Lv 13
13
Chekbanilej yin ilya' chi yik lepra
1Max yalon Jehová bay cham Moisés c'al bay cham Aarón:
2Ta ay junok chi malaj is mimanil, ma chi aj wotxjab yin, ma cak sulinak yili is mimanil, talaj c'uxan lepra*fn* jun ilya' tu', yowalil chi ilaytek bay Aarón, ma bay juntzanokxa eb sacerdote is yinatil Aarón tu'. 3Axa jun sacerdote tu', chi ilon jun ilya' ay yin is mimanil jun anima tu'. Ta a xil bay ay jun ilya' tu' tol sakxa, ma miman txequel tol man asanok yin tz'umal ay, palta najat-xa yich, a jun ilya' tu' lepra chi yal tu'. A yet mayal il-lay jun anima tu' yuj junok sacerdote, axa chi aloni tol c'amxa chi je' yayji ec' jun anima tu' xol yet animail.
4Ta sak yili tz'umal bay ay jun ilya' tu', palta cochwal asan yin is tz'umal ayocok, man pax sakok is xil bay tu', yowalil chi makay jun anima tu' yuj jun sacerdote yin ukebok c'ual. 5Axa yet chi lajwi ukeb c'ual tu', cax chi il-lay pax jun anima tu' junelxa. Ta a jun ilya' tu' ac'ala'c'al c'am chi beytoji, chi lajwi yil-lay tu', cax chi makay pax ukebokxa c'ual. 6Axa yet chi lajwi pax ukebxa c'ual tu', cax chi il-lay pax yuj jun sacerdote tu' junelxa. Ta a jun ilya' tu' lananxa c'ayajok, c'am chi beytoj yin is tz'umal jun anima tu', catatu' chi yalon jun sacerdote tol man lepraok chi oni, comon ilya'c'al. Chi lajwi tu' cax chi tx'ajon jun ya'ay tu' is pichil, watx'xa chi yuncanok.
7Palta ta a jun ilya' yin is mimanil junok anima tu' chi beyc'al toji, caxc'al mayal yal jun sacerdote tol man lepraok, yowalil chi tit pax junelxa bay jun sacerdote yet chi il-lay junelxa. 8Ta a yet chi il-lay jun ya'ay tu' junelxa, chi yiloni tol a jun ilya' tu', lanan beytoj yin is mimanil, axa yalon jun sacerdote tu', tol a jun ilya' tu', lepra toni.
9Ta ay junok anima ay lepra yin, yowalil chi ilaytek bay eb sacerdote. 10A junok eb sacerdote chi iloni tatol lanan malajok, sakxa yili sat tu', cax lananxa c'apax sakbi el xil bay sat tu', txequelxac'al is chibejal. 11Ta axca tu', a ton jun tu' chi yik lepra, tol coc'xac'al xol chi tx'oxaj ba yin tz'umal is mimanil tu', xan chi yal jun sacerdote tu', tol c'amxa chi je' yec' xol eb yet animail. Manxa yowalilok chi makay yin ukebokxa c'ual.
12Ta ayman chi beytoj jun ilya' tu', cax chi nojil yin masanil is mimanil yuj, atac'ala' chi yun yilon oc junok sacerdote tu', 13a yet chi lajwi yiloni, ta mayal nojil yin is mimanil, ta sakxac'al yili is mimanil jun anima tu' yuj, axa yalon tu' tol c'amxa is may. 14Ta ay junok c'ual chi txecloj aj is chibejal xol jun ilya' tu xin, c'amxa chi je' yayji ec' jun anima tu' xol yet animail. 15Axa junok sacerdote ok ilon jun ilya' tu', tatol chi txecloj aj is chibejal ok yila', axa yalon tu' tol lepra chi oni, c'amxa chi je' yayji ec' xol yet animail.
16Ta yintakilxa chi sakbi el is chibejal jun ya'ay tu xin, yowalil chi tit bay junok sacerdote, 17yet watx' chi il-lay yuj; a' ok ilonok tatol sakxa yili jun ilya' tu', axa ok alonok tol c'amxa is may jun ilya' tu'.
18Ta ay mac ay junok mal yabil yin, cax chi takayok, 19axa bay sat tu' chi mali, sak yili, ma cak sulinak yili, a jun tu' yowalil chi tit satak junok sacerdote. 20Axa jun sacerdote tu' ok ilonok, ta man asannejok yin tz'umal ayoc jun ilya' tu', ta sakxa xil bay sat jun yabil tu', axa ok alonok tol lepra max tx'oxaj ba yin jun anima tu', xan c'amxa chi je' yayji ec' xol yet animail. 21Ta chi yil xin, tol a bay ayoc sat tu', c'am chi sakbi el is xil, tol asan yin tz'umal ayocok, lananxa taki, a jun anima tu', yowalil tol chi makay ukebok c'ual. 22A yet chi lajwi ukeb c'ual tu xin, tatol yelc'ulalc'al chi beytoj jun ilya' tu' yin tz'umal jun anima tu', cax chi yalon jun sacerdote tol lepra chi oni, c'amxa chi je' yayji ec' xol yet animail. 23Palta tatol c'am chi beytoj jun ilya' tu' yin is mimanil, chi yal elapnok tol asan yechel jun yabil tu' aycanok, axa yalon jun sacerdote tu' tol c'amxa is may jun ilya' tu'.
24Ta ay junok mactxel ay junok tz'ayil yin is mimanil, ta a bay tz'ayil tu', a tu' chi txecloj is chibejal, axa yin chibejal tu' chi txecloj c'apax aj junok lepan sak ma cak sulinak. 25A junok sacerdote chi iloni, tatol a is xil bay tu' tol lananxa sakbi elok, lananxa toj yich jun lepan bay sat tu', tatol axca tu', ti tol lepra mayal txecloj aj bay is tz'ayil tu', axa jun sacerdote tu' chi aloni tol c'amxa chi je' yayji ec' xol yet animail. 26Tatol a yet chi yilon jun sacerdote tol c'am junok xil lanan sakbi elok, ta man lananok toj jun lepan tu' yich, palta tol lanan takayok, yowalil chi makay jun anima tu' yin ukebok c'ual. 27A yet chi lajwi ukeb c'ual tu', cax chi il-lay pax yuj jun sacerdote tu', ta mayal beytoj yin is chibejal jun anima tu', cax chi yaloni tol ya'ay yuj lepra, c'amxa chi je' yayji ec' xol yet animail. 28Palta ta a bay lepquiẍtak tu', waanc'al ocok, tol lanan c'ayajok, asantoc'al chi mal yuj tz'ayil, axa yalon jun sacerdote tu' tol a jun yailal tu' c'am is may, asan yechel jun tz'ayil tu' chi cani.
29Ta a junok winak ma junok ix chi aj junok yax k'ayil yabil yin is jolom, ma yalan is ti', 30a junok sacerdote, yowalil chi ilon jun tu'. Ta a jun yabil tu' tol lananxa toj yich, ma tol lananxa k'anbi el xil yuj, axa jun sacerdote chi aloni tol lepra ayoc yin jolom ma yalan ti' jun anima tu'. 31Palta ta a yet ok yilon jun sacerdote tu' tol a jun yabil tu', c'am yich chi toji, cax c'amto xil k'ek bay tu', a jun anima tu' yowalil chi makay yin ukebok c'ual. 32Axa yet chi lajwi ukeb c'ual tu xin, cax chi yilon pax jun sacerdote tu', tol c'am chi beytoj jun yabil tu', c'am yich, c'am xil chi k'anbi elok, 33axa yalon tu', tol chi tzuklay el xil yinlak sat yabil tu', cax chi makay yin ukebokxa c'ual. 34Axa yet mayal ec'tok ukebxa c'ual tu xin, cax chi yilon pax jun sacerdote tu' junelxa. Ta c'am chi beytoji, cax c'am chi toj yich yuj, cax chi yaloni tol c'am is may jun ilya' tu', asan tol chi tx'ajil jun anima tu' is pichil, watx'xa chi yuncanok. 35Palta ta axa chi yun xin, a yet mayal al-lay tol watx' c'ul tu', cax chi bey pax toj jun ilya' tu', 36yowalil chi il-lay pax jun ya'ay tu' yuj junok sacerdote junelxa. Tatol a jun ilya' tu' lanan beytoj yin tz'umal is mimanil, man yowalilok tol k'an yili is xil, lepra chi oni. 37Palta tatol lananxa tit xil k'ek, lananxa taki, axa yet chi yilon jun sacerdote tu' chi yaloni tol watx'xa c'ul jun anima tu'.
38Ta a junok winak ma junok ix tol ay lepquiẍtakil sak yin is tz'umal, 39a junok sacerdote chi ilon is tz'umal tu', ta saktak wal yili, palta c'am chi jopopi, comon ilya' chi on jun anima tu', c'am is may chi yal tu'.
40Ta ay junok winak chi puk xil is jolom, c'amxa xil jolom tu' chi cani, a jun tu' c'am is may. 41Ta asan bay satak chi puk xil, c'amxa xil chi cani, c'am is may jun tu'. 42Palta ta chi aj junok yax k'ayil yabil bay c'amxa xil jolom tu', sak ma cak yili bay c'am xil, a jun tu' lanan yaj lepra yin. 43Yowalil chi il-lay yuj junok sacerdote. Ta a jun yabil chi aj bay c'am xil jolom tu', sak ma cak yili, 44a jun anima tu' lepra chi oni. Chi yalon jun sacerdote tu', tol c'amxa chi je' yayji ec' xol yet animail yuj.
45A mactxel ya'ay yuj lepra, yowalil jerquiẍtak pichilej chi yaocok, chi el k'oxil is jolom, cax chi makay el nanok sat. Ta chi toj xol anima, chi el yaw, cax chi yalon axca ti': ¡Elanek, ya' in ay, ya' in ay! ẍi. 46A yet ayoc jun ilya' tu' yin, ay is may, yowalil chi ayji ec' tx'oklil bay yinel campamento.
47A yet k'uxtak yili junok pichilej tol lana ma lino, 48tzanc'al tzet makanil, chembil ma jalbil, ma junok tz'um tol mitx'k'abej yayji ocok, 49-50ta yax yili, ma cak yili juntzan k'uxtakil tu', a ton jun makan tol chi el lebebok chi yal tu'. A jun tu' yowalil chi tx'oxlay bay junok sacerdote yet chi yilon jun lepan k'uxtakil tu', cax chi makay ukebok c'ual jun tzet yetal tu'. 51Axa yet chi lajwi ukeb c'ual tu xin, cax chi il-lay pax junelxa. Ta mayal beytoj yin jun pichilej tu', ma yin junok tz'um tol chi k'anlayi, a jun tu' a ton juntzan k'uxtak chi el lebebok; a juntzan mitx'k'abej tu' ay is may. 52Tzanc'al tzet mitx'k'abejal tol ayxa jun tu' yin, yowalil chi ak'lay tz'a masanil; yujtol a jun tu' chi yetnejtok xiwil tzet yetal. 53Palta ta a yet chi yilon jun sacerdote tol c'am chi bey juntzan k'uxtakil tu', 54chi yaloni tol chi tx'ajlay el jun mitx'k'abej tu', cax chi makaytok ukebokxa c'ual.
55A yet mayal tx'ajlay el jun mitx'k'abej tu', catatu' chi yilon pax jun sacerdote tu'. Tatol c'am chi q'uexchaj yili jun lepan k'uxtakil tu', caxc'al c'am chi el lebebok, yowalil chi ak'lay tz'aok, caxc'al mi a jun k'uxtakil tu' ayoc yin, ma bay yul, yujtol yelxac'al ay is may jun makan tu'. 56Ta a yet chi yilon jun sacerdote yet mayal tx'ajlay el tu', lananxa c'ayaj jun k'uxtakil tu', chi lot'lay el bay ayoc jun k'uxtakil tu'. 57Palta tatol chi txecloj pax aj jun k'uxtakil tu' junelxa yin jun tu', yowalil chi ak'lay tz'aok. 58A pax yuj juntzan tzet yetal bay chi c'ayaj juntzan k'uxtakil tu' yin yet mayal tx'ajlayi, yowalil chi tx'ajlay junelxa, caytu' chi yun watx'jicanok.
59A ton juntzan chekbanilej ti' yin k'uxtak chi oc yin junok pichilej chembil ma jalbil, lana ma lino, ma junok tz'um, caytu' chi yun txeclojcan elok ta watx' yayji, ma man watx'ok yayji, ẍi Jehová bay Moisés c'al bay Aarón.
Currently Selected:
Lv 13: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
