Ez 28

Re' i Dios xuq'or chi naa ruchaliik i ti' k'axik chinaah i kireey i aj Tiro.

1Re' i QaJaaw Dios je' wili i xuq'or weh: 2Re' hat rak'uun winaq je' wili i cha q'or reh i kireey i aj Tiro: Re' i QaJaaw Dios je' wili i xuq'or chawiij:

Re' reh q'e' xunimb'isaj riib',

noq tzunlik paruye'aab', xukoj riib' chi Dios,

xa ruum chi kotimaj riij chi plata i rutinamiit.

Xanaah re' xa winaq wo' hoq ma' re' ta Dios,

xukapaaj chi je' rukab' i

runa'ojb'al i Dios i runa'ojb'al.

3¿Mi xiik' naah re' i runa'ojb'al i reh chuwach i Daniel?

¿Mi chu'nchel re' i na'ojb'al reht'al?

4Ruum chi wilik runa'ojb'al, eh chi q'e' kow i rub'an riib'

ma' k'isiin xb'ehomb'rik.

Xunujisaj taqe i ru kaxa ruuk' i oro, ruuk' i plata.

5Eh ruum chi wilik runa'ojb'al

chi yak xumol wach i rub'ehomal,

eh ruuk' i rub'ehomal ma' k'isiin ta xunimb'isaj riib'.

6Je' re' noq re' hin i Dios i nuq'or,

chi ruum chi xukoj riib' chi dios.

7Re' hin naa nuk'amam taqe chaloq i tokoom tinamit chub'anariik reh.

Re' taqe i q'e' kow kiib',

eh ruuk' i q'aslaj ch'ihch' naa rub'aan keh

atoob' ta naq q'e' holohik,

naakiye'em wach ak'al i ruholwochiil.

8Re' reh naa kikutum

paruchamiil i palaw

xiik' nah ti'kiil i kimik naa ruk'ulum.

9¿Mi konaa ruq'orom re' chikiwach taqe i aj ixowaal

chi re' reh i Dios?

Re' reh ma' re' ta Dios xa winaq wo' hoq

ma' nee ta ruko'leej riib' chikiwach i naa rukansaniik reh.

10Re' reey re' re' naa rukanteesjiik

kuum i tokoom tinamit,

chi xa je' kikanteesjik ma' kinimanik ta weh, tiko'q reh, inki weh i Dios.

11Re' i QaJaaw Dios, je' wili i xuq'or weh: 12Re' hat rak'uun winaq cha tz'uyej i tz'uuy reh i ruti'kiil k'uxliis reh i kireey i aj Tiro, je' wili i cha q'or reh: Re' i QaJaaw Dios je' wili i xuq'or chawiij:

Re' reh korik naq wach ruk'ux,

wilik naq runa'ojb'al, eh q'e' naq holohik.

13Je' naa chupaam i ye'aab' ru Edén i Dios wilik.

Re' reh xixoyej riib' ruuk' taqe ab'aj kirob' rotik,

re' ruuk' taqe i crisolito, jade,

topacio, kornalina,

jaspe, zafiro granate, esmeralda,

re' taqe i chib'ih i wilik reh, ka'xikin re' ruuk' i oro,

xa re' wo' rukorjiik i rutz'uhk'riik chee reh.

14Re' hin xnukoj chi rilariik i tinamit chi je' jinaj ánjel.

Je' naa chinaah i nuSantolaj yuuq' xnuyeew,

je' naa xilak ab'aj xan rob'rotik chik xnuyeew chi b'ehik.

15Noq xokik chi taaq'anik

xti manlik wo' naq wach i runa'ojb'al xub'an,

xa re' la' korehtaal xutoq'aa' rub'aan i yiib' wach na'ojb'al.

16Ruum chi yohb'aal wach i yak i xub'an

xutoq'aa' rub'aan i yiib' wach na'ojb'al

je' wo' taqe i mahk.

Ruum i re' xwesaj wo' chik chinaah i nuSantolaj yuuq'

xwesaj chi kixilak i ánjel incha'jinik naq reh,

eh xwesaj wo' chi kixilak ab'aj xan rob'rotik chik.

17Ruum i ruholwochiil q'e' xunimb'isaj riib',

ruum chiyohb'aalchik wach i rub'an riib'

xsahchik paruk'ux i runa'ojb'al.

Re' hin naa nuye'em wach ak'al xa se'lb'al chik

naa nukanaam wii' chikiwach taqe i reey.

18Re' reh yohb'aal wach i mahk xub'an,

i leq' ruuk' i yak xub'an, xich'uwarisa paam i ye'aab' kinlooq'jik wii'.

Ruum aj re', re' hin naa nuye'em q'ab' chi naa ruqopiik ruq'aq'al i rutinamiit.

Eh chu'nchel naa kilwiik reh chi xchajrik chik ruum i q'aaq'.

19Eh chu'nchel i tinamit ineht'alinik wach

naa ruchaliik kiyo'jiik

ruum i naa ruk'ulum.

Xa ma' xta chik kamaj naa rukahniik

naa rusahchiik wach, tiko'q reh, inki i Dios.

Re' i ruq'orariik chi xkik'ul i ti' k'axik i aj Sidón

20Re' i QaJaaw Dios, je' wili i xuq'or weh: 21Re' hat rak'uun winaq ti tz'ehtanoq reje i wilik wii' i tinamit Sidón cha q'or rib'iral reh i naa ruk'ulum, je' wili i cha q'or reh. 22Re' i QaJaaw Dios je' wili xuq'or chawiij:

Re' hin ma' k'isiin i nujosq'iil chikinaah i aj Sidón

naa kiin kiloq'em noq naa nuq'atam i q'orik chikinaah,

eh naakilom i nuSantohiil.

Ruuk' i re' naa kinab'eem chi re' hin i k'achlik Dios.

23Re' hin naa nuye'em i

kaq yab'ilaal chikinaah,

naa rub'eeh kik' pan kitinamiit.

Re' taqe i kamnaq xa aha' naa kikahniik chi tuch'ulkeeb',

xa aha' naakikanteesjiik ruuk' q'aslaj ch'ihch'.

Ruuk' i re' naa kinab'eem chi re' hin i k'achlik Dios.

24Eh re' taqe i aj Israel keh ma' naa ta chik rub'aan ti' k'axik keh.

Re' i je' rutoq' k'iix imb'aan keh kuum

i tinamit wilik chi kijunsuut inixowanik kiwach.

Ruuk' i re' naakinab'eem chi re' hin i k'achlik Dios, inki weh i Dios.

25Re' hin i Dios i nuq'or chi naa wo' chik numolom kiwach i aj Israel pan kitinamiit naa wesam taqe chaloq chupaam i tinamit nutukem reje wii' kiwach. Naa nuk'uhtaam i nuSantohiil chikiwach i nimaq tinamit. Re' taqe i aj Israel naa wo' chik nuye'em taqe pan kitinamiit, re' wo' i tinamit nuye'em cho reh i Jacob re' waj kamanoom. 26Ar naa kik'achariik chi ma' xta chik ti' naa rub'aan keh. Eh ar naa kiyejaam kipaat, naa kitikim i ki uuva. Eh re' hin naa nuye'em taqe chutojariik i kimahk i tinamit chi kijunsuut, re' taqe i ixowinik i kiwach i aj Israel. Ruuk' i re' naa kinab'eem chi re' hin i k'achlik Dios inkinimaj i aj Israel, inki.

Currently Selected:

Ez 28: POK

Highlight

Copy

Compare