Sal 74
74
Re' reey David xupanqaaj ree Dios parutiij chi naa rehtesjiik panti' k'axik i rutinamiit
1QaJaaw Dios, ¿Chib'ih reet noq xoj akanaa' chi qutkeel chi jumpech?
¿Chib'ih reet noq yohb'aal wach aajosq'iil chi qanaah i hoj, i hoj atentzuun noqwilkooj?
2K'oloq cho panak'ux re' aatinamiit re' i xa wehchaaj cho pampeet.
Eh xawesaj cho panti' k'axik reh chi xakoj haa' chi junch'uq taqe chi aatinamiit.
Eh k'oloq panak'ux i ye'aab' Sión re' i ti wihik wii'.
3Chawilow nik' wach noq xyojib'ik wach aatinamiit.
Re' aj ixowaal sachwik wach chu'nchel
chib'ih jariik wilik chupaam asantolaj ye'aab'.
4Re' taqe i ki-ixowanik awach xi okik panapaat,
k'erlik kichii' chuq'orariik chi xi elik korik.
Eh kikojom chik rehtalil chi keh chik.
5Eh xa je' chik rukab' noq kiokik chuyok'ariik i rax chee'
ruuk' ikej inki a'n reh i ookb'al chupaam aaye'aab'.
6Re' taqe i och'imaj wach chee' kojooj
reh i paat xkipaxej ruuk' ikej, je' wo' ruuk' tuhyb'al kalawux.
7Eh xkikoj ruq'aq'al i asantolaj ye'aab'.
Xkian i re' ma' re' chupaam aapaat, eh xkikutib'eej wach ak'al.
8Xkaaj naq kisacham wach chu'nchel i chib'ih qeh,
xkik'atib'eej chu'nchel i ye'aab' tiqaloq'ej wii', wilkeeb' chupaam i tinamit.
9Ma' awach ta chik ink'uhtanik qeh jino'q i ehtalil,
ruum ma' jino'q chik i jalal ruq'oral i Dios.
Eh ma' jino'q imb'inik reh nik' chik najtiil naa qak'ulum i wili.
10QaJaaw Dios, ¿Nik' chik najtiil naa qak'ulum i ti' k'axik pan q'ab' i aj ixowaal re' re'?
Eh ¿Kojaruuj i rukanaa' i ma' holohik ta laj q'orik chawiij i hat?
11¿Chib'ih reet noq ma' nak'uhtaaj reh aajosq'iil?
¿Chib'ih reet noq xak'ahchi' akanaam chi je' re' i rub'an?
12QaJaaw Dios, re' hat xa najtir wo' cho q'iij hat nureey.
Xa re' wo' hat, ti ko'linik pan kiq'ab' i aj ixowaal chi junsuut i wach ak'al.
13Eh ruuk' awajaawriik xa chiqsaj i kaq palaw.
Eh ar taqe xamuq'aa' kinaah i je' taqe josq'laj nimaq chikop.
14Re' hat xakansaj i je' qamaan k'ap.
Eh re' ruti'jolal xayeew chi kiwa' i josq'laj chikop
wilkeeb' chupaam i ye'aab' chiq yuuq'.
15Eh aha' ma' xta ha' ruuk' awajaawriik xpoq' chaloq i ha' xakow chik rooq.
Xa chiqsaj i nim ha' xi-ik'ik wii' i aj Israel.
16Re' hat ti ye'wik reh i q'iij, je' wo' hoq i aq'ab'.
Eh re' hat ti ye'wik paruye'aab' i q'iij, je' wo' hoq i poh.
17Re' hat xatyej-anik reh chu'nchel i wach ak'al,
re' wo' hat xatq'atwik cho riij i si'q'jil, je' wo' hoq iq'ilej.
18Eh mansahchik panak'ux chi re' inixowanik awach ma' holohik ta inq'orik chawiij.
Je' wo' i tinamit yeb'ee wach i kina'ojb'al ma' holohik ta wo' kiq'orik chawiij.
19Maa qohsahchik tii panak'ux i hoj ruum ma' kow ta qak'ux, xa je' qakab' i kok' mukur.
Eh maayeew q'ab' chi neenkian qeh i je' josq'laj chikop.
20K'oloq panak'ux aaq'orom cho qeh chi naa a'nam quuk'.
Ruum yohb'aal wach i ti' k'axik k'ahchi' ruk'ulariik panqatinamiit,
je' wo' hoqsut i wach ak'al.
21Mayeew q'ab' chi neemanab'jik i ruti'kiil kik'ux aatinamiit, chako'leej la' taqe.
Je' wo' taqe i wilkeeb' paneb'a'il reh chi nee tikiloq'ej.
22QaJaaw Dios, chako'leej taqe ruuk' i k'ahchi' kik'ulum i kinimanik aweh.
Ruum re' taqe yiib' wach kina'ojb'al ma' kihi'lik ta chab'ajariik.
23Eh maakanaa' chi je' re' i k'erej kichii' inki a'n ki-ixowanik awach.
Ruum re' keh k'ahchi' rojiik chi nimaal i k'ahchi' keeb'.
Currently Selected:
Sal 74: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
