Ez 35
35
Re' ruq'orariik rib'iral i ti' k'axik xchalik chikinaah i wilkeeb' ar Seir
1Re' i QaJaaw Dios je' wili i xuq'or weh: 2Hat rak'uun winaq, ti tz'ehtanoq reje i wilik wii' i tinamit Seir, cha q'or reje keh i ti' k'axik naa ruchaliik chikinaah. 3Je' wili i cha q'or keh: Re' i QaJaaw Dios je' wili i ruq'or taq chawiij:
Re' hin ma' k'isiin i nuk'aah chikinaah i wilkeeb' Seir,
naa nuye'em taqe panti' k'axik,
naa nusacham wach i kitinamiit.
4Eh re' tinamiit Seir ruch'ihil taqe i tinamit ruchopom naah
naa nukanaam chi xan tz'irik chik paam.
Ruuk' i re' naa kinab'eem chi re' hin i k'achlik Dios.
5Re' keh ma' k'isiin ta xkixowaaj wach i tinamit Israel. Eh xkiyeew chi kimik ruuk' q'aslaj ch'ihch' noq wilkeeb' pa runimaal ti' k'axik ruum i mahk xkian. 6Eh re' hin i k'achlik Dios korik i nuq'or chi re' taqe i aj Seir naa nuye'em q'ab' chi naakikanteesjiik, korehtaal imb'aan keh kuum i aj kaansoom. Ruum chi xkian ikaansanik i keh naa wo' chik kikanteesjiik i keh. 7Re' i kitinamiit i aj Seir naa nukanaam chi ma' xta chik i wilik chupaam naa nusacham wach ma' naa ta chik nuye'em q'ab' chi awach i naa rokiik i naa reliik ar. 8Re' hin naa taqe nukansam, chi je' chinaah taqe inajt kinaah yuuq', taqe i rub'ol yuuq', wataq k'ixkaab', pantaq rooq ha' naa rukahniik chi tuch'lik i kiti'jolal i naa kikanteesjiik panq'aq'inik. 9Re' i kitinamiit naa nukanaam chi ma' xta chik i naa ruwihiik chupaam. Eh ma' jino'q chik patineel naa ruwihiik chupaam taqe i tinamit ruchopom naah.
10Re' taqe i aj Seir je' wili i xkiq'or: Re' taqe i ki'ib' chi tinamit re' i Israel re' i Judá naa rukahniik chi qeh atoob' ta wilik ar i Dios inki taqe. 11Eh re' hin i Dios i nuq'or i korik chi naa nuye'em i nujosq'iil je' rukab' i kijosq'iil, je' rukab' ixowaal, je' rukab' i kaqwachiil xkian i keh reh taqe i aj Israel. Eh noq naa nuye'em taqe chutojariik i kimahk i keh naa kinab'eem chi re' hin i k'achlik Dios. 12Eh naa wo' kinab'eem chi re' hin xb'iraj chu'nchel i rub'ajariik i ye'aab' Israel xkian. Eh je' wili i xkiq'or chi riij: Yu'naak xama' xta chik i wilik chupaam neerub'an chi neenkuxik qasacham wach, inki taqe. 13Ma' holohik ta wo' xiq'orik chi wiij i hin, ma' k'isiin i yiib' wach q'orik xkiq'or chi wiij. Eh re' hin ti xb'iraj. 14Re' hin i Dios je' wili i xnuq'or chikiij: Chu'nchel i tinamit naa rusuuqb'iik kik'ux noq naa kib'iram chi naa nusacham wach i tinamit Seir. 15Ruum re' keh xsuuqb'ik kik'ux noq xsahchik wach i tinamit Israel. Re' i tinamit Seir je' wo' re' i naa ruk'ulum, naa wo' rukahniik chi ma' xta chik i naa ruwihiik chupaam. Ruuk' i re' naa kinab'eem taqe i aj Edom chi re' hin i k'achlik Dios, tiko'q keh, inki i Dios.
Currently Selected:
Ez 35: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
