yɔlɔ feerɛ pu ma. È kɛ̀ ŋ̀wɛ̂lii é gɔ́lɔŋ ǹúui Pɔ̂ɔ è kɛ̀ lai da m̀ɛnii è gɛ̀i. 34Gbɔŋ su-ƃelai da-ni dí lòno a da kpɛ́ni, gbéli-ŋai dí lóno a da kpɛni. Gɛ́ɛ vé m̀ɛnii ŋí ŋá káa ní, kpɛ́ni fêi, ǹyóo-yooi è kɛ̀ a gɛ́tɛi, è gɛ̀ a gɛ́ɛ dí lí a Pɔ̂ɔ ǹɔii maa kpɛ́-ƃelai dítaai su. 35Díseriɛɛ a Pɔ̂ɔ bɛ́rɛi lái, ǹɔii maa kpɛ́-ƃelai dí dímu sìɣe a gɛ́ɛ dí lɔ́ la, kpɛ́ni fêi, ǹyóo-yooi kɛ̀ gbɔŋ sui è kɛ̀ a zu kɛ́tɛ. 36Gbɔŋ su-ƃelai dí pìlaŋ bôlu díkɛ làɣi, dîyɛɛi, “Ka bàa!”

Pɔ̂ɔ è gbîŋ maa kɔ̃ɔ

37Díkɛɛ pâi lɔ̂i a Pɔ̂ɔ bɛ́rɛi mui, è mò ǹɔii maa kpɛ́-ƃelai mɛi-nuu kɛ́tɛi ma, ǹyɛɛi, “Ŋa pɔ̂ri lônoi ípɔ?” Ǹyɛɛ mài, “Ya Gurii-woo ƃo? 38Gɛ̀ ní Ize-nuui fa ya, nyíi núu paa-ƃela kɛ̀ dí kɔ́ gɔmɛnɛi pɔ́i, é lí a ǹúu paa-ƃelai ŋɔwála náaŋ vɛ̃ɛ-kpâlaŋ sui?” 39Pɔ̂ɔ ǹyɛɛ mài, “Ŋ́gaa a Zûu-nuu. Ŋa kùla Taasɔ taa-lee kɛ́tɛi su, Sɛlisia lɔii su. Ŋa íkpera fêi a gɛ́ɛ í ǹɛɛ naa ŋá lóno ǹûai pɔ́.”

40Gɔkuluƃa-ŋai mɛi-nuu kɛ́tɛi kɛ́ɛ a fáa Pɔ̂ɔ wóo mai, Pɔ̂ɔ è tɔ̀ɔ bɛ́rɛi lá é ǹyée sã́a gbɔŋ mɛi a gɛ́ɛ dí dímɛi sáa. Gbɔŋ su-ƃelai kɛ́ɛ da dímɛi saai, è lòno dípɔ Ibulu-wooi su ǹyɛɛ dîai,

Currently Selected:

Zia-ƃelai Kɛ́-mɛni-ŋai 21: KWB

Highlight

Copy