Sal 144
144
Re' reey David xupahqaaj parutiij ree Dios chi naa ruko'ljiik
1Neeta naq inye'arik ruloq'il i QaJaaw Dios
re' i paat ab'aj ko'lemb'al iib' chi weh.
Re' reh intijinik weh chi q'aq'inik.
2Re' reh inketelinik nuwach, waj ko'loom,
ye'el rukowiil nuk'ux, esan weh panti' k'axik.
Eh pulato ch'ihch' ko'lemb'al iib' chi weh,
ruuk' i reh i nuyeew nuk'ux, i ruq'asaj chi ri'sil i wajaawriik i nutinamiit.
3QaJaaw Dios, ¿Chib'ih rub'anam i winaq chi tiqaaj kapeew chi riij?
Eh ¿Chib'ih rub'anam i xa rak'uun winaq chi ti' nawik'raaj?
4Ruum re' ruk'achariik, xa je' nik'ik jun huup chi teew.
Eh xa je' nik'ik jino'q muuj.
5QaJaaw Dios, chaqasaj chaloq awajaawriik
kopan taxaaj k'oloq atz'aa'j taqe yuuq' reh chi nee nelik kisib'eel.
6Chayeew chaloq taqe kahoq chikinaah i ki-ixowanik nuwach,
ruuk' flecha chakut taqe, reh chi neenkitukej kiib'.
7Eh chayeew chaloq aq'ab' chi nunaah kopan taxaaj, kinako'leej.
Eh kinawesaj chupaam i je' chaamlaj ha' wilkiin wii'.
Kinako'leej pan kiq'ab' i tokoom tinamit.
8Ruum re' keh xama' xta rub'ehel i kiq'oral,
xa re' i chukuj q'orik inkaaj.
9QaJaaw Dios, re' hin jinaj i ak'laj tz'uuy naa nutz'uyem ye'b'al aloq'il.
Eh naa nutz'uyem taqe i tz'uuy ruuk' taqe nu k'ahaam wach q'ooj.
10Re' i hat ti esanik keh korik i reey.
Re' hat titoob'inik weh i hin David, hin awaj kamanoom,
chi ma' kinkikansaj ta ruuk' q'aslaj ch'ihch'.
11Eh kinawesaj, kinako'leej
tii pan kiq'ab' taqe i tokoom tinamit.
Re' taqe i xama' xta rub'ehel kiq'orik,
xa re' chukuj q'orik inkaaj.
12QaJaaw Dios,
chayeew tii kikowiil i qak'uun,
je'-oq kik'ihik johtoq i k'ijol chee' chi xilak uhtz'ub'.
Re' taqe i qixq'uun je' ta naq kikab' i ruch'itil i nimlaj paat.
13Chatoob'eej i qatik,
reh chi neenqamol panye'aab' reh i xa reh reh wach chi k'uxumb'al qeh.
Reh chi neenk'ihaaxb'ik i qachikoop,
korehtaal kiponik chi yohb'aal wach kik'ihaal chupaam i qaye'aab'.
14Eh chayeew tii kikowiil taqe i qab'ooyax inqakoj reh qakamaj.
Ma' ta naq awach i neenokik chi i leq' panqatinamiit
reh chi ma' awach taj ineeruk'er chii' ruum ruyo'jiik.
15Atoob' reh i tinamit i je' re' ruk'ulariik i rotob'il i Dios i rub'an.
Atoob' reh i tinamit i xa re' k'achlik Dios i rukoj chi ruDios.
Currently Selected:
Sal 144: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
