Hab 3
3
Is txaj cham Habac
1A ton wal jun is txaj cham Habac is chekbej Dios ti'.
2A wal yet chi waben masanil tzet max on Mamin, caw chi c'ayxac'al aj in c'ul yuj. Yunokab yul co tiempoal ti', axca tzet max on yet payxa tu'. Tx'ox a miman yabenc'ulal jin, caxc'al nan xol yowal a c'ul.
3Max tit Cham Dios Asanxanej Ocok bay tzalan Parán yul yet Temán. Axa is tzekekial, max toj jopan bay masanil satcan; axa masanil yulyibank'inal max alon watx' k'anej bay Cham.
4Max jay Cham nan xol is jopopial. A yul is k'ab max eltek joplabok rayos; a' max tx'oxon el is yipalil tol c'uan ec' yuj.
5A satak Cham babel yapni oc ilya' tol ayxa is may; axa yet mayal ec'tok Cham, camich max ujcanok.
6Max bilaj tx'otx' tx'otx' ti' yet max oc wanaj Cham. Toxac'al max bilaj nacionlak yuj xiwc'ulal yet max oc t'anan Cham yin. A juntzan witz ayc'alta' yet payxa max pojtok, max uchchajtok masanil juntzan witz tu', a ton bay max ec'c'al Cham yettax yichbanil.
7Max wil wal yoc eb anima aj Cusán yin bilc'ulal, cax toxac'al max xiwaj eb cajan bay Madián.
8Tokwal a yin a' aejlak max tit owal Mamin Jehová. Tokwal a yin a' mar max k'ak'bi tit yowal a c'ul, xan max ach toj yin owal yuj ak'on ayc'ayok, axca tol max ach ajtok yiban chej, c'al yul carruaje yet owal.
9Axca tol max e ajtek a julbal yul tz'umal, max a watx'nej yin a julwaji. Max ak'on jak a' aej be sat tx'otx'.
10Caw wal max bilaj mimek witz yet max a tx'oxon a ba. Max tit mimek owal yaxnab bay satcan, cax max aj yaw a' mar yet chi bilajok. Yak'ban tu', yelxac'al ayxa may max yun yaj wan a' can.
11Axa c'u, yetok xajaw max oc wanajok, yet max el joplabok a julbal, cax max aj joplabok a lanza.
12Yetok yowal a c'ul max a tec'on ay tx'otx' tx'otx'. A wal yetok a k'ak'alc'ulal max a tec'on ay nacionlak.
13Max ach eltek colwaj yin a conob, c'al yin cham rey sic'bil oj. Max a mak' cam yajawil eb yobtakwom. Max ak' lajwok is conob eb, masantac'al max txecloj aj cimientoal yich.
14Ac'al oc yetok is julbal eb yajawil conob max a mak' camok, yet max jay lemnaj eb jin yin on yak'on lajwok eb. Max tzalojxac'al c'ul eb, axca junok chi naon mak'on cam junok meba' anima yin ewantakil.
15Axca tol max a tec'ay a' mar yetok chej, xan xiwil chi bil a' miman a' tu'.
16A yet chi waben masanil juntzan ti', chin xiwajok. Chi bilaj in ti'. Masanil in mimanil c'amxa yip, toxac'al chin telc'ojtok. Caxc'al mi axca tu', palta yin junc'ulalil chi wechbanej jun c'ual yet ok jay yailal yiban eb chi yak' owal jin.
17-18Caw wal ay in tzalojc'ulal yuj Dios in Colomal. Caxc'al c'am chi yak' te higo is xumaquil. Caxc'al c'am chi satni an uva, tamwal te olivo; caxc'al c'am chi satni awoj; caxc'al chi lajwi ay masanil no calnel, c'al no wacax, c'amxa no' yul corral, palta ok in bitnokc'al bay Jehová.
19A Jehová Cham Jajawil chi ak'on wip. Chi yak' yip wakan, yet chi je' in bey axca no tx'ucchej, cax chin yion ajtok can bay chin colchaji.
Bitnelayokab jun bit ti' ikbabil yuj cham yajawilal eb bitnom, yak'ban chin sonli yetok te son ay tx'anil.
Currently Selected:
Hab 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989