Dan 12
12
Re' taqe i naa ruk'ulariik pantz'apaab' ponoq wach reh i q'iij
1Eh je' wili i xuq'or weh i je' ruwii' ánjel: Chupaam i jumehq' re' re' naa ruk'uliik iloq i ánjel Miguel re' inko'linik reh aatinamiit Israel.
Eh chupaam i q'iij re' re' yohb'aal wach i ti' k'axik naa ruk'ulariik
ma' jank'al ta nk'ularik i rutohq'iik chee k'acharik.
Xa re' la' re' taqe i aatinamiit i hat naakiko'ljiik
je' wo' chu'nchel i tz'ihb'amaj i kib'ihnaal chupaam i huuj.
2Eh ma' k'isiin i kamnaq muqulkeeb'.
Wilik inaakiwuktiik chaloq chuk'ulariik i juneliik k'achariik.
Wilik i naakiwuktiik chaloq k'uhtb'al kik'ixb'ilaal,
naa kojiik pantojb'al mahk, chi juneliik.
3Re' taqe wilik kina'ojb'al, re' taqe i xik'uhtanik reh i korik,
naakik'uhtaam i kirusaqumaal chi juneliik,
xa je' chik rukab' i rusaqumaal i q'iij, i kisaqumaal
i ch'umiil pan taxaaj.
4Eh re' hat Daniel chamol pan awánima taqe i xawil, eh chab'ot wach i huuj xatz'ihb'aaj wii chalutz' korehtaal chik i rureq i q'iij q'orooj chaloq. Ma' k'isiin taqe i naa kojiik, naa kichaliik chusik'ariik ruman i kina'ojb'al, inki weh i ánjel.
5Chi riij i re', re' i hin Daniel kiib' wo' chik taqe i ánjel wilkeeb' ar, k'ul pa'alkeeb' chi chii' i rooq ha'. 6Eh jinaj keh i re' xupahqaaj reh i ruk'uliil re', re' ruuk' i q'e' holohik laj lino i ruso', re' i pa'lik chinaah i ha' je' wilik i xuq'or reh: ¿Kojaruuj i maahyik i sachb'al k'uxliis wili? inki. 7Re' i holohik laj lino i ruso' pa'lik chinaah i ha', xijosaj kab'chel i q'ab' pan taxaaj xuq'or i korik parub'ihnaal i k'achlik Dios wilik chi juneliik, je' wili i xuq'or: Re' sachb'al k'uxliis re' re' naa ruk'ulariik chuwach ixib' haab' ruuk' yejaal, kore' noq naa ruk'uhliik i rajaawriik i rutinamiit i Dios noq naa rukuxiik ruk'ulariik i re', inki.
8Eh re' hin xb'iraj wo' noq xuq'or, xa re' la' xama' xnureq ta wo' chi riij eh xnupahqaaj reh chi je' wili: Jaaw ¿Kojaruuj inkuxik ruk'ulariik chu'nchel i wili? kinki. 9Eh re' i reh je' wili xuq'or: Hiy reje Daniel ruum re' taqe i re' komajaa' pee naa rukaniik chi riij yu'naak, kore' noq naa ruponiik i q'iij q'atooj chaloq noq naa rukaniik chi riij chu'nchel i wili. 10Eh ruuk' taqe i ti' k'axik ma' k'isiin taqe naakisaqb'isam wach i kánima. Eh re' taqe i yiib' wach kina'ojb'al keh xama' naa ta wo' kireqem chi riij. Eh re' taqe i wilik kina'ojb'al naa kireqem chi riij chu'nchel i re'. 11Eh noq esamaj chik i korik mayiij inye'arik eqal eqal parupaat i Dios konaa chik rik'iik jinaj miil ruuk' ach lajeeb' ma' ixib' siento q'iij noq naa rokiik i xiik' naah ch'uwa'iil wach na'ojb'al chupaam i rupaat i Dios. 12Atoob' reh i awach i konaa ruye'em chi naa rik'iik i jinaj miil ruuk' ixib' siento ruuk' ho'lajuuj ru ka'winaq q'iij. 13Re' i hat Daniel hiy reje chawach korehtaal tikimik reje noq naa awojiik hi'loq panjul, eh pantz'apaab' wach reh i q'iij, naa wo' chik awuktiik chaloq chi k'achlik awach chuk'ulariik aakooch, inki weh i ánjel.
Currently Selected:
Dan 12: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
