Jol 3
3
Re' ti' k'axik naa ruye'em chikinaah i tinamit xib'anik i ti' k'axik
1Re' i QaJaaw Dios je' wili i xuq'or:
Na' ponoq i q'iij re' re' naa wo' chik nuye'em keh i suq laj k'acharik i aj Judá,
je' wo' taqe i aj Jerusaleem na' kisutinoq cho pan kitinamiit.
2Re' hin naanumolom kiwach chu'nchel i tinamit pan k'ixkaab' Josafat.
Ar naanuq'atam i q'orik chikinaah,
ruum i ti' k'axik xkian reh i nutinamiit Israel.
Ruum re' keh xkikaaj reje i nutinamiit pantaq tokoom tinamit,
eh xkich'aqib'eej i kiye'aab' i nutinamiit.
3Eh xkiq'ijej riij i nutinamiit, xkich'aq chikiwach,
xkik'ayej taqe i kok' ak'un, i kok' xq'un.
Re' tz'aaq xkisach chi loq'b'al k'ahlaj ha',
chi loq'b'al k'oyoom laj ixoq.
4¿Chib'ih taq inawaaj wuuk' i hat aj Tiro, aj Sidón,
aj filisteo?
¿Mi wilik inawaaj taq aq'ajam wach weh re'?
Ma' xta reet naa taq nuye'em aweh chi jumehq'iil i tojb'al taq mahk i ruk'ul taq cha weh.
5Re' taq i hat xawelq'aaj taq i nuplata i nu oro wilik naq panupaat,
xak'am taq chu'nchel i q'e' naq k'ih taq tz'aq chi wee hin,
ar taq chik xak'am reje parupaat taq aatiyoox.
6Eh xak'am taq reje chi najt yuuq' i aj Judá,
je' wo' taqe i aj Jerusaleem xa k'ayej taq reje pankowlaj kamanik kuuk' i aj griego.
7Eh re' hin naa wo' chik wesam taqe chaloq
aha' xa k'ayej taq reje wii'.
Eh cha naah taq chik i hat naa nuye'em i ti' k'axik xkik'ul i keh.
8Re' hin naa nuye'em q'ab'
chi naa kik'ayjik taq aawak'uun awixq'uun keh i aj Judá.
Eh re' chik i keh nee kik'ayinik reje keh i aj sabeo kichalik chi najt yuuq'.
Re' hin kinq'orik i wili, inki i QaJaaw Dios.
9Re' taq i hat cha q'or taq rib'iral keh i tinamit chi je' wili:
Chayuq'eej taqe chaloq i kowlaj winaq, kichaloq chi q'aq'inik
k'oloq kiq'at wach taqe i k'ahchi' keeb' chi q'aq'inik
10Re' i kasaroon xkiyejaa' chi q'aslaj ch'ihch',
re' i kimacheet kiyejaa' chi kiq'as ju' ch'ihch'.
Eh re' winaq q'e' inyo'jik chuq'or chi je' wili:
Yu'naak hin chik kow chi q'aq'inik inko'q.
11Eh chawunchelaal taq i hat wilkaat
taq chi junsuut i tinamit Israel chamol taq chaawiib'.
Re' hat QaJaaw Dios, cha taq'aaj taqe chaloq
awaj kamanoom chub'aan i ti' k'axik
keh taqe i re', kinki.
12Re' i QaJaaw Dios je' wili i xuq'or:
Re' taqe i nimaq tinamit ma' najt ta ruuk' i Israel,
kimol kiib' wach k'ixkaab' Josafat.
Ar naanuq'atam i q'orik chikinaah.
13Re' hin naanusacham kiwach
je' kiyok'arik trigo xa q'an chik naa nub'anam taqe.
Je' wo' kiyitz'arik uuva
panyitz'b'al reh naa nub'anam taqe,
ruum xiik' naah yib'kiil wach i kina'ojb'al.
14Eh xiik' naah k'ihaal i tinamit wilkeeb' wach k'ixkaab'.
Re' hin ar naanuq'atam i q'orik chikinaah,
ruum ponik reh i q'iij chi re' hin i Dios naanuq'atam i q'orik chikinaah.
15Re' i q'iij ruch'ihil i poh naaruq'equumriik wach,
eh re' taqe i ch'umiil ma' naa ta chik kisihq'iniik chaloq, inki.
Re' i QaJaaw Dios xrisaj wo' chik taqe panti' k'axik i rutinamiit
16Re' i QaJaaw Dios je' wili i xuq'or:
Noq kow naaruq'ajb'aniik chaloq i nuq'oral chinaah i yuuq' Sión,
ar Jerusaleem, re' i taxaaj, re' wach ak'al naakik'uyu'jiik pan kiye'aab'.
Eh re' i nutinamiit Israel naa nuko'leem taqe,
naa nuye'em rukowiil kik'ux.
17Re' taq i hat aj Israel naa taq anab'eem chi re' hin taq aaWaJaaw aaDios,
eh ar wilkiin chinaah i nuSantolaj ye'aab' Sión.
Eh re' i nutinamiit Jerusaleem naaruwihiik rusantohiil,
ma' naa ta chik ruchopariik naah
kuum i tokoom tinamit.
18Eh chupaam taqe i q'iij re' re',
re' i riis i uuva, re' lecha xa je' chik rukab'
i rooq ha' i nelik pantaq yuuq' k'ixkaab',
eh chupaam taqe i rooq ha' wilkeeb' Judá
ma' k'isiin i ha' naakeliik chaloq.
Eh chupaam i nupaat, je' naa k'achlik ha'
inareliik chaloq, je' naarut'aqsam
chu'nchel i wach k'ixkaab' Sitim.
19Eh re' i tinamit Egipto reh naa rusahchiik wach,
re' i tinamit Edom naarukahniik chi
ma' xta chik i wilkeeb' chupaam,
ruum i yiib' wach na'ojb'al xkian.
Re' keh xkikansaj taqe i aj Judá
chi xama' xta kimahk.
20Re' taqe i aj Judá naa wo' chik kichaliik
chi patinik chi juneliik pan kitinamiit.
Eh je' wo' taqe i aj Jerusaleem,
naa wo' kiwihiik ar i xata wo' jar ch'iht
chi k'achareel i naakik'iik.
21Re' hin naa taqe nuye'em chutojariik
i kimahk i kikansanik reh i nutinamiit.
Eh re' hin ar naanuwihiik chi juneliik Sión, inki i Dios.
Currently Selected:
Jol 3: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
