Zia-ƃelai Kɛ́-mɛni-ŋai 18

Pɔ̂ɔ káa Kɔleŋ

1Nyiŋi pôlu ma, Pɔ̂ɔ è kùla Atɛŋ è pà Kɔleŋ.

2È Zûu naloŋ tɔnɔ kàa naa. Ǹáa ƃé kɛ̀ a Akoila. È kɛ̀ a Pɔŋtɔ taai su-ƃelai da. Da ŋɔnɛnîi Purisela díkulaa kɛ̀ Etelei naa fé niî kɛ̀ tûa ní, kpɛ́ni fêi, Gâloŋ Kilaudiɛ è tɔ̂ŋ tɛ̀ɛ a gɛ́ɛ Zûu-ŋai kélee dí kúla Luŋ. Pɔ̂ɔ è lì a gɛ́ɛ è díkaa. 3Da dîa-ni dí kɛ̀ naa díkɛ tíi kɛ̀ gîe ma. Ƃûu tɔɔ tii ƃé ŋɔkɛ-ɣeniɛi kɛ̀ zu. 4È lòno ǹûai pɔ́ Ŋ̀âla-fɛli-kerei mu-ƃelai a Vii-tɔɔ-ɣelei kélee. È Zûu-ŋai da Gurii-ŋai líi kùla dí dílii maa fáleŋ.

5Salɛ da Temete dí kúlaa Masadoniai, Pɔ̂ɔ è kɛ̀ Ɣâla-woo ƃôi kpɔ́ a gbanaŋɔɔ, gɛ́ mò Zûu-ŋai dîa a gɛ́ɛ Zîsɛ káa a Kôrai. 6Dí tɔ̀ɔ Pɔ̂ɔ ma dí tɛ-ŋɛi kɛ́ la. È ŋɔseɣei kpúmuŋ, ǹyɛɛ diai, “Káŋãai mɛni é kɛ́ káa kpîŋ káŋûa! Ḿaa waâi. Ŋa pá liî Zɛ̃tai-ŋai pɔ́ pere.” 7Nya ƃe è kùla naa é lí nalôŋ tɔnɔ ŋɔpɛ́rɛi mu. Ǹáa ƃé kɛ̀ a Tâitiɛ Zɔsitɔ. Ǹalôŋ ŋí è kɛ̀ a Ɣâla fɛli-nuu. Ŋɔpɛ́rɛi è kɛ̀ Ŋ̀âla-fɛli-kerei kɔlɛ. 8Ŋ̀âla-fɛli-kerei mɛi-nuui Kulepɔ è làa a Kúnuu-namui da ŋɔpɛ́rɛi mu-ƃelai kélee. Kɔleŋ-ƃelai dámaa dí Pɔ̂ɔ wóo mɛni dí láa la dí batâi sɔlɔ ƃó.

9Kúnuu-namui e mò Pɔ̂ɔ ma zîa su a kpini tɔnɔ, ǹyɛɛ, “Ífe yào, kɛ́lɛ, lóno, ífii fe kpɛ̀ɛ; 10kpɛ́ni fêi, ŋ́gaa íkɔlɛ. Nùu da fa pɔ̂ri ísonîi e mɛni ŋánaa kɛ́ a yá; kpɛ́ni fêi, núu támaa káa ńyêei daai ŋí su.” 11Nya ƃe e Ɣâla ŋɔwóoi ƃo naa ǹûai sama a kóraŋ tɔnɔ ɣáloŋ lɔ́ɔlu mɛni da.

12Galio kɛ́ɛ a gɔmɛnɛ-nuu Ɛkeya-lɔii mɛi. Zûu-ŋai dí díwoo kɛ̀ zu tɔnɔɔ dí tɔ́ɔ Pɔ̂ɔ ma, dí zoŋ dí pá la mɛni-ƃo-kerei mu. 13Dí mò, dîyɛɛi, “Ǹalôŋ ŋí a nûa kɛ̀ dí dílii maa fáleŋ díkɛ Ɣâla fɛli, nyíi ve dɔ̂ŋ lá-woo mai.” 14Kɛ́lɛ, tãi Pɔ̂ɔ è kɛ̀ pâi ǹá ƃôi la a gɛ́ɛ e lónoi, Galio e mò Zûu-ŋai dîa, ǹyɛɛi, “Mɛnii ŋí eêi kɛ̀ a mɛni nyɔ́mɔɔ, kpaa máŋ mɛni nyɔ́mɔɔ kɛ́tɛ, ŋâi pɔ̂ri ńii kpelêi ŋa fáa káwoo ma, Zûu-ŋa; 15kɛ́lɛ, à kɛ̀ gáa a mare-kɛ̂ɛ é pîlaŋ wóo-ŋa dîa da láa-ŋa, é pɛ́lɛ kákpîŋ tɔŋ ma, ka m̀ɛni su káa káa kpîŋ kpɛ́ni fêi, mɛni kɛ́ɛ tí ŋáa tée-nuu fa ńyãa.” 16Nya ƃe e díkpɛ̀ mɛni-ƃo-kerei mu. 17Nya ƃe díkelee dí Soteni soŋ, nyíi kɛ̀ a Ŋ̀âla-fɛli-kerei mɛi-nuui, dí ǹókwa mɛni-ƃo-kerei lá. Kɛ́lɛ, Galio fe ŋ̀óli tɔ̂ɔni ma.

Pɔ̂ɔ è lì pôlu Ɛŋtiɔ

18Nyíŋi pôlu ma Pɔ̂ɔ e ɣele kûu támaa kɛ̀ naa. Nya ƃe e m̀arâai lɛ̀ɛ naa e yá ŋá-keleŋ siɣe da Purisela e pɛlɛ Akoila ma dí li Siria. E ŋuŋ ƃo Sɛ̂ŋ kula, gono-teei mɛni ma e gɛ̀i. 19Dí pà Ɛfesɛ Pɔ̂ɔ e dílɛɛ naa; kɛ́lɛ, ǹyaa kpîŋ e lɔ̀ Ŋ̀âla-fɛli-kerei mu da Zûu-ŋai díkɛ sîa too. 20Tãi dí m̀arê kɛ̀ la a gɛ́ɛ da dîa-ni dí kɛ́ naa a tãi su kôyai, ve gɛ̀ ní; 21kɛ́lɛ, e vɛli dîa, ǹyɛɛi, “Ɣâla à fàa ma, ŋa pâi pâi pôlu kápɔ naa.” E nâa kɛ̀ ti e yá ŋá-keleŋ siɣe e kúla Ɛfesɛ.

22Tãi géleŋ e sèri la a Pɔ̂ɔ Sɛsɛriai, è lì e ǹá ti Kôrai-toli-kpɔŋ su-ƃelai dîa, é tɛ́ɛ é yéŋ Ɛŋtiɔ. 23Gɛ́ɛ a tûa naai, è kùla naa é lí Galesia da Fagia-lɔii su gwaa kélee. E lì gwaa-ŋai ŋí ma tɛi-tɛi gɛ́ Zîsɛ ŋɔpôlu-ƃelai su kpanaŋ.

Apolo e Ɣâla-woo ƃò Ɛfesɛ

24Nya ƃe Zûu-naloŋ tɔnɔ da kâa dòli a Apolo, nyíi kɛ̀ a Alezaŋdura nuui, è pà Ɛfesɛ. È kɛ̀ kpɔ́ a lóno-nuu lɛ́lɛɛ, gɛ ƃo ŋɔ́nɔ a Ŋ̀âla-kɔlɔi kɔlɔŋɔɔ a ǹɛ́lɛɛ. 25Dí mɛni támaa lɛ̀ nalôŋ ŋí ma e pîlaŋ Kúnuu-namui ŋɔperei ma. Ŋɔmɔ̂leŋ láa è kɛ̀ a vɛ́ɛ kpɔ́. Nya ƃe è lòno gɛ sɛŋ lɛ a zã́a e pîlaŋ la Zîsɛ maa mɛni-ŋai dîa, berei máŋ è kɛ̀ nɔ́ a Zɔ̂ŋ ŋɔbatâi maa mɛni kɔlɔŋɔɔ lai. 26E nâa pɛ̀lɛ lônoi kpɔ́ a lii-kpele-pere Ŋ̀âla-fɛli-kerei mu. Tãi Akoila da Purisela dí nalôŋ ŋí wóo mɛ̀ni lai, dí zìɣe dí Ɣâla-mɛni lɛ́ mà a zã́a e tɛɛ berei ma è kɛ̀ a gɔ́lɔŋɔɔ lai. 27Apolo kɛ́ɛ kɛ̀ ŋ̀wɛ̂lii a gɛ́ɛ é tɛ́ɛ naa é lí Ɛkeyai, m̀arâai dí vɔrɔ-woo ƃo dí kɔlɔ pɔ̃yɛ Zîsɛ ŋɔpôlu-ƃelai pɔ́ naa kɛ̀ naai, a gɛ́ɛ dí díyee see mu a ǹɛ́lɛɛ. Zeriɛ́ɛ naai, è kpɔ̀ŋ dîa a dámaa diai laa-la è kɛ̀ díyêei Ɣâla ŋɔƃɛlɛ-seei sârai. 28È sîa tòo kpɔ́ Zûu-ŋai lá a gbanaŋɔɔ gbɔŋ su. È nɛ̀ dîa Ŋ̀âla-kɔlɔi su a gɛ́ɛ Zîsɛ è kɛ̀ a Kôrai.

Currently Selected:

Zia-ƃelai Kɛ́-mɛni-ŋai 18: KWB

Highlight

Copy