Mal 3
3
1Re' i QaJaaw Dios, je' wili i xuq'or:
Re' hin naa nutaq'aam reje chi peet i waj taqareel,
reh chi naa ruyejaam aab'eeh chuk'ulariik i Qajaaw.
Re' taq awajaaw k'ahchi' taq asik'im
xailook' taq inawil chi naarokiik chupaam i rupaat.
Re' i aj taqareel re' re' naaruq'oriik rib'iral
i ak' k'uhb'aal nuyejaam cho wach,
re' i xanawaaj taq chik anab'eem ilook' ink'uloq, inki.
2¿Awach neenkuywik reh i rujosq'iil
i QaJaaw Dios noq naarureqem i ruq'ijil i ruk'uliik?
¿Mi wilik i ma' neetanyo'jik chuwach?
Ruum re' reh je' rukab' i q'aaq' insaqb'isanik
wach i oro na' k'oloq chaloq,
je' rukab' i xab'oon insaqb'isanik wach i itz'ihy.
3Re' i QaJaaw Dios naaruyejaam riib'
chusaqb'eesjiik wach i kánima i k'amal kib'eeh aj tiij,
re' taqe i riih rumaam i Leví, je' rukab' noq
insaqb'eesjik wach i oro i plata pan xaq q'aaq'.
Reh chi neenkiq'asaj parub'ehel
i mayiij chuwach i QaJaaw Dios.
4Chi je' re' naa rusuuqb'iik ruk'ux i QaJaaw Dios
chiriij i kimayiij i aj Judá, i kimayiij i aj Jerusaleem.
Je' rukab' noq xsuuqb'ik cho ruk'ux
i QaJaaw najtir q'iij noq inkiyeew chaloq i kimayiij.
5Re' hin naanuq'atam i q'orik cha naah taq i hat
re' hin naanuq'oriik chi wilik kimahk i aj q'iij,
i nkich'uwa'reej wach i kikaxaro,
i kiq'orik i nub'ihnaal ruuk' i chukuj q'orik,
i ma' nkitoj taj i kimoso
i kib'anik ti' k'axik keh ixoq kamnaq kib'ahiil,
i kib'anik ti' k'axik keh i ma' xta kituut kajaaw.
Eh je' wo' i kib'anik ti' k'axik keh i tokoom tinamit,
taqe i ma' nkiyohleej ta nuwach, inki i Dios nim rajaawriik.
Re' i ruye'ariik i ru lajeeb' sentabo hiil i jinaj ketzal, je' wo' hoq i ruye'ariik i lemóxna
6Re' hin, hin Ajaab'ees Dios ma' nujalam ta wach i nuyejaam cho wach,
ruum aj re' ma' sahchinaq ta taq awach i hat,
i hat taq riih rumaam i Jacob.
7Re' taq i hat xaq'eb' taq i nuk'uhb'aal ma' xamol ta taq,
je' rukab' i xkian taq aamaam awati't.
Tisutinoq wo' chik taq cho wuuk'
re' hin nee wo' chik kinsutinik taq awuuk',
kinki i hin Dios nim wajaawriik.
Eh re' taq i hat je' taq wili inaq'or:
¿Chib'ih reet noq inaq'or qeh
chi naa wo' chik qasutinik awuuk'? tiki taq.
8Eh re' hin i nuq'or:
¿Mi ruk'ul re' chinee relq'aaj i chib'ih weh jino'q i winaq?
Re' taq i hat kinawelq'aaj taq.
Eh konapech'uj taq chi je' wili:
¿Chib'ih jariik i xqelq'aaj aweh? tiki taq.
Cinawelq'aaj taq ruum ma' naaq'asaj ta taq weh
i ru lajeeb' sentabohiil i jinaj ketzal, ruch'ihil taq alemóxna.
9Xti korik i nuq'or chi chawunchelaal taq hat,
eh chi kunchelaal tinamit k'ahchi' taq kiin awelq'aam,
ruum aj re' naa nuye'em i ti' k'axik taq cha naah.
10Chak'am taq chaloq i ru lajeeb' sentabohiil i jinaj ketzal chupaam i ye'aab' reh,
reh chi neen wihik k'uxumb'al chupaam i nupaat.
Cinanik'eej taq ruuk' i re' yu'naak,
nee aj taq inawil re' mi ma' neenuteh chaloq
taqe i ru puertahiil i taxaaj,
eh nee taq inawil mi ma' nee nuchihkaaj
taq cho cha naah i wotob'il chi ma' xata pajooj.
11Eh ma' nee ta nuyeew q'ab' keh
i chikop chi neenkik'ux taq i wach atik,
naa taq atikim pana ye'aab',
eh naa nuye'em q'ab' chi re' taq aa-uuva ma' k'isiin ta naa kiwachiniik.
12Eh chu'nchel i nimaq tinamit,
atoob' inchi keh i re' inko'q taqe chawiij,
ruum naakilom chi xa k'axb'al chik wach i suq atoob' naa reliik taq pana ye'aab',
inki i QaJaaw Dios nim wajaawriik.
Re' ruketeljiik wach i tinamit xub'an i Dios
13Re' i QaJaaw Dios je' wili i xuq'or:
Re' taq i hat i ma' holohik ta taq ti q'orik chi wiij.
Eh ko kinapech'uj taq chi je' wili:
¿Chib'ih jariik i ma' holohik taj qaq'orom chawiij? tiki taq.
14Eh je' wili taq inaq'or: Chi neenqanimaj i Dios
xama' xta neerutiq qeh ¿Chib'ih i neen qak'ax
ruuk' chi neenqanimaj i ruk'uhb'aal,
eh chi xa eliik neenqakoj i qaq'eq' so'
ruum i ruti'kiil qak'ux chuwach i Dios
nim wajaawriik inkiq'or?
15Re' hoj inqakoj rehtaal taqe i nimaq kiwach chi xa eliik suq kik'ux,
eh chi re' taqe i yiib' wach kina'ojb'al, chu'nchel inki a'n i nelik korik chikiwach.
Eh inkiyeew rujosq'iil i Dios, xama' xta wo' inkik'ul tiki taq, inki Dios.
16Eh re' taqe inkiyohleej i QaJaaw Dios je' wili xkiq'or chikiwach:
Re' Dios xuyeew ruk'ux chi rib'irjiik i xkiq'or.
Eh chuwach i QaJaaw xtz'ihb'jik panhuuj,
i xkian i kiye'wik runimaal wach, i kiyohlinik wach i Dios.
17Re' i QaJaaw Dios je' wili i xuq'or:
Re' hin pan jinaj q'iij naa wo' chik nuk'amam
taqe chi nutinamiit q'e' looq'.
Eh naa wo' chik nukuyum kimahk,
je' rukab' noq i rukuy ru mahk i rak'uun i ajaab'ees,
noq naanuketelaam kiwach taqe i re'.
18Ruuk' i re' naa taq akojom rehtaal i hat
chib'ih i naa nub'anam kuuk' i holohik kina'ojb'al,
kuuk' i yiib' wach kina'ojb'al.
Eh chib'ih i naa nub'anam kuuk' i kiye'wik nuloq'il,
kuuk' i ma' kiye'wik ta nuloq'il, inki.
Currently Selected:
Mal 3: POK
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.