Num 24
24
1Re' Balaam reht'al chi re' i QaJaaw Dios iraaj chi naa rukuxisam taqe i aj Israel, ma' xoj ta chik ruk'ul ruuk' i Dios chib'ih i naa ruq'orom, je' rukab' i xub'an pampeet, paruka'peech. Xusutej la' riib', xtz'ehtanik reje chupaam i ye'aab' chiq yuuq'. 2Eh xrilow reje wach i ki-itz'ihy naah paat i aj Israel, chi ch'uhqaal wilkeeb'. Re' i Ruxlab'al i Dios xchalik chinaah i Balaam. 3Je' re' noq xuq'or taqe q'orik wili parutz'uuy:
Re' hin i Balaam, hin rak'uun i Beor,
je' naq tz'aplik i naq'nuwach, wilik i xk'uhtjik weh.
4Eh xb'iraj i ruq'oral i Dios,
wilik wo' xuk'uhtaaj weh panusaq wiriik ruuk' i runimaal i rajaawriik.
Re' hin xnuloch' wiib' chuwach i QaJaaw,
eh xuk'uhtaaj weh i korik.
5Yohb'aal wach holwochiil taq aapaat itz'ihy naah,
eh yohb'aal wach holwochiil i ye'aab' wilkaat taq wii' i hat taq aj Israel.
6Eh xakilok'ik taq chik aapaat,
xa je' chik inloh k'ik reje xaq ipak'.
Eh xa je' chik inlohk'ik reje tik, chi chii' i rooq ha',
xa je' chik inlohk'ik reje ink'ohnik laj chee',
eh xa je' chik inlohk'ik reje chakaltee' chi chii' i ha'.
7Eh re' taq i hat eliik taq naa ruwihiik ahaa',
eh ruuk' i re' naa taq akojom ruha'iil atik.
Re' taq aareey yohb'aal wach i rajaawriik,
naa ruq'atam wach i rajaawriik i reey Agag,
eh naa ruye'ariik runimaal wach i rajaawriik.
8Re' taq aaDios x-esanik chaaweh Egipto,
xuyeew taq aakowiil chi je' kowiil imas wakax wilik pan raxchee'.
Ruum aj re' naa taq asacham kiwach i nimaq tinamit ki-ixowanik taq awach,
naa taq atoqib'eem i kib'aqil.
Eh naa taq aakutib'eem ruuk' taq aaflecha.
9Noq ti okik taq chi hi'lik i hat aj Israel,
je' rukab' noq inokik chi hi'lik i kaq b'ahlam ma' awach ta neenuksanik i koq reh.
Re' ta naq i holohik chinaah awach impahqanik i holohik taq cha naah,
eh re' ta naq i ma' holohik taj
i chinaah awach impahqanik
ma' holohik taj taq cha naah, inki, i Balaam.
Re' i Balaam xuq'or rib'iral chib'ih i naa ruk'ulariik
10Eh re' i reey Balac xchalik ruk'aah chinaah i Balaam, xupoq'potej paam i q'ab' je' wili xuq'or reh:
Re' hin xnutaq'aaj ak'amariik reh chi naa apahqaam i ma' holohik ta chikinaah i ki-ixowanik nuwach. Eh re' hat, oxpech chik xapahqaaj i holohik chikinaah. 11Ruum aj re' i ruk'ul chi neetisutinik reje panapaat. Re' hin nuq'orom naq chi q'e' naa nuye'em runimaal awach, xa re' la' re' Dios ma' xuyeew ta q'ab' chi xak'ul i runimaal awach, inki.
12Eh re' i Balaam je' wili i chaq'wik xub'an:
¿Mi ma' je' wili re' i xnuq'or keh i awaj taqareel xataq'aaj taqe chi nuk'amariik? 13Chi atoob' ta naq nee ruyeew weh chu'nchel i oro i plata wilik parupaat. Re' hin xama' naa ta wo' nuq'atam wach i nee ruq'or weh i QaJaaw, eh chi ma' jino'q i holohik, eh ma' jino'q i yiib' wach neenub'an xa chi wib'il wiib'. Eh xnuq'or chi aha' wilik i naa ruq'orom weh i QaJaaw xa re' wo' naa nuq'orom. 14Ma' xta reet, re' hin naa nusutiniik reje panutinamiit, xa re' kopeet naa nuq'orom chib'ih i naa rub'anam, na'chub'an i tinamit Israel ruuk' aatinamiit i hat.
15Re' Balaam xuq'or taqe i q'orik wili parutz'uuy:
Re' hin i Balaam hin rak'uun i Beor,
re' hin je' naq tz'aplik i naq'nuwach.
16Eh xb'iraj i ruq'oral i Dios,
eh wilik xuk'uhtaaj weh panusaq wiriik
ruuk' i runimaal i rajaawriik.
Re' hin xnuloch' wiib' chuwach i QaJaaw, eh xuk'uhtaaj weh i korik.
17Re' hin xwilow panusaq wiriik
chib'ih i naa rub'aan kuuk' i aj Israel,
taqe i riih rumaam i Jacob,
naa ruponiik i q'iij noq chi kixilak
naa reliik chaloq i jinaj i reey kow naa rutaaq'aniik,
je' rukab' i rusaqumaal i ch'umiil.
Eh re' reh naa rusacham wach i tinamit Moab,
eh je' wo' taqe i riih rumaam i Set.
18Re' taqe i aj Israel naa kichopom naah i tinamit Edom,
eh je' wo' i tinamit Seir re' i nixowanik kiwach,
eh xti naa ruwihiik kajaawriik.
19Jinaj i xti nim rajaawriik naa ruwihiik, re' ruuk' i riih rumaam i Jacob.
Re' re' i naa rusachwiik wach i tinamit
nik' nimaal i konaakikahniik chi k'achalkeeb', inki.
20Eh chi riij i re' xrilow wach i tinamit Amalec, je' wili i xuq'or parutz'uuy:
Re' Amalec xti xiik' wo' naq naah nimaal i rajaawriik chi kixilak i tinamit,
xa re' la' xanaa wo' rusahchiik wach chi jumpech, inki.
21Eh re' Balaam noq xrilow wach i tinamit i Ceneo je' wili i xuq'or parutz'uuy:
Re' i aj Ceneo xti xiik' wo' naq naah kikowiil
xkiyejaa' wo' naq i kiye'aab' chupaam taqe i paat ab'aj.
22Xa re' la' noq naa kichaliik i aj Asiria
naa ruq'atariik wach i kajaawriik naa kik'amariik
reje pan tokoom tinamit, inki.
23Eh je' wo' chik wili i xuq'or parutz'uuy i Balaam:
Noq naa rub'anam i QaJaaw Dios taqe re' q'eq ti' i naakik'ulum,
ma' jino'q chik i naa kikahniik chi k'achalkeeb'.
24Eh wilik i naa kichaliik pan barco chupaam i chiq yuuq' Quitim.
Naa kisacham wach i aj Asiria.
Eh naa rusachariik kiwach i aj Heber.
Eh re' taqe i aj Quitim naa wo' rusachariik kiwach noq naa rojiik kuxoq, inki.
25Eh chi riij taqe re', re' Balaam xichop reje i rub'eeh xsutinik wo' chik reje parutinamiit. Eh re' reey Balac xooj wo' reje parupaat.
Biblia en Poqomchí: Santo Laj Huuj © Sociedad Bíblica de Guatemala 2009.