Prov 22
22
1Awach i holohik rib'iral, xiik' naah k'ihaal tz'aaq chuwach i b'ehomal.
Eh wila' holohik inq'orarik chi riij, xiik' naah k'ihaal tz'aaq chuwach i oro, i plata.
2Re' i neb'aa', i b'ehoom xa jinaj kiwach,
re' i QaJaaw Dios xyej-anik keh kikab'cheel.
3Re' i wilik runa'ojb'al i rukoj rehtaal aha' wilik i yohb'aal, i rukotej riij.
Eh re' i ma' xta runa'ojb'al, ma' rukoj ta rehtaal, ko q'ehb'inaq chik ar noq irik'raaj.
4Re' i loch'oj iib', re' i ruyohljiik i QaJaaw Dios, b'ehomal, runimaal wachiis,
eh suq laj k'acharik i ruk'am chaloq.
5Re' yiib' wach runa'ojb'al xama' k'isiin i k'axik inq'atwik parub'eeh.
Eh re' i ruyohleej i ruk'achariik ma' ruyeew ta q'ab' chi nq'ehb'ik ar.
6Chatijej i ha'lak'un paruk'isinal, eh noq neenrijb'ik
ma' nee ta nsahchik paruk'ux.
7Re' b'ehoom intaaq'anik chinaah i neb'aa'.
Re' inye'wik i kemeel intaaq'anik chinaah i aj kemeel.
8Awach i re' i yiib' wach i rutik, ti' k'axik i naa rujacham.
Eh re' i QaJaaw Dios naa rusachwiik wach ruuk' i rujosq'iil.
9Awach i wilik i ketelinik wachiis ruuk',
eh i runej i ruwa' i ma' xta wilik reh naa ruk'ulum i rotob'il i Dios.
10Chawisaj reje i ma' holohik ta imb'anik,
chi je' re' neemahyik i choqinik iib', i peleto, i b'ajooj.
11Re' reey imponik chuwach i rub'an i korik wach ruk'ux.
Eh i ruk'am panotob'il awach i xa holohik inq'orik.
12Re' QaJaaw Dios i rucha'jeej chi korik i wilik runa'ojb'al.
Eh ma' runimaj taj i ruq'or i aj chukul q'orik.
13Re' i sikiil laj winaq xa chib'ih i rutz'aq wach,
i ruq'or chi naa ruk'uxariik ruum i kaq b'ahlam pamb'eeh.
14Re' ruq'oral ixoq i ruch'uwa' risaj wach irukaxaro, je' rukab' i chaam laj jul.
Re' inooj q'ehb'oq wii' noq inye'arik panti' k'axik ruum i QaJaaw Dios.
15Re' i ma' holohik taj imb'aan, re' ruuk' i kina'ojb'al i k'ijolaq,
eh ruuk' i tz'uhuum neenb'aan keh neenkikanaa' rub'aan.
16Awach i ruq'uch i chib'ih reh i neb'aa', re' iraaj chi nee nb'ehoomrik.
Eh awach i rusiij chib'ih reh i b'ehoom, naa rune'b'aa'riik na' ponoq kuxoq.
Re' lajeeb' ru ka'winaq chi k'uhb'aal xkiq'or taqe i wilik kina'ojb'al
17Chab'iraj chi korik i k'uhb'aal inki a'n i wilik kina'ojb'al.
Eh xti cha kapaaj riij aatijiik i nub'an i hin,
18ruum re' taqe re' xiik' naah chihojal cha weh chi neenamol panawánima.
Reh chi neena a'n ruq'orariik nik' neenawaaj ruq'orariik.
19Yu'naak i nuyeew aweh chi naab'jik taqe wili,
reh chi nee nayeew ak'ux ruuk' i QaJaaw Dios.
20Re' hin xnutz'ihb'aaj aweh i lajeeb' ru ka'winaq chi q'orik,
re' taqe i holohik laj k'uhb'aal, i holohik chi tiijik,
21reh i ruk'uhtjiik aweh chi neenareq chi riij i korik,
reh wo' chi neena a'n ruq'orariik chi korik noq neenpahqaljik aweh.
22Maaq'uch i chib'ih reh i neb'aa', mo'-oq xa re' inawil chi xa neb'aa' tii.
Eh maaq'uch chib'ih reh pan q'atb'al q'orik i ma' xta neeruko'leej wii' riib',
23ruum re' i QaJaaw Dios naa ruko'liniik keh.
Eh awach i naa ruq'uchwiik i chib'ih keh naa ruq'uchariik i chib'ih wilik kee keh.
24Maak'am taqe chi awamigo, eh ni xata nee nawuhch'ihleej taqe i q'e' josq',
je' wo' taqe i ma' holohik ta kib'anik,
25reh chi ma' nee ta natijej aweh inki a'n ruum wi xatijej aweh,
je' naa neenajihk'aaj awiib' ruuk' laso.
26Manooj aq'or pan q'atb'al q'orik
chi neenatoj i ruk'aas i wilik ruk'aas,
27ruum wila' ma' chih awuuk' i naa atojom wii' i k'aas re' re',
noq neenooj kuxoq neenkiq'uch ach'aht tiwirik wii'.
28Maajil taqe i rehtalil i k'ula't
kitikim kahnoq aamaam awati't.
29Awach i rub'an chi korik i rukamaj,
pankikamaj taqe i reey naa ruwihiik,
ma' re' ta parukamaj jino'q i xama' xta rajaawriik.
Currently Selected:
Prov 22: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
