Ez 32
32
Re' i kireey i aj Egipto xpajarik ruuk' i josq'laj chikop
1Eh pampeet q'iij reh i rukab'laaj poh reh i rukab'laaj haab' qak'amariik reje Babilonia je' wili i xuq'or weh i QaJaaw Dios: 2Hat rak'uun winaq cha tz'uyej reh i kireey i aj Egipto i tz'uuy reh i ruti'kiil k'uxliis, je' wili i neenaq'or reh:
Re' hat je' akab' i kaq b'ahlam
chi kixilak i nimaq tinamit,
je' wo' akab' i josq'laj chikop wilik panim ha'
i rut'axlom paam i ha' ruuk' i rooq,
eh i ruch'uwa'risaj wach.
3Re' i QaJaaw Dios je' wili i xuq'or: Re' hin naa nutaq'aam reje i ma' k'isa tinamit naa ruchopariik kuum je' naa ruxirob' i naa kikojom.
4Re' hin naa nuye'em q'ab' chi naa kiqerem wach ak'al,
naa rukahniik chi kutlik i ruti'jolal.
Eh re' taqe i k'uch naa ruk'uxwiik i reh,
korehtaal naakinujiik i josq'laj
chikop noq naa kik'uxum keh.
5Re' hin naa nuye'em q'ab' chi xa aha' naa rukahniik
chi tuch'lik i ruti'jolal wataq yuuq' k'ixkaab'.
6Re' i rukik'eel naa rut'aqsam wach aak'al,
naa runujiik wataq yuuq',
wataq k'ixkaab', pantaq rooq ha'.
7Eh noq naa nusacham wach
naa ruq'equumriik paam i taxaaj,
ma' naa ta chik kisihq'iniik i ch'umiil, i q'iij, ruum i suutz'.
Eh re' poh ma' naa ta chik rusihq'iniik.
8Eh ruum i ru mahk i reh
ma' naa ta chik kisihq'iniik i saqum wilkeeb' cho pan taxaaj,
naa nuq'equm b'risam paam i taxaaj, inki i QaJaaw Dios.
9Eh ma' k'isiin i tinamit naa ruchaliik kiyo'jiik noq naa kib'iram chi naa ruk'amariik reje i reh, je' wo' taqe i rutinamiit pan tokoom tinamit, re' i ma' keht'al ta naq. 10Ma' k'isiin i tinamit naa rusahchiik kik'ux noq naa kib'iram i naa ruk'ulum noq naa rukimiik, naa ruchaliik kiyo'jiik taqe i kireey. Eh noq naa nuye'em q'ab' chi naakesam chaloq i kiq'aslaj ch'ihch' taqe i aj ixowaal chikiwach naakib'arb'otiik ruum kiyo'jiik. 11Re' Dios je' wili i xuq'or:
Ruuk' i ruq'aslaj ch'ihch' i Nabucodonosor naa rukanteesjiik.
12Re' taqe i ru soldado xiik' naakijosq'iil
ruuk' i q'aslaj ch'ihch' naa kikansam i
rutinamiit i kireey i aj Egipto
atoob' ta xiik' wo' naq naah kik'ihaal.
13Re' hin naa nukansam
taqe i ruwaakaax i nuk'inik reh i ruhaa',
eh ma' naa ta chik kiyeq'em chii' i ha',
ni xata re' taqe i tinamit naakiyeq' wiik chii'.
14Chi je' re' naa nusaaqb'isam wach i ha',
xa je' chik saqiil wach aseite naa rukaniik,
eh naa rub'eeh rooq i ha' chi korik.
15Eh noq naa nusacham wach i tinamit Egipto,
naa nukanaam chi xan tz'irik chik paam.
Ruuk' i re' naa runab'eem chi re' hin i k'achlik Dios,
tiko'q reh panatz'uuy, inki weh i Dios.
16Re' i tz'uuy wili reh i ruti'kiil k'uxliis, inaakitz'uyem chu'nchel ixoq wilkeeb' chupaam taqe i tinamit ruum i ruti'kiil kik'ux chi riij i tinamit Egipto, chikiij taqe i wilkeeb' ar, inki i QaJaaw Dios.
17Eh chupaam i ho'lajuuj rub'eeh i poh reh irukab'laaj haab' qak'amariik reje Babilonia, je' wili i xuq'or weh i QaJaaw Dios: 18Hat rak'uun winaq cha tz'uyej i tz'uuy reh i ruti'kiil k'uxliis chikiij i rutinamiit i Egipto, je' wo' chikiij taqe ixoq wilkeeb' ar, chikiij taqe i k'amal kib'eeh, je' wili i cha q'or keh: Re' taqe i wilik kajaawriik xkuxik kikimiik xkik'ul keh je' rukab' i xkik'ul i kansamaj taqe chaloq.
19¿Mi xiik' taq naah aholwochiil re' chi ma' naa ta taq akanteesjiik?
Xti korik la' chi naa taq akanteesjiik chi je' rukab'
i ma' kinimanik ta reh i Dios, tiko'q keh.
20Re' taqe i aj Egipto junkimiik taqe kuuk'
naa kikanteesjiik panq'aq'inik ruuk' i q'aslaj ch'ihch',
eh je' wo' taqe i ruk'ihaal tinamit.
21Eh re' taqe i k'amal b'eeh q'e' kow kiib' wilkeeb' pan kiye'aab' i kamnaq,
naa kik'ulwiik keh i aj Egipto, je' wo' intowik naq keh,
je' wili i naa kiq'orom: Re' taqe i re' xi chalik kahnoq ayu'
kuch'ihil taqe i xi kanteesjik panq'aq'inik re'
i ma' kinimanik ta reh i Dios, inko'q taqe.
22Re' kireey i aj Asiria ar wilkeeb'
kuch'ihil taqe chu'nchel i ki soldado wilkeeb' pan kijuul
chu'nchel i re' panq'aq'inik xikimik.
23Eh xiik' naah chamiil muqulkeeb' ruum i ki soldado,
eh xkiyohb'isaj taqe i tinamit kok'achalkeeb' wo' naq,
xa re' la' xa xkuxik wo' kikimiik panq'aq'inik.
Eh yu'naak panyejaal i muqulkeeb' wii' i aj Asiria muqulkeeb'.
24Re' kireey i aj Elam kuch'ihil taqe i ki soldado muqulkeeb' pan kijul.
Eh chu'nchel i re' panq'aq'inik xikimik,
re' taqe re' xkiyohb'isaj taqe i tinamit noq kok'achalkeeb',
eh yu'naak ti' xkik'ul,
ruum xi muhqik chik chupaam i ye'aab'.
25Eh yu'naak kamnaq chik i kireey i aj Elam
muqlik chik chi kixilak taqe i ru soldado.
Chu'nchel taqe i re' ma' nkinimaj taj i Dios,
xkuxik kikimiik panq'aq'inik.
Eh xkiyohb'isaj chee tinamit noq kok'achalkeeb'.
Xa re' la' yu'naak q'e' ti' xkik'ul ruum xi muhqik chik,
jinaj xi kahnik wii' chi kixilak taqe i kamnaq.
26Re' taqe i kireey i aj Mesec,
je' wo' hoq i kireey i aj Tubal, kuch'ihil taqe i ki soldado.
Eh chu'nchel taqe i re' ma' xkinimaj taj i Dios.
Eh panq'aq'inik xi kanteesjik
ruum xkiyohb'isaj i tinamit noq kok'achalkeeb'.
27Eh re' keh ma' xi muhqik taj
chi je' rukab' noq kimuhqik i aj q'aq'ineel najtir.
Re' keh junqajiik taqe panjul ruuk' i kitz'a'amb'aal reh i q'aq'inik,
inye'arik chikinaah i kiq'aslaj ch'ihch'.
Je' re' noq xi muhqik atoob' ta ma' k'isiin wo' naq
xkiyohb'isaj i tinamit noq kok'achalkeeb'.
28Re' taqe i aj Egipto je' re' i naakik'ulum
naa rusahchiik kiwach chi kixilak
i ma' kinimanik ta reh i Dios,
jinaj naakimuhqiik wii' kuuk' i kamnaq taqe chaloq panq'aq'inik.
29Re' taqe i kireey i aj Edom ruch'ihil taqe i k'amal
kib'eeh, atoob' ta xwihik wo' cho kajaawriik
xa xiooj wo' wih-oq chi kixilak i kansamaj taqe
chaloq panq'aq'inik ar wilkeeb' wii'
i kamnaq ma' xinimanik ta reh i Dios.
30Ar wilkeeb' i ajaab'ees xi wihik cho
pantz'eet reh i rookb'aal q'iij, je' wo' taqe i aj Sidón.
Re' keh xti wilik wo' naq kajaawriik,
xkiyohb'isaj wo' chaloq taqe i tinamit.
Eh yu'naak jinaj chik wilkeeb' wii' kuuk' i kansamaj taqe chaloq panq'aq'inik.
Q'e' ti' xkik'ul ruum jinaj xi muhqik wii' kuuk' i ma' xinimanik ta reh i Dios.
31Eh noq naa rilom i kireey i aj Egipto wilkeeb' pan kiye'aab' i kamnaq taqe i rutinamiit taqe i ru soldado xikimik panq'aq'inik naa ruch'iklojiik ruk'ux. 32Re' i kireey i aj Egipto i ruyohb'isaj taqe i tinamit. Xa re' la' re' hin naa nuye'em q'ab' chi naa rojiik muhqoq chi kixilak taqe i kamnaq ma' kinimanik ta reh i Dios, re' taqe i xi kanteesjik panq'aq'inik, inki i QaJaaw Dios.
Currently Selected:
Ez 32: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
