Prov 11
11
1Re' QaJaaw Dios suq ruk'ux ruuk' i manlik impajwik,
eh ma' imponik ta chuwach i ma' manlik ta npajwik.
2Re' i niimb'isanik wachiis xa k'ixb'ilaal i ruk'am chaloq.
Re' taqe i ma' nimaq ta kiwach kuuk' i keh wilik i holohik laj na'ojb'al.
3Re' korik wach kik'ux re' korik inki a'n ink'amwik kib'eeh.
Re' i ma' korik taj inki a'n re' wo' re' naa rusachwiik kiwach.
4Re' b'ehomal xama' xta naa rukamaniik wii' na' chureq i ruq'ijil i q'ataj q'orik.
Re' i korik ra'j inko'linik chuwach re' i kimik.
5Re' i korik wach ruk'ux, re' korik i rub'an ink'amwik rub'eeh.
Eh re' yiib' wach runa'ojb'al, re' yiib' wach i rub'an inq'eb'wik reh.
6Re' i korik wach kik'ux, re' i korik naa ruko'liniik keh.
Re' yiib' wach kina'ojb'al, naa kikahniik pankimahk.
7Eh noq inkimik i yiib' wach runa'ojb'al insahchik wach i ch'iklik naq reje wii' ruk'ux,
je' wo' taqe aha' wilik i rukapaaj.
8Re' QaJaaw Dios i resaj panti' k'axik i korik wach ruk'ux,
re' chik i yiib' wach runa'ojb'al i ruyeew panti' k'axik chi jilow.
9Re' yiib' wach runa'ojb'al ruuk' i chii' i rujot' taqe i ras ruchaaq.
Eh re' korik wach kik'ux inkiko'leej kiib', ruum wilik kina'ojb'al.
10Re' korik wach kik'ux ruum i holohik inki a'n insuuqb'ik kik'ux i tinamit.
Eh noq kikimik i yiib' wach kina'ojb'al insuuqb'ik kikux tinamit.
11Ruum i otob'il inki a'n i korik wach kik'ux, ink'ihaaxb'ik i tinamit.
Eh re' i yiib' wach kina'ojb'al, ruuk' i kiq'oral inkisach wach i tinamit.
12Re' i ma' xta runa'ojb'al ma' holohik ta nq'orik chi riij i ras ruchaaq.
Re' i wilik runa'ojb'al ma' xta ruq'or chi riij i tokoom.
13Re' i xa nooj chi k'utaaj, i ruk'utjaaj chu'nchel taqe i rib'iraj.
Eh re' korik wach ruk'ux, ma' resaj ta ruk'utjiik taqe i rib'iraj.
14Wila' ma' holohik i runa'ojb'al i aj taaq'oom, ma' jaruuj neenkorjik i tinamit.
Re' tinamit neenkorjik wila' wilkeeb' k'ih-oq i kojol na'ojb'al.
15Awach i ma' nee ta rumin riib'
chi rutojariik i ruk'aas i tokoom, ma' xta nee ruk'ul.
16Re' ixoq holohik i runa'ojb'al inye'arik ruloq'il.
Re' winaq kow riib' i rureq i b'ehomal.
17Awach i wilik ketelinik wachiis ruuk', holohik i naa ruchaliik chinaah.
Eh awach i xa re' josq'iil i rub'an, ti' k'axik i ruk'am cho chinaah.
18Re' yiib' wach runa'ojb'al ma' holohik taj i rutojb'aal naa ruk'ulum.
Awach i re' i korik i rub'an holohik i rutojb'aal naa ruk'ulum.
19Re' rub'anariik i korik pan holohik k'acharik ink'amwik.
Re' rub'anariik i yiib' wach na'ojb'al pankimik ink'amwik.
20Re' QaJaaw Dios ma' imponik ta panaq'wach taqe i ma' holohik taj wilik cho pan kánima.
Eh awach taqe i re' korik inki a'n ra'j imponik chuwach re'.
21Re' i yiib' wach runa'ojb'al, ma' naa ta rik'iik chi riij i tojb'al ru mahk.
Re' taqe korik wach kik'ux naakiko'leem kiib' chi kiih chi kimaam.
22Re' ixoq q'e' holohik, eh ma' xta k'isinoq runa'ojb'al,
xa je' rukab' i kotkot laj ch'ihch' oro inokik chi ju' i ahq.
23Eh re' i korik wach kik'ux xa re' i holohik inkikapaaj rub'aan.
Eh re' inki a'n i yiib' wach kina'ojb'al, xajosq'iil i ruk'am chaloq.
24Awach inkisiij chib'ih reh i kas kichaaq' k'ih chik i jilow inkik'ul.
Awach taqe i q'e' pixp xa kikahnik wo' chi neb'aa' taqe.
25Awach i xa atoob', holohik naa rojiik wii'.
Awach insihinik, naa wo' ruk'ulum jilow.
26Re' tinamit ma' holohik ta kiq'orik chi riij, awach i xa rumol i koq i wach i rutrigo.
Eh holohik kiq'orik chi riij awach i ruk'ayej i wach i rutrigo.
27Awach i re' i holohik i rub'an, suq rilariik imb'aan.
Awach i re' i ma' holohik taj i rub'an, ma' holohik ta naa rojiik kuxoq wii'.
28Awach i chinaah i rub'ehomal i ruch'ikaa' ruk'ux, xa je' inq'ehb'ik chiq xaq chee'.
Eh re' taqe korik wach kik'ux, xa eliik taqe je' rax wach xaq chee'.
29Awach i ruq'eb' i rupaat, ma' xta chik naa ruwihiik reh.
Re' i ma' nimanik taj, naa rukahniik chi rumoso i wilik runa'ojb'al.
30Re' i rub'an i korik wach ruk'ux, je' rukab' i chee' inye'wik k'acharik.
Eh awach i rusik' chaloq i ras ruchaaq', wilik runa'ojb'al.
31Wila' nik'ik chi ti' k'axik ayu' wach ak'al i korik wach ruk'ux,
ra'j naa chik re' i yiib' wach runa'ojb'al, ma' neenye'arik chutojariik i ru mahk.
Currently Selected:
Prov 11: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
