Hab 2
2
1Axca yayji oc junok taynemal conob yin yopiso, caytu' ok yun in taynen wabej tzet ok yal Cham Yajaw ayin, yet chi nachaj el wuj is paktzebal in k'anlebal bay, quin chi.
Max tak'wi Jehová
2Max paktzej Jehová ayin axca ti': Watx' chot a tz'iben yin junok jenan tx'otx', tzet ok in tx'ox ayach ti', yet watx' a mac chi iloni, chi yi bey jun k'anej ti'.
3A jun tzet yetal lanan elon ti', ayto yajapnok c'ual yuneni; palta yowalil ok yunej. Echbanejc'al, caxc'al ok mayjok, palta ok yunc'alta'a.
4Tz'ibej c'apaxok, tol a eb yobtakwom caw wal tol lues eb; palta eb watx' yul in sat xin, ok ayjokc'al ec' eb, yujtol chin yac'al oc eb yin c'ul, ẍi Cham.
A bay ok tokcan eb etnewom
5A an vino, chi etnelay eb lues tu' yuj an. Chi maynej aj ba eb. C'am chi oc wanaj eb sayon tzet chi yochej, cax lajan eb axca mukbanil camnak, c'am chi caktzaj aj chaon camnak tu'. Yuj tu' xan chi makbaj el ba eb yin masanil nacionlak.
6Palta a masanil juntzan nación chi ayc'ay tu', ok buchwaj eb yin jun mac chi ak'on ayc'ay eb tu', cax ok buchwajc'al eb axca ti': Ok'bal ach ch'an c'ul ach ti', tol chach oc beyomal yuj tzetak yetal tol man etok. ¿Bak'in ok a bek a wajban ec' bulan masanil tzet yetal cha cha' yuj majanbilal a beyomal? ẍi mi eb.
7A wal yet man naonok el oj, cax ok apnok oc eb jequelwom ayach, ok aj wan eb ach toj yak'on xiwajok, cax c'amxa janic'ok tzet yetal ok yak'can eb ayach.
8Max ecan ec' is tzet yetal eb anima bay xiwil nación, yuj tu' xan a eb maxto cani, ok yiec' eb a tzet yetal. Caytu' ok ach utlay yuj eb, yujtol xiwil mac max a mak' camok, cax c'am a yabenc'ulal yin anima bay yulyibank'inal, yetokc'al is conoblak.
9Ok'bal ach c'ul ach ti', yujtol max ak' noj atut yuj masanil elk'an, yet ok je' a colon a ba bay tzet yetal ay is may aloni.
10Axca wal tu' max yun eontek q'uixwilal eban yetok a conob. A achc'al oc max etek lowbanil eban, yuj max ak' lajwok el xiwil nación.
11Toltax is ch'enal pared, c'al te patzab, ok aj yaw yin ajc'ulal en.
12Ok'bal ach c'ul ach ti', tol max a tz'unay a conob yuj masanil tzet max e' yin yobtakil chonej, max ach aj can yuj a mak'om cam animail.
13A masanil mulnajil bay max c'unbi juntzan nación max ak' ayc'ay tu', nabac'al, k'ak'ej ok ak'on lajwok masanil tzet max watx'nej eb tu'. Caytu' max yun naon Jehová, Cham Yajaw yin Masanil.
14Tz'akan ok yun yojtaknelay el is mayk'ak'al Jehová yuj eb anima axca chi yun nojil a' mar yuj a' aej.
15Ok'bal c'ul mac chi yak' uc'wok an yet animail yuj yilon is q'uixwiltakil eb. Ok'bal ach c'ul, yujtol a yetok yowal a c'ul max exac'al el q'uixwil juntzan nación ay a cawilal; toxac'al max ec'can k'ek'on eb oj axca uq'uem an.
16Ach ti', manxa ok ach ilay can; palta tol ok il-lay a q'uixwiltakil. A Jehová ok ach ak'on q'uixwanok, axca uq'uem an. Ok ab wal yail yuj Cham, axca wal yailal max aoc yiban juntzan nación tu'. Yuj tu' xan a a maynejbail tu', q'uixwiltakxac'al ok oncan yuj.
17Ach ti', max a k'akay te mimek te' bay Líbano; axa tinani', chach ak'lay lajwok ayok, max a mak' cam no no' bay tu', axa tinani' axa no' ok aon oc xiwc'ulal en. Caytu' ok ach utlay yuj eb, yujtol xiwil mac max a mak' camok, cax c'am a yabenc'ulal yin anima bay yulyibank'inal, yetokc'al is conoblak.
18¿Tzet yopiso junok comon dios watx'nebil yuj anima? Asan yin on yikban c'aytok. A juntzan tu', c'am chi je' k'anjabi. ¿Tzet yuj xan a jun chi watx'nen tu' chi yaoc yipok c'ul?
19Ok'bal wal c'ul ex tol che yal bay jun yechelej tol te': I el a wayan, quex chi bay te'. Ajan wanok, quex chi bay ch'en ch'en tol c'amc'alta' chi je' k'anjabi. ¿Tom chi je' tx'oxon juntzan tu' junok tzet yetal ayex xin? A juntzan tu', c'am tzet chi je' yuj, yujtol c'am yiquisal, caxc'al tol jopopixac'al yili yuj oro ma yuj plata.
20Axa pax Jehová xin, ayic' bay yul is templo tol asan ay yet. Numayokab satak Cham masanil tzet yetal ay bay sat tx'otx' ti'.
Currently Selected:
Hab 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989