Job 40
40
1Re' i Dios je' wo' chik wili i xuq'or reh i Job:
2¿Mi ruum chi wilik ana'ojb'al re' hat kinawech'uj i hin, hin Dios nim wajaawriik?
Awach inwech'inik weh inchol ruchaq'weem i neenupahqaaj reh i hin, inki.
3Eh re' Job je' wili ruchaq'weesjiik i QaJaaw Dios xub'an:
4Re' hin ma' xta nuna'ojb'al chi q'orik awuuk'.
Yu'naak ma' nee ta chik tinuwech'uj.
5K'ihpech chik xinq'orik yu'naak
ma' xta chik i naa nuq'orom, inki.
6Re' QaJaaw Dios je' wili ruchaq'weesjiik
i Job xub'an chaloq chupaam jinaj i kaq suut teew.
7Yu'naak cha yejaa' awiib' cha k'uhtaaj akowiil,
neenachaq'weej weh inaa nupahqaam aweh
8¿Mi naq'or re' hat chi ma' korik taj i nub'an?
¿Mi k'ahchi' akojom numahk re' hin reh chi neetikahnik chi ma' xta mahk i hat?
9¿Mi xiik' naah re' awajaawriik i hat je' rukab' i hin?
¿Mi je' inq'orik kahoq re' aq'oral i hat, je' rukab' i hin?
10Wila' je' re' cha k'uhtaaj awajaawriik, cha k'uhtaaj aloq'il,
je' wo' hoq holwochiil
11Eh cha k'uhtaaj aajosq'iil chikinaah i q'e' kow kiib',
chawesaj i kajaawriik.
12Chawesaj i runimaal kiwach,
eh chasach kiwach i yiib' wach kina'ojb'al xa aha' pa' wilkeeb'.
13Eh chamuq'aa' taqe ri'siak'al,
cha taq'aaj taqe pan kiye'aab' i kamnaq.
14Wila' xa a'n taqe i re', re' hin neenunimaj
aweh chi xa ruuk' awajaawriik neenako'leej awiib'.
15Re' i nimlaj chikop hipopotamo rub'ihnaal k'im i ruk'ux,
je' rukab' i wakax, re' hin xinyej-anik reh, je' rukab' noq xatnuyejaa' chee hat.
16Re' chikop re' re' kow riib',
yohb'aal wach i ransil.
17Re' rujeeh xiik' naah kowiil, je' kowiil i chee' chakaltee',
xarutoy chik riib' i paraa' ruum i ransil.
18Re' taqe rub'aqil xa je' chik kowiil b'olob'ik laj q'an ch'ihch',
re' taqe i wach'ehk je' kikowiil nimaq rooq ch'ihch'.
19Re' chikop re' re' nukamaj,
wo' hoq xa re' wo' hin nee kinkansanik reh.
20Eh i ruk'ux wo' hoq i ch'ahn i nelik wataq yuuq' k'ixkaab'.
Re' wilkeeb' wii' i josq'laj chikop.
21Ar inhi'lik chi ri'sil i rumuuj taqe i chee',
eh chupaam taqe i kaxlan-aaj wilkeeb' pantaq ch'uwa'.
22Eh i ruko'leej riib' chi ri'sil taqe chee' wilkeeb' chi' ha',
je' wo' chi ri'sil taqe i nimaq ch'ahn.
23Noq ink'ihik i nim ha' xama' inyo'jik ta wo' hoq atoob' ta
neemponik chii' ju' i ruchamiil i ha' xama' xta wo' raaj reh.
24¿Mi wilik jino'q i neerub'an ruchopariik noq ilooj i rub'an?
¿Mi wilik i neerub'an ruhopariik i ju'? inki Dios.
Currently Selected:
Job 40: POK
Highlight
Share
Compare
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
