Isa 59
59
Re' ti' k'axik xye'arik chikinaah i aj Israel ruum i kimahk
1Maa kapaaj taq i hat chi re' i QaJaaw Dios ma' xta chik rajaawriik taq chako'ljiik.
Eh ma' tz'aplik ta wo' xikin chi ma' nee taq tirib'iraj.
2Re' la' taq ayiib' wach na'ojb'al
inq'atwik taq panab'eeh ruuk' i Dios.
Eh ruum taq amahk ma' ruyeew ta chik riib' chi naa a'n taq k'ul chi' ruuk' i Dios,
ruum i re' ma' rib'iraj ta taq atiij.
3Re' taq i hat sahchinaq chi kik' taq aq'ab',
ruum xa re' inkansanik taq i na a'n,
xa re' chukuj q'orik,
xa re' i yiib' wach q'orik i nelik taq cho panachii'.
4Ma' jino'q i re' rukorkiil i ruq'or,
ma' awach taj i rub'an i q'ataj q'orik parub'ehel,
inach'ikaa' la' taq ak'ux ruuk' i xachukuj q'orik.
Xa re' i yiib' wach q'orik
nujinaq taq cho panawánima,
eh korehtaal inawesaj taq wach saqum.
5Re' taq i na a'n re' re' je' rukab' i rumiloj i aaq'
je' rukab' i rukeem am.
Awach ink'uxwik reh i miloj re' re' inkimik,
eh noq i rupuch' i miloj, aaq' i nelik cho ar.
6Eh re' i rukeem am,
xama' inkorjik ta wo' chi itz'ihy,
je' wo' re' taq ayiib' wach na'ojb'al i na a'n xama' xta nokik wii'. Xa re' ikaansanik,
xa re' i ma' holohik taj taq i na a'n.
7Xa eliik taq tiooj chub'anariik i yiib' wach na'ojb'al,
xa re' i kikanteesjiik aawas achaaq' taq i na a'n atoob' ta xama' xta wo' naq kimahk.
Eh xa re' i rub'anariik i yiib' wach inayejaa' taq wach,
xa re' i sachooj taq inawaaj.
8Eh ma' nasik' ta taq i suq kiil k'uxliis,
ma' xta taq i korik i na a'n.
Re' la' chik ma' korik ta laj b'eeh taq i nak'am,
re' kik'amwik reh i b'eeh re' re' ma' nkireq ta rusuqkiil kik'ux.
9Ruum i re' ma' qareq taj i wihik parukorkiil.
Noq inqasik' naq i saqum xa panq'equm wo' qohkahnik,
noq inqasik' naq i rukorkiil re' chik i ma' holohik taj inqareq.
10Xa je' hoj moywach inqamajej i qab'eeh wataq tz'aq, xa je' cho ma' nqil taj i qab'eeh.
Atoob' ta kab'lajora wo' naq i q'iij wilkooj
inqatoxk'iij nah qooq, je' rukab' inqak'ul chaq'ab'
eh xa je' cho hoj yowaab' noq inqik'raaj.
11Eh chi qunchelaal i hoj inqak'er qachii', je' rukab' i rub'an i oso,
je' rukab' noq i ruk'er chii' i paloma chi ruyub'jiik i ko'lenb'al qiib',
xama' qoko'ljik ta wo' hoq.
Eh inqaaj naq chi naaqeliik panti' k'axik xama' qoh elik ta wo' hoq.
12Ma' qoh ehteesjik ta chupaam
ruum xiik'naah i qamahk,
xti korik chi je' re' ruum re' hoj wilik panqak'ux i qamahk.
Eh qeht'al chi ma' k'isiin i yiib' wach inqa a'n.
13Korik wo' hoq chi ma' qanimaj taj i QaJaaw,
eh ma' korik ta wach qak'ux ruuk'. Ma' nqaaj ta rutahqaljiik,
xa re' inkahsanik inqaq'or rib'iral, xa re' i ma' holohik taj inqa a'n,
xa re' i rujot'ariik i tokoom inqa a'n.
14Ma' korik ta qohq'orik,
ma' nqareq taj i korik chi b'anarik,
aha' imb'aan i q'ataj q'orik ma' imb'aan taj i korik.
Eh ma' awach taj imb'anik reh i rukorkiil.
15Eh ma' awach tamb'anik reh i korik,
awach naq iraaj rukanaam rub'aan i ti' k'axik inkiyeew pan ti k'axik.
Eh re' i QaJaaw Dios ma' imponik ta chuwach
chi ma' awach ta imb'anik reh i rukorkiil.
16Re' i QaJaaw Dios xsahchik ruk'ux
noq xrilow chi ma' awach ta yej-anik reh taqe i re'.
Ruum aj re' ruuk' i rajaawriik xuko'leej taqe i tinamit,
xuch'ikaa' i wihik parukorkiil.
17Re' i wihik parukorkiil xuk'am chaloq je' naa xukoj chi ruch'ihch' so',
eh re' i ko'lenb'al iib' je' naa xukoj chi ruch'ihch' puneet.
Eh je' naa xukoj chi ruso' i rujosq'iil,
noq xuq'aj wach keh i aj ixowaal i xkian.
18Re' i QaJaaw Dios naa ruq'ajam wach keh i je' rukab' i ruk'ul chi keh,
naa ruye'em taqe panti' k'axik i ki-ixowanik qawach.
Je' wo' re' i naa rub'anam kuuk' i
wilkeeb' chi chii' i palaw.
19Eh re' taqe
wilkeeb' cho pareelb'aal q'iij, i wilkeeb' cho parookb'aal q'iij,
naakinimam i Dios noq naakilom i runimaal wach.
Ruum re' reh naa ruk'uliik iloq chi je' rukab' jino'q i nim ha'
xan choqik chik k'ahchi' ruk'uyu'jiik ruum i kowlaj teew.
20Eh naa ruchaliik chi kiko'ljiik i wilkeeb' ar Sión,
re' taqe i riih rumaam i Jacob, re' taqe i naakiyot'om i kik'ux chi riij i kimahk,
inki i QaJaaw Dios.
21Re' i QaJaaw Dios je' wili i xuq'or:
Re' hin jinaj i nuyejaam taq wach awuuk'.
Re' chi re' i Santolaj Wuxlab'al
naa ruwihiik taq awuuk' chi juneliik,
je' wo' taq atijiik naa nub'anam
reh chi naa taq aq'orom rib'iral
keh taq awak'uun awixq'uun i hat.
Eh re' keh nee wo' chik inkiq'or
rib'iral keh i kak'uun kixq'uun, inki.
Biblia en Poqomchí: Santo Laj Huuj © Sociedad Bíblica de Guatemala 2009.