Prov 26
26
1Re' ha' chaaj ma' ruk'ul ta chi nchalik pan siq'jil, je' wo' i jab' pan jachb'al q'iij.
Je' wo' re' i ma' nimanik taj, ma' ruk'ul ta wo' chi neenye'arik ruloq'il.
2Re' ma' holohik ta laj q'orik, ma' xta nokik wii'
xa je' rukab' i rupinik i rub'an i tz'unun,
k'ul inooj, xa je' rukab' i rub'an i tz'ikin siq'jil b'ih.
3Re' i kawáyu ruuk' tz'uhuum intiijik, eh re' i b'uurux
ink'amarik rub'eeh ruuk' i b'ak'b'al ju'.
Eh re' i ma' nimanik taj ruuk' q'ab' chee' intiijik.
4Re' hat maak'ulaa' naah i ruq'or i ma' nimanik taj,
reh chi ma' nee ta ti kahnik chi je' rukab' i reh.
5Ticholoq ruchaq'weesjiik i ma' nimanik taj,
reh chi neerureq chi riij chi ma' xta runa'ojb'al.
6Awach i rutaq'aaj reje rutaqariik chi riij i ma' nimanik taj,
xa rusik' ruk'axkiil, je' naa ruyok' i rooq chi rib'il riib'.
7Re' jino'q i siik taqe i rutuuq xama' nee ta wo' imb'ehik, ma' xta neenokik wii'.
Je' re' i ruq'oral i ma' nimanik taj xama' xta nokik wii'.
8Re' ruye'ariik runimaal wach i ma' nimanik taj,
xa k'ixb'ilaal, xa je' rukab' noq inkutarik reje ab'aj ruuk' uuleh.
9Re' jino'q i xohk'reel ma' riik'raaj taj noq intoq'arik ruum i k'iix.
Je' wo' re' i ruq'or i ma' nimanik taj xama' rureq ta wo' chi riij.
10Re' impeletohinik ruuk' flecha, i rub'aan keh chu'nchel i ki-ik'ik chuwach,
eh re' re' inye'wik rukamaj i ma' nimanik taj.
11Re' i ma' nimanik taj, noq inooj wo' chik rub'an i ruyiib' wach na'ojb'al.
I rub'an reh je' rukab'rub'an i tz'i' noq i ruk'ux wo' chik ruka'peech i ruxab'iik
12Saqb'ih i ma' nimanik taj chuwach
i wilik runa'ojb'al i rub'an riib' wila' ma' nimanik.
13Re' sikil laj winaq, xa chib'ih i rutz'aq wach,
i ruq'or chi naa ruk'uxariik ruum i kaq b'ahlam pamb'eeh.
14Re' puerta reh xa chinaah i ch'ilaab' reh i rusutej riib',
je' wo' re' i sikil laj winaq reh xa wach ruch'aht i rusutej riib'.
15Re' xiik' naah sikilal atoob' ta wo' naq tuqlik i ruwa' chuwach,
ni xata ruk'uxariik iraaj ruum i sikilal.
16Re' sikiil i rukapaaj i chi q'e' wilik runa'ojb'al chikiwach
i wuquub'-oq chi winaq i kichol kojooj na'ojb'al.
17Awach i rumin riib' ruuk' i rupeleto i tokoom,
je' naa k'ahchi' ruchopom kab'chel i xikin i josq'laj tz'i'.
18Re' yohb'aal wach josq'iil, xa je' chik ahqaal
i rukutib'eej taqe i flecha kanteesb'al qoplik ruq'aq'al.
19Je' wo' re' i rub'an awach i rujot' i ramigo,
eh noq inooj kuxoq xa sa'al wo' naq weh, inki tii chik.
20Re' q'aaq' noq ma' xta chik rusi'il, inchuhpik.
Eh re' i peleto imahyik noq imahyik i tz'aqaj wach q'orik.
21Re' aaq'ut re' inkahnik chinaah wach q'aaq', eh re' i sii' re' inqopwik reh i q'aaq'.
Eh re' i peleto re' i josq'iil inuhtisanik wach.
22Re' i tz'aqal wach k'utaaj xasuq chik reh aha' wilik taqe i ruq'or,
eh imponik kopan ránima.
23Eh chi reh i holohik laj q'orik i yiib' wach runa'ojb'al, i rutz'ap naah,
je' rukab' noq tz'aparik riij aak'al xun noq iniq'oomjik riij.
24Awach imb'anik ixowaal, holohik tii chik inq'orik i rub'an riib'.
Xanaah re', k'ahchi' ruyejaam cho wach i jot'ooj paránima.
25Re' re' manimaj reh atoob' ta xasuq chik neetiruq'o'reej,
ruum re' reh nujinaq chaloq i yiib' wach parukapeb'aal.
26Atoob' ta naq inche nee rukeb'aa' ixowaal i rub'an,
re' i ruyiib' wach na'ojb'al i xanaa wo' reliik wach saqum chikiwach chu'nchel.
27Re' ink'otwik reh i chaamlaj jul, xa re' wo' reh inq'ehb'ik chupaam.
Eh re' i rutolej i nimlaj ab'aj xa re' wo' reh inch'eyarik paam ruum.
28Re' i chukul q'orik ma' raaj ta wach i korik.
Eh re' i yiib' wach inq'orik inq'eb'wik panti' k'axik.
Currently Selected:
Prov 26: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
