Samia Maa-ŋuŋ 2
2
Ana è Ɣâla láa maa tɛ̀
1Ana è Ɣâla láa maa tɛ̀ ǹyɛɛi,
“Ńii nɛ̃ɛ̂i Ɣâla Yâwɛɛ sârai.
A ŋuŋ ma ƃô tɛ̀ɛ ḿbɔ.
Mɛni ma ŋa pɔri lii-nɛ̃ɛ kulâi,
ŋá ɣɛ́lɛ ŋ́gbɔara-ƃelai dîa.
2“Sɛŋ da fé naa maa waa yɛ̂ɛ Yâwɛɛ.
Sɛŋ da fé naa é kúla bôlu.
Kɔni da fé naa é kpanaŋ yɛ̂ɛ ǹyaa.
3Zu mɛni kɛ̂tɛ-ƃelai, ka tée su mɛni kɛ̂tɛ ma,
ka kpera yoŋka têei.
Yâwɛɛ káa a táre Ɣala.
È m̀ɛni-ŋai kélee kɔ́lɔŋ kwa gɛ̂i, ǹyaŋ a pâi díŋa têei.
4A ŋ̀wála-wâla-ƃelai díkpalai ŋá ɣále.
Kɛ́lɛ a kpɔŋ mâa tɛ̀ɛ diai pɔ́ pɔri ḿâa fé dîɛi.
5Diai mii-sãa támaa è kɛ̀ díyêei
da fé ŋɔ́nɔ díyêei.
Diai puru è kɛ̀ díkɛ̂i dípelaâi.
Gbóma-nɛnii aâ lóŋ lɔ́ɔlu mɛi-feerɛ maa sɔlɔ ƃó.
Kɛ́lɛ ǹɛnîi lóŋ támaa è kɛ̀ ǹyêei da fé ŋɔ́nɔ ǹyêei.
6Yâwɛɛ a fúlu-laa siɣe gɛ̀ pà pôlu a fúlu-laa.
A núu tɛ̀ɛ saa táa,
é ŋɔ́nɔ pá la pôlu fúlu-laa su.
7Yâwɛɛ a kôlo-nuu kpɛ̀tɛ gɛ́ tɔɔ-nuu kpɛ̀tɛ.
A núu maa tɛ̀ gɛ́ núu maa yêŋ.
8A gôlo-ƃelai tɛ̀ ɣelêi.
A kwaa ma tɛ̀ɛ dîai pɔ́ díkɛ̂i fé mai.
A dísiɣe yɛ̂ɛ kâloŋ lonii
é dísee ƃaa-kɛ́-maa see-sɛŋ ŋá.
Yâwɛɛ ƃé ǹɔii kpɛ̀tɛ,
ǹyaŋ zãâi kélee zui, gáa a bɔ́ɔ.
9“A pâi dɔ̃yâ-ƃelai mɛi kâai.
Kɛ́lɛ a pâi zɔnyɔ̂ŋ-ƃelai tɛɛ̂i kpînii.
Díta fé pâi pɔrîi ŋɔkpɔara-nuu yée mɛi ɣâlei a gbîŋ wala-wala.
10Yâwɛɛ a pâi ŋɔkpɔara-ƃelai su karâi.
A pâi dísu karâi a ɣele gbâna ŋɔŋ.
A pâi pâi a mɛni ŋá téɛɛ ŋ̀éniɛi gwaa kélee.
A pâi wála-wala da kponoi-kpanaŋ tɛɛ̂i ŋɔwɛli kɛ́-maa-ƃelai pɔ́.”
11Nya ƃe Ɛɛkena è lì bɔ́-naa Lama. Ǹolôŋ è lɛ̀ɛ Ilai yêei gɛ́ tíi kɛ̀ Yâwɛɛ ŋɔpɛ́rɛi mu.
Ilai ǹônii-sinaai
12Ǹyaŋ Ilai ǹônii dí kɛ̀ a sɔnyɔ̂ŋ-ƃela. Ƃaa kɛ́ maa fé kɛ́ ní díyêei Yâwɛɛ mɛni ma. 13Núu da a kâa fɛnɛ-sɛŋ sala kùla Yâwɛɛ ma, Ilai ǹônii-sinaai da kâa díyee mu-nuui tɛ̀ɛ a wúru ŋá seniɛ́ɛ taɣaŋ lá-ƃoɔɔ, ǹáoi à kɛ̀ nɛ̂nii, 14é ǹɔ́ ǹeɣii su. Zuai nyíi kélee a lɛ̀ɛ ŋ̀úrii ŋái gáa a Ilai dípɔɔ. Bere ƃé da kâa tûa la a Eezuɛ-ŋai nyíi-ŋai da kâa pà sâla kulâi Silo. 15É kúla nyíŋi pôlu, tãi da dílɛɛ pâi zua wulɔi kêrenii, zâla-laa soŋ-nuui-laa-soŋ nuui yée mu nuui a pâ ǹúui pɔ́-naa zâla-laa soŋ-nuuii kulâi ǹyɛɛ m̀ai, “Sua tɛ́ɛ ḿbɔ ŋá ŋɔŋ zâla-laa soŋ-nuui láa-soŋ-nuui mɛni ma. Vé wɛ̂lii a sua ɣíliɛɛ, fɛ̂ɛ nɔ́ sua ŋunu.”
16À kɛ̀ maa-nuui à mò ma ǹyɛɛi, “Ǹɛɛ naa dí zua wulɔi kéreŋ a maa-ŋuŋ, gɛ̀ ní nyíi kélee ya ŋ̀wɛ̂lii ya pɔri ziɣêi.” A mò ma ǹyɛɛ, “Kpao, fɛ̂ɛ nɔ́ ya dɛɛ ḿbɔ. À wàla kɛ́ tí, ŋa pâi ziɣêi a wála-wala laa.”
17Ǹûai ŋí dísɔnyɔ̂ŋ su è kɛ̀tɛ Yâwɛɛ ŋɛ́i. Dí Yâwɛɛ ŋɔsama-sãai kɛ̀ a dínîa-pere.
Samia káa Silo
18Samia è kɛ̀ tíi kɛ̂i Yâwɛɛ ŋɔpɛ́rɛi mu seɣe-ƃela kpíniŋɔɔ ǹeŋei. 19Ǹee a kâa yokpo loŋ sɔ̀lɔ mì a kóraŋ kélee da ŋɔsurɔ̂ŋ da kɛ̀ liî Silo góraŋ salai kulâi é lí la é dɛ́ɛ bɔ́. 20Gɛ̀ ní Ilai a lûwa làa Ɛɛkena ma da ŋɔnɛnîi Ana ǹyɛɛ dîai, “Tɔɔ Yâwɛɛ é nîa-pɛlɛɛ támaa tɛ́ɛ kápɔ Samia pɔ́ɔ ŋá nyíi ká dɛ̀ɛ Yâwɛɛ pɔ́i.”
À kɛ̀ tí, da lî pôlu dípɔ-taai.
21Ǹyaŋ Yâwɛɛ è Ana naa kàa. Nya ƃe Ana è lônii-sinaa saaƃa maa sɔlɔ ƃò da nɛyâa-nɛyaa feerɛ. Kɛ́lɛ Samia è kɛ̀ Yâwɛɛ ŋɔpɛ́rɛi mu.
Ilai è ǹônii-sinaai lia-woo ƃò
22Ilai è kɛ̀ a bɔlɔɔ a ŋ̀ánaa gɛ́ m̀ɛni-ŋai mɛ̀ni ǹônii da kâa kɛ̀ gɛ̂i a Eezuɛ-ŋai. È m̀ɛni a gɛ́ɛ da kâa kɛ̀ nyiî a ǹɛyâai kɛ̀ tíi kɛ̂i Yâwɛɛ ŋɔpɛ́rɛi mui. 23È mò dîa ǹyɛɛi, “Ka mɛni-ŋai ŋí kɛ̂i lé mɛni ma? M̀ɛni nyɔ́mɔɔ-ŋai kélee ka gɛ̂i nûa da ƃôi ḿâ. 24Ńônii, mɛni-ŋai Yâwɛɛ ŋɔnûai da môi é pîlaŋ kâai vé lɛ́lɛ ní. 25À kɛ̀ núu da a sɔnyɔ̂ŋ kɛ̀ a m̀arâŋ-nuu Ɣâla a lɔ̂ díloai. Kɛ́lɛ núu da a sɔnyɔ̂ŋ kɛ̀ a Yâwɛɛ gbɛ̂ɛ ƃa lɔ̂ díloai?”
Kɛ́lɛ dífe díwoli tɔɔ ní dínâŋ ma. Ǹyaŋ Yâwɛɛ è gbɛ̀tɛ a gɛ́ɛ é dípaa.
26Samia è kɛ̀ nɔ́ ƃɔlɔ̂i Yâwɛɛ da núu-kpune dílii-laai su.
Ŋ̀âla-wooi dɔɔ̂i Ilai ŋɔkáa-laai su-ƃelai dîai
27Nya ƃe ɣele tɔnɔ da Yâwɛɛ ŋɔlóno kɛ́-nuui dɔnɔ è pà Ilai pɔ́-naa ǹyɛɛ m̀ai, Yâwɛɛ ǹyɛɛi, “Ŋ́a ŋ́gbîŋ lɛ̀ ínâŋ-ni dîa díkɛɛ Ize kaloŋ yée mu Izei. 28Maa tãi tí, ŋá Eelɔŋ da ŋɔsuui sìɣe zu Eezuɛ sii-ŋai kélee sáma ŋá díkɛ a ŋásâla láa soŋ-ƃela díkɛ sâla kùla ŋáteƃelei ma, díkɛ kéreŋ-sãa kúŋ nɛ̃ɛ kèreŋ naa, díkɛ zâla-laa soŋ-nuui kula seɣe-ŋai tòo dîa. Ŋá ŋɔŋ sâla sãai kélee da tɛ́ɛ dípɔ Eezuɛ. 29Kɛ́lɛ ya ƃaa-kɛ maa tɛ́ɛ ílônii pɔ́ a tɛɛ ḿâ. Ífe ŋɔ́nɔ íyee seêi ŋásâla kula mɛni-ŋai da ŋásama-sãai mu. Ka zãai ŋí ǹɛ́lɛɛ-ŋai kélee sìɣe nɔ́ kákpîŋ mɛni ma ka ílônii. 30Mɛni ma, Ńyãa Yâwɛɛ, Eezuɛ-ŋai Díɣâlai, ŋá ŋ́gono tèe a gɛɛ ínûai da ínâŋ-ni dínûai da pâi kɛ̂i a ŋásâla láa soŋ-ƃela wɔ́lɔ-wɔlɔ da wɔlɔ-wɔlɔ. Kɛ́lɛ ŋa môi yâ a gɛ́ɛ dîai nɔ́ da ƃaa-kɛ́-maa tɛ̀ɛ ḿbɔi, dia nɔ́ ƃé ŋa pâi ńyee seêi dímu ŋá dîai kula maa kɛ́ da tɔ̂ɔ ḿâi. 31Ŋa m̀ôi yâ ɣele da a pâi ŋa pâi ínuu suui kélee su-karâi. Káta fé ŋɔ́nɔ pâi kɛ̂i a ŋásâla láa soŋ-nuu. Ínûai kélee da pâi saâi dísaa tãi é lɛ́ɛ pâi serîi. Ínûai da fé pâi lɛɛ̂i ɣele ma é pɔlɔ. 32Lii-too pôlu támaa a pâi pâi ípɔ. Yà Eezuɛ-ƃelai kpéli-ŋai kàa mɛni lɛ́lɛɛ támaa su, kpɔara a pilîi ílii su. Kɛ́lɛ ínûai da fé pâi lɛɛ̂i ɣele ma é pɔlɔ. 33Ínuui nyíi ŋa pâi ŋ̀ɛ́i malôŋ kâai a gɛ́ɛ é lɛ́ɛ ŋápɛrɛi mui, a pâi kɛ̂i a m̀alôŋɔɔ, ǹíi toɔ́ɔ pôlu. Kɛ́lɛ ínûai kélee da pâi ƃóa-sɔ̂kpɔ saa kɛ̂i. 34Ílônii-sinaa feerɛi, Ofini da Finiɣa da pâi saâi a ŋ̀elei tí, nyíi pâi kɛ̂i a mɛnii ŋí maa ŋɛi-kɛ-maa maai. 35Ŋa pâi núu da kpɛ́ni siɣêi gɛ́ ƃò a ŋásâla láa-soŋ-nuu. A pâi kɛ̂i a ǹúui nyíi teniŋ ƃó-nuu gɛ́ ŋ́oo mɛni. Ǹyaŋ ŋa pâi ŋɔsuu kɛ̂i ma díkɛ ƃò a sâla láa soŋ-ƃela ŋákâloŋ ŋá zìɣe mɛni ma. 36Ǹyaŋ dîai pâi lɛɛ̂i ípɛrɛi mui da pâi pâi díkɛ zâla-laa soŋ-nuui láa soŋ-nuu kpera fê gôo da kpólo-kpua mɛni ma. Da pâi môi mà máŋ dîyɛɛi, ‘Ǹɛɛ naa kúkɛ a zâla-laa soŋ-nuui láa soŋ-ƃelai da a gɛ́ɛ kúkɛ mii-sɛŋ sɔlɔ ƃô kúkɛ mìi.’ ”
Currently Selected:
Samia Maa-ŋuŋ 2: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
