Nm 27
27
Is satak eb cutz'inej
1A yin is tribual Manasés ay owan ix nuejc'al ba eb, a ton Maala, Noa, Hogla, Milca c'al Tirsa; a eb ix tu' is cutz'in cham Zelofehad. A ton txolilal yichmam Zelofehad ti': Hefer, Galaad, Maquir, Manasés c'al José. 2A owan eb ix nuejc'al ba ti', max toj eb bay mantiado bay chi co chalej co ba yetok Jehová. Max toj eb ix k'anjab yetok cham Moisés c'al cham sacerdote Eleazar, yetokc'al masanil eb yajawil conob. Max yalon eb ix bay eb axca ti': 3A co mam on max cam bay takin tx'otx', palta c'am yoc yin eb yet Coré, tol max meltzoj oc ajc'ulal yin Jehová, yujc'al is mul yul yet max cami, c'am wal junok is c'ajol max cani. 4Palta man is mojok tol chi c'aycan el is bi co mam on bay yul is listail co tribual, yujc'al tol c'am junok is c'ajol max cani. Yuj tu' xan ak'ek junok makan co tx'otx' on xol yet eb yuẍtak co mam on, ẍi eb ix.
5Max yalon cham Moisés masanil tzet max yal eb ix ix tu' bay Jehová. 6Max tak'wi Jehová bay: 7A eb ix cutz'in Zelofehad yel chi yal eb; ak' junok makan tx'otx' eb ix xol yet eb yuẍtak is mam eb ix tu', axa eb ix chi ioncan is satak is mam tu'. 8Al c'apax bay eb israel: Ta ay mac chi cam yet c'am junok is c'ajol chi cani, a is satak chi je' tojcan yul k'ab is cutz'in. 9Palta ta c'am junok is cutz'in xin, a bay yuẍtak chi cancan is satak tu'. 10Ta c'am yuẍtak xin, a bay eb yuẍtak is mam, a tu' chi cancan is satak tu'. 11Ta a is mam tu' c'am pax yuẍtak, a bay junok eb is yican tol cawilto ay, a bay tu' chi cancan is satak tu'. A jun ti' ley chi yuncan xol conob Israel, axca chi yun walon ayach ti', ẍi Jehová.
Max alaycan oc Josué is q'uexelok cham Moisés
(Dt 31.1-8)
12Max yalon Jehová bay cham Moisés axca ti':
—Ajantok bay jolom witz Abarim cax cheloncantok tx'otx' ok wak' bay conob Israel. 13Asan chi lajwi eloncantok tx'otx' cax chach cami, axca wal max yun cam oẍtak Aarón, 14yujtol maj wal e yikej in e yion aj can bay tz'inan tx'otx' Zin, yet max tit yowal eb anima win; maj e yikej e tx'oxon el satak eb e yet conob tol asanxanej in ocok yet max aj yaw eb k'anon aej yuq'uej, ẍi Jehová. (Max uj jun ti' bay a' aej chi yik Meriba bay Cades, bay tx'otx' tz'inan tx'otx' Zin.)
15Max yalon cham Moisés bay Jehová axca ti':
16—Mamin Jehová, ach chak' is k'inal masanil anima, a tinani' satnej oc junok mac chi oc yajawilok a conob, 17yet watx' chi yikbajtok bayc'al chi ca toji, yet watx' c'am chi c'ayic' eb axca no calnel tol c'am yilomal, ẍi cham Moisés.
18Max tak'wi Jehová bay cham Moisés axca ti':
—Caw wal ayoc Wespíritu yin Josué is c'ajol Nun, xan aoc a k'ab yiban 19bay satak wal sat sacerdote Eleazar, c'al satak masanil conob Israel, cax chaoncan oc yikbej. 20Acan oc janic'ok ekbej yiban, yet watx' ok yikej masanil eb anima bay tzet ok yala'. 21Yowalil ok k'anlejc'al bay Eleazar, axa pax ok k'anjab ayin yuj, cax ok walon bay yin ch'en Urim tzet ok yunej. Axa Josué ok alon bay eb conob tzet ok yun eb, ẍi Jehová.
22Max yikej cham Moisés masanil tzet max yal Jehová; max yitok cham Moisés cham Josué bay satak cham sacerdote Eleazar c'al satak masanil eb conob Israel. 23Max lajwi tu' cax max yaon ajtok cham Moisés is k'ab yiban is jolom cham Josué cax max yak'oncan is yikbej yiban satak conob, axca max yun yalon Jehová bay.
Currently Selected:
Nm 27: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
