Rut 4
4
Re' noq xub'an kaxáro i Booz ruuk' i Rut
1Chi riij i re', re' i Booz xooj rutzunaa' riib' panookb'al reh i tinamit re' inkimol wii' kiib' i tinamit. Eh chupaam i jumehq' re' re' xik'ik i winaq ma' tokoom ta ruuk', re' i xuq'or pampeet, je' wili i xuq'or reh:
Kim ayu' i hat anq'or aweh ti tzuun wuuk' ayu', inki.
Re' i ma' tokoom ta ruuk' xooj wo' rutzunaa' riib' ruuk'. 2Chi riij i re', re' i Booz xuyuq'eej taqe reje i lajeeb' chi winaq re' ruuk' taqe i k'amal b'eeh chupaam i tinamit re' re', xuq'or keh chi naa kitzuhnik i koq ruuk'.
Eh noq tzunulkeeb' chik i koq ruuk', 3re' i Booz je' wili i xuq'or reh i winaq ma' tokoom ta ruuk':
Re' Noemí xsutinik wo' chik cho Moab, naa ruk'ayem i ye'aab' reh naq i Elimelec re' i ma' tokoom ta quuk'. 4Re' hin inwaaj chi neenanab'eej ruum wila' re' hat i naawaaj aloq'om neerub'an chi neenaloq' yu'naak chikiwach taqe i k'amal b'eeh chupaam i tinamit, ruum re' hat xti ma' najt ta hat tokoom ruuk' i Elimelec i ruk'ul chi hat naa aloq'wiik reh.
Eh wila' ma' xawaaj aloq'om cha q'or weh reh chi nee nuloq' i ye'aab' re' re' i hin i ruk'ul wo' chi naa nuloq'om i hin, ruum ma' hin ta wo' tokoom ruuk', inki. Re' i ma' tokoom ta ruuk' je' wili i xuq'or: Neenuloq', inki.
5Eh re' i Booz xuch'ob' rub'ehel reh i ma' tokoom ta ruuk', je' wili i xuq'or reh:
Xa re' la' chanab'eej chi wila' xaloq' reh i ye'aab' i Noemí inkahnik cha naah chi naa a'nam kaxáro ruuk' i Rut, reh chi re' ye'aab' xa nee wo' inkahnik parub'ihnaal i kamnaq rub'ahiil, inki.
6Eh re' i ma' tokoom ta ruuk', je' wili xuq'or:
Wila' je' re', re' hin ma' nwaaj ta chi neen wihik nuk'axkiil ruuk' taqe i nukooch. Eh wila' re' hat inawaaj aloq'om neerub'an, re' hin neenuyeew q'ab' aweh chi neenawehchaaj inanaq wehchaam, i hin inki.
7Eh chupaam taqe q'iij re' re' ar Israel okrinaq taqe chi awach i ruk'ayej i ruye'aab' reh i ma' tokoom ta ruuk' korehtaal i ruk'ul riib' i kiq'oral. Eh awach i naa ruk'ayiniik reh naa resam chaloq chi rooq jinaj i ruxijab' naa ruq'asam reh i naa ruloq'wiik reh.
8Re' i ma' tokoom ta ruuk' i Booz xresaj chaloq jinaj i ruxijab' chi rooq xuq'asaj reh i Booz, je' wili i xuq'or reh:
Hiy chaloq' i ye'aab' re' re' i hat, inki.
9Eh re' i Booz je' wili i xuq'or keh taqe i kik'amwik rub'eeh i tinamit, je' wo' keh chu'nchel wilkeeb' ar:
Yu'naak taq i hat xawilow taq chi xye'arik q'ab' weh chi re' hin naa nuloq'wiik reh i ruye'aab' i Noemí, re' i kiye'aab' naq i Elimelec, Quelión, Mahlón. 10Eh xawilow wo' taq chi naa nub'anam kaxáro ruuk' i Rut i aj Moab re' i rukanaam kahnoq i Mahlón reh chi konaa ruwihiik ruha'lak'uun wuuk' parub'ihnaal i kamnaq rub'ahiil re' i Mahlón. Chi je' re' ma' nee ta insahchik wach i rub'ihnaal chi kixilak taqe i awach reh, je' wo' chupaam i tinamit wili, chu'nchel i re' xawilow xab'iraj taq yu'naak noq xkorjik wach, inki.
11Eh chu'nchel i tinamit ruch'ihil taqe i k'amal b'eeh ar je' wili ruchaq'weesjiik i Booz xkian:
Korik noq xqilow. Neeta naq i ruyeew q'ab' i QaJaaw Dios, eh nee ta naq ink'acharik nee ta naq inwihik awak'uun awixq'uun ruuk' je' rukab' noq xk'acharik i Raquel ruch'ihil i Lea, re' taqe i qaa'qi'sil chi qunchelaal i hoj, hoj aj Israel. Eh re' hat nee ta naq inwihik awajaawriik, nee ta naq i naab'jik awach ayu' Belén, eh Efrata. 12Eh nee ta naq inwihik runimaal kiwach taqe awak'uun awixq'uun neen wihik ruuk' i Rut, je' rukab' noq xwihik runimaal kiwach taqe rak'uun rixq'uun i Fares re' xwihik cho ruuk' i Tamar, re' Fares rak'uun Tamar ruuk' i Judá, je' ta naq re' i neerub'an cha wuuk' i QaJaaw Dios, inki taqe.
13Je' aj re' noq re' Booz xub'an kaxáro ruuk' i Rut, xutik'aa' k'acharik ruuk'. Eh xponik i q'iij noq re' i QaJaaw Dios xuyeew q'ab' chi xkahnik wach k'achariik i Rut, eh x-aasjik jinaj rak'uun.
14Xkilow chi je' re' taqe ixoq je' wili i xkiq'or reh i Noemí: Loq'imaj ta naq i QaJaaw Dios ruum xuyeew jinaj awiih aamaam re' i naa rilwiik aweh, nee ta naq i naab'jik wach chi korik chupaam i qatinamiit i hoj aj Israel. 15Re' awiih re' re' naa ruye'wiik rukowiil ak'ux, eh naa kaat ruk'uxlaam pan arijb'iil, ruum re' re' rak'uun i xwihik cho chi awil-iib', xiik' naa loq'il chawach, ma' xata je' loq'il wuquub'-oq chi awak'uun.
16Eh re' Noemí xuk'ul i ha'lak'un xuq'ahcheej, eh re' reh xq'uninik reh.
17Noq xkilow chi je' re' taqe i ruka'jaah ixoq je' wili xkiq'or: Re' Noemí x-aasjik jinaj k'isa rak'uun, eh Obed i rub'ihnaal i xkikoj, re' i rajaaw chaloq i Isaí, rumaam chaloq i David.
Re' wili taqe i rak'uun i riih rumaam Fares
18Re' taqe wili i rak'uun i riih rumaam Fares. Re' Fares re' rajaaw i Hezrón. 19Re' Hezrón, re' rajaaw i Ram. Re' Ram re' rajaaw i Aminadab. 20Re' Aminadab re' rajaaw i Naasón. Re' Naasón re' rajaaw i Salmón. 21Re' Salmón re' rajaaw i Booz. Re' i Booz re' rajaaw i Obed. 22Re' i Obed re' rajaaw Isaí. Re' Isaí re' rajaaw i David.
Currently Selected:
Rut 4: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.