Tit 3
3
Is beybal eb creyente
1Cha jek na eb creyente tu', tol yikem chi yut ba eb bay masanil eb yajaw. Yowalil chi yikej eb bay chi yal eb. Tzanc'al tzet mulnajilal tol watx', bekanokab chi yut eb c'ul watx'neni. 2Manokab comonok chi buchwaj eb yin yet animail. Manokab comonok chi yak'lej eb owal yetok junok mactxel. Watx'okab chi yut eb is nabal, mansookab chi yut ba eb bay masanil anima.
3Yujtol a yet yalantok, c'am c'apax co nabal ayon ti'. Pit on bay Dios. C'aynak on tok yet tu'. Max jak' serbil tzanc'al tzet yobtakil max jochej ocok. Caw wal yob co beybal yet tu'. Chi jak' sawenal yin eb jet animail watx' ay. Yajbejtak jili yul sat eb jet animail, yetok c'apaxok, ayonxac'al oc max co yajlej aj co ba. 4Palta max tx'oxaj Cham co Colomal Dios is watx'c'ulal, c'al is camc'ulal bay masanil anima. 5Yuj tu', max on colchaj el yuj. Man yujok junok tzet watx' max el juneni, xan max on is colo'; palta asan yuj max ok' c'ul Cham jin. A yet max tx'ajon el co yobtakil jin, axca wal tol max on alji yet cayelal. A Yespíritu max q'uexon co nabal. 6Yuj co Colomal Jesucristo xan max yatek Dios Yespíritu ayon yin masanil is c'ul. 7Xan watx' on yul sat, yujc'al is watx'c'ulal. Yuj tu' xan ok yak' c'apax co k'inal tol ayc'al yin tojbalk'inal, jun ayc'al oc yipok co c'ul.
8A juntzan chi wal ti', yel. Xan chi wochej tol yayjic'al alubtanen sic'libil juntzan cuybanilej ti', yet watx' a eb chi yaoc c'ul yin Dios, chi yaoc eb yin c'ul yunen tzet watx'. Caw watx' juntzan cuybanilej ti'. Caw chi oc yopiso juj co masanil. 9Manchak aoc a ba yetok eb comonc'al chi teyelej ba yin tzet nabac'al, c'al xol eb asan yabixal eb ichmamej chi yaltek. Manchak a c'apax oc a ba yetok eb comonc'al chi yak'lej owal, c'al yetok eb chi teyelej ba yin ley Moisés. C'am tzet chi yi' eb yin juntzan chi yalubtanej tu'. Nabac'al chi yetnej ba eb.
10Ta ay eb chi ochen chi pojchaj eb creyente, cha tenchanej eb junel cayelok. Ta c'am chi yikej eb, che yiel eb e xol. 11A eb caytu' chi beybalnej, ojtaknej elok tol etaxnakxa el eb. Munilc'al yojtakxa eb tol lownakxa yin eb yuj is yobtakil.
Chekbanil Tito yuj Pablo
12Ok in chektok juẍtak Artemas ayach, ma xin, a juẍtak Tíquico ok tok. A yet chi apni ocok, chak' ep a toj bay conob Nicópolis. Ata bay tu' ok on k'anjabok, yujtol chi wochej a tu' ayin ec'ok yet chi ec' nabil k'inal. 13A yet chi toj nak juẍtak licenciado Zenas yin is viaje yetok juẍtak Apolos, colwajan yin yet mimanil eb. Jantakc'al tzet chi k'anabax yuj eb yulak be, ak' bay eb, majaxta' aj eb. 14Cha cuy eb jet creyenteal bay tu', tol chi yun eb tzet watx', cax chi colwaj eb bay eb ay is majilal, yet watx' ay yopiso eb yul sat Dios.
Chi toj cawil c'ul eb creyente
15Chi yatok masanil eb ayic' wetok cayti' cawil a c'ul. Chak' cawil c'ul masanil eb creyente chon camc'ulnen bay tu'. Yak'okabc'al Dios is watx'c'ulal ayex e masanil bay tu'.
Currently Selected:
Tit 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989