Sal 132
132
Re' i xq'orarik cho reh i reey David ruum i Dios
1QaJaaw Dios, chatoob'eej tii i reey David
ruuk' chu'nchel i ti' k'axik k'ahchi' ruk'ulum.
2K'oloq panak'ux i xti korik xuq'or chaaweh
i hat QaJaaw Dios, ruDios i Jacob.
3Re' reh je' wili i ruq'orom chaloq:
Re' hin ma' nee ta kinookik panupaat, eh ma' nee ta i nuyok'aa' wiib' chi hi'lik.
4Eh ma' jaruuj neekinokik chi wirik,
ma' nee ta numutz' k'isinoq i naq'nuwach.
5Korehtaal inqareq i rupaat i loq'laj kaxa molik wii' aak'uhb'aal.
Re' naa ahi'liik wii' i hat QaJaaw Dios, ruDios Jacob, inki.
6Eh noq wilkooj cho Efrata xqib'iraj cho rib'iral i loq'laj kaxa re' re'.
Eh ko ar xqareq chupaam i ye'aab' Jaar rub'ihnaal.
7Je' re' noq, taq taq chupaam i paat wilik wii' i QaJaaw Dios.
Qaxuk'aa' cho qiib' ri'si rooq ri'si q'ab'.
8QaJaaw Dios, kim yu'naak,
hat-oq junokiik chi wihik chupaam aaye'aab'
ruuk' i loq'laj kaxa, re' wilik wii' awajaawriik.
9Eh korik ta naq wach kik'ux taqe i k'amal kib'eeh aj tiij.
Eh nee ta naq inwihik rusuqkiil kik'ux i wilik kisantohiil.
10Je' re' i cha a'n ketelb'al wach i reey David asik'im cho wach,
re' awaj kamanoom, mat tib'isaj ruk'ux.
11Re' QaJaaw Dios xuq'or i xti korik reh i reey David,
eh ma' xik'ik ta wach, je' wili i ruq'orom cho reh:
Re' hin re' taqe awak'uun awixq'uun
naa nukojom chi reyil chajilob'aal.
12Eh wila' xkinimaj i nuk'uhb'aal
awak'uun awixq'uun,
eh wila' xkik'am naah i naa nuk'uhb'aleem taqe wii'.
Re' keh naa wo' nukojom taqe chi reyil chi juneliik, inki.
13Ruum re' i QaJaaw Dios
rusik'im wach i ye'aab' Sión, chi ar naa ruwihiik.
14Eh je' wili i ruq'orom:
Chupaam i ye'aab' wili naa nuwihiik chi juneliik, ruum je' re' i xponik chi nuwach.
15Naa nukuxisam chi manlik i ye'aab' wili
naa nuye'em k'uxumb'al keh i ma' xta wilik keh.
16Eh re' hin naa nuko'liniik keh i k'amal kib'eeh aj tiij.
Re' taqe i wilik kisantohiil naakik'erem kichii' ruum i rusuqkiil kik'ux.
17Eh chi kixilak i rak'uun rixq'uun i reey David,
naa reliik chaloq i naa ruwihiik rajaawriik chi reyil,
nusik'im cho wach, re' reh i saqum.
18Re' taqe i naa rixowanik wach naa ruk'uhtaam kik'ixb'ilaal.
Eh re' reh naa ruwihiik rajaawriik chi juneliik, inki.
Currently Selected:
Sal 132: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
