Prov 28
28
Re' q'orik chi riij i k'ihwach chi na'ojb'al
1Re' yiib' wach runa'ojb'al i rumol chi elik atoob' ta ma' awach najiminik reh.
Eh re' i korik wach ruk'ux ma'yo'jiktaj je' rukab' i kaq b'ahlam.
2Eh noq ma' k'isiin chik i ti' k'axik chupaam i tinamit inkihaaxb'ik ajaab'ees chinaah.
Eh re' ajaab'ees wilik runa'ojb'al inchol ruk'amariik rub'eeh i tinamit.
3Re' yiib' wach runa'ojb'al i relq'aaj i chib'ih reh i neb'aa',
je' rukab' i kowlaj jab' i rusachib'eej kiwach i tik.
4Awach inkikanaa' runimjiik i k'uhb'aal, inkiyeew ruloq'il i yiib' wach runa'ojb'al.
Eh awach inkinimaj i k'uhb'aal ma' nkian ta jinaj wach kik'ux ruuk'.
5Re' taqe yiib' wach kina'ojb'al ma' nkireq ta chi riij i korik.
Eh re' taqe kisik'wik reh i rotob'il i QaJaaw Dios, inkireq chi riij chu'nchel.
6Ma' xta reet chi xa neb'aa' tii jino'q, xa re' la' korik-oq wach ruk'ux.
Xa ma' xta nkih chi b'ehoom jino'q wila' xa re' ileq' iraaj.
7Awach i runimaj i ruk'uhb'aal i QaJaaw Dios, jinaj ak'uunb'ees wilik runa'ojb'al.
Eh awach i xa chi kixilak i xakitusik inwihik, i ruk'uhtaaj ruk'ixb'ilaal i rajaaw.
8Awach i rumol wach i rub'ehomal ruuk' i tojb'al riij i rutumiin,
re' i rub'ehomal, reh inketelinik kiwach i neb'aa' naa rukanaam.
9Awach i ma' raaj ta rib'iram i ruk'uhb'aal i QaJaaw Dios,
ma' naa ta wo' rib'iirjiik rutiij i reh.
10Awach ink'amwik keh i chupaam i yiib' wach b'eeh i holohik kina'ojb'al,
re' wo' reh naa ruq'eb'em riib'.
Re' i korik wach kik'ux keh, holohik naa kojiik wii'.
11Re' b'ehoom, xa wilik chik runa'ojb'al i rub'an riib'.
Eh re' i neb'aa' reh korik chi wilik runa'ojb'al i rusik' chi riij mi re' i rub'an.
12Noq kielik korik ruuk' inki a'n i korik wach kik'ux inwihik i nimlaj ninq'iij.
Eh noq kielik korik taqe i yiib' wach kina'ojb'al inkikeb'aa' kiib' i tinamit.
13Awach i rukeb'aa' ru mahk, ma' nata reliik korik.
Eh awach i rupahqaaj kuyb'al ru mahk, eh i rukanaa'
chu'nchel, re' reh naa rukuyariik i ru mahk.
14Atoob' reh awach i eliik i ruyohleej i QaJaaw Dios.
Eh awach i q'e' kow i naah naa rojiik q'ehb'oq panti' k'axik.
15Re' yiib' wach runa'ojb'al xa je' chik josq'laj kaq b'ahlam.
Eh xa je' chik josq'laj oso noq inokik chi ajaab'ees chinaah i tinamit xa neb'aa' tii.
16Re' ajaab'ees ma' xta runa'ojb'al inuhtik wach i ti' k'axik ruum.
Eh re' i ma' k'axal ta wach b'ehomal naa runajtb'iik rooq i ruk'achariik.
17Awach i rukansaj i ras ruchaaq' ma' naa ta ruko'leem riib' korehtaal inooj kimoq.
Eh ma' awach ta naa ruko'liniik reh
18Re' i korik wach ruk'ux naa ruko'ljiik.
Eh re' i ma' holohik ta imb'anik naa rojiik q'ehb'oq panti' k'axik.
19Awach i rutik paam i ruye'aab' i rub'an ruwa' ruhaa' chi korik.
Eh awach i xa re' b'ehik iraaj chi kixilak i sub'ul q'iij,
runimaal neb'a'il i naa ruchaliik chinaah.
20Awach i korik wach ruk'ux naa ruye'ariik runimaal wach.
Eh awach i xa re' b'ehomal i ruk'ax wach naa ruye'ariik chutojariik i ru mahk.
21Ma' toob' taj chi wilik i tokoom rilariik neenb'aan,
ruum xa ruuk' i junk'uux chi wi'k neeruq'eb' riib' jino'q.
22Re' k'axal wach b'ehomal xa ruchop chik ruk'ux chi naa rub'ehomb'riik lom.
Eh ma' reht'al tee reh chi neb'a'il i naa ruchaliik chinaah.
23Eh noq inooj kuxoq re' inkiyeew runimaal wach i pan korik i rub'an i q'ilooj,
chuwach i xa re' i ch'ool i rub'an.
24Awach i relq'aaj chib'ih reh i rutuut rajaaw, eh ruwech'uj riij chi ma' xta ru mahk,
eliik kiwach ruuk' i yohb'aal wach ru mahk.
25Re' i ruk'ax wach b'ehomal xa peleto rutik.
Eh awach i ruyeew ruk'ux ruuk' i QaJaaw Dios i nelik korik ruuk' i rub'an.
26Awach i ruyeew ruk'ux chinaah taqe i rukapaaj, re' re' ma' nimanik taj.
Eh awach i wilik runa'ojb'al, naa ruko'leem riib' chi korik.
27Awach irutoob'eej i neb'aa' naa ruwihiik chib'ih reh chi manlik.
Eh awach i ma' rutoob'eej taj i neb'aa' ma' k'isiin i ti' naa ruchaliik chinaah.
28Eh noq kielik korik i yiib' wach kina'ojb'al,
inkikeb'aa' kiib' i korik wach kik'ux.
Eh noq kiooj q'ehb'oq i yiib' wach kina'ojb'al
inkimol wo' chik kiib' i korik wach kik'ux.
Currently Selected:
Prov 28: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
