Ez 21
21
A yespada Jehová
1Lajwi tu xin, max k'anjab Jehová ayin max yaloni: 2Ach anima, meltzojantok acan bay yetc'ulal Jerusalén, cax chach k'anjabtok yin templo. Alcan el in k'anej yin conob Israel. 3Chaloni: Caywal ti' yalon Jehová axca ti': Ayin wal caw ok in oc ajc'ulal e yin. Ok wiajtek wespada cax ok in mak'on cam eb watx' is nabal yetok eb ajmul. 4Ok wiajtek wespada, cax ok in mak'on cam masanil yin jun lajan, eb watx' yetok eb ajmul, bay sur masantac'al bay norte. 5Masanil yulyibank'inal ok ojtaknen elok tol ayin max wiajtek wespada, cax majtoc'al in c'ubaj ajok, ẍi Jehová, cachi.
6Ach anima, jichchajokab a c'ul ok'i, ya'okab wal chi yab a c'ul, cax chach ok' wal satak conob. 7Ta c'uxan chi k'anlej eb ayach, tzet yuj xan chach ok'i ta ẍi eb, ala': Tol yuj wal yabixal jun tzet yetal toxa ok ujok xan chin ok'i. Masanil anima bay yulyibank'inal, manxa animaok ok yuncan el c'ul eb, toxac'al ok aycan nojan eb. C'amxa mactxel tol okto je' tec'ban ba, palta tol masanilxac'al ok bilaj yakan yuj xiwc'ulal. Ayin wal caw Jehová in chi wala' tol lanan jayoc tiempoal, yowalil ok yunej, ẍi Cham, cachi.
8Max k'anjab pax Jehová ayin, max yalon axca ti': 9Ach anima, k'anjaban el wuj ayin ti', chaloni tol axca ti' yalon Jehová:
Ilek wal ch'en espada lanan jayocok. A ch'en espada caw wal elxa yayji ye ch'en, toxac'al chi jopopi yili.
10Elxa yayji yet chi k'anlay yin tzoc'oj cam anima, chi jopnaj tac'al najat axca rayo. C'amxa tzalojc'ulal, yujtol a in conob max yintaknej el yailal c'al tenchebalej.
11A espada tu', jopopixac'al max yun watx'ji elok, yet chi k'anlayi. Mayal alay oc ye, jopopixac'al yili, yet chi alay oc yul k'ab jun mactxel ok tzoc'on cam anima yetok, cachi.
12Ach anima, elokab aw, ok'an, yujtol ok tzoc'lay cam eb aj israel yetokc'al masanil eb yajaw yayji bay in conob tu', yujtol ayoc yiban eb cam yetok in conob, yuj tu' xan mak' txam a c'ul yuj cusc'ulal.
13Wal yel lanan jayoc jun ak'bal porobal. Yujtol max e yintaknej el tenchebalej, xan ayin wal caw Jehová in chi wala', tol man watx'ok ok ex elocok.
14Ach anima, k'anjaban el yin in bi. Tzak' a k'ab yak'ban lanan tzoc'layc'al oc ch'en espada. Yuj tzoc'lay cam anima xan ay ch'en ti'; a yetok ch'en caw wal ay is may, tzanxac'al bay ok low camich yin eb masanil.
15A yuj jun espada ti', xan ok oc mimek xiwc'ulal, xiwil camich ok ujok. A bay masanil conoblak ok apnok oc ch'en tzoc'on cam anima tu' wuj, a ton wal ch'en toxac'al chi jopopi yili, el wal yayji ye yin tzoc'oj cam anima.
16Tol el yayji ye capaq'uil chi wochej, yet watx' chi tzoc' bay jun pac' c'al bay jun pac'xa.
17Ayin wal caw Jehová in chi wala', tol ok in tzak' c'apax in k'ab, masantac'al ok yal wal sicbi yowal in c'ul, ẍi Cham.
18Max k'anjab Jehová ayin max yalon axca ti': 19Ach anima, watx'nej yechel cabok be bay ok tok reyal Babilonia yetok yespada. A cab be tu' junnej conob bay ok elok axa bay ok poj ba xin. Ok a watx'nej oc cabok yechelej ok tx'oxon tzet conobal bay ok apnok junjun. 20Aoc yechel junok be bay ok catoj jun rey tu' yetok yespada, bay conob Rabá, a ton bay yul is tx'otx'al Amón; axa junxa be tu xin, chi apni oc bay yul is tx'otx'al Judá bay conob Jerusalén, tol watx' yayji oc is murallail. 21A reyal Babilonia ok oc waan bay chi poj ba cab be tu' yuj k'anlen yabej baytet beal ok yi'. Ok beyc'ulnej yetok is julbal, ok yak'on is k'anlebal bay is diosal, cax ok sayon yil is tx'ix junok no no'.*fn* 22A bay is watx' k'ab, a tu' ok elol julbalej chi tx'oxon bay yetc'ulal Jerusalén. Ok al-lay bay: Ocokab owal yin Jerusalén. Al-layokabi tol chi mak'lay cam eb anima bay tu'. Elokab aw yet owal. Watx'jokokab oc mak'bal poj puerta. Watx'jokokab aj walubej bay yinlak conob tu', cax chi oc oyan eb soldado yinlak masanil, ẍi. 23Palta a pax eb anima bay Jerusalén xin, ok na eb tol a jun k'anej chi al-lay ti' man ok ujok, yuj juntzan trato mayal yak' eb. Palta a Nabucodonosor ok natek is tenomtakil eb bay, xan ok ilaytok eb preso yuj. 24Yuj tu' xan ayin wal caw Jehová Yajaw in chi wala': A wal e yobtakilal, c'al e tenomtakil caw wal txequel yayji. A masanil e mul, c'al e yob beybalil jakan wal yayji, yuj wal tu' xan ok ex mitx'layok. 25A wal ach ti' ach reyal Israel, yobtakwom ach, yajbil ach elok, cawilxa chi jayoc tiempoal yin a chaon lajub yailal. 26Ayin Jehová Yajaw in chi wala': Ok ilay el is k'oxil cham sat sacerdote, cax ok ilay c'apax el is corona jun rey. Masanilxac'al ok q'uexlayok. A eb yaynakil, ok ilay aj can, axa eb mimek winak ok ilay ayok. 27Coc'axokabtok. Ayin caw ok wuchtok is yikbej. Manxa ok yi' yip axca ta yayji, masantac'al ok jayoc jun mac ay yalon yet yin, a bay jun tu' ok wak' ikbej.
Yailal yiban eb amonita
28Ach anima, ala': Axca ti' yalon Jehová Cham Yajaw yin eb amonita, a ton eb chi buchon in conob. Ilek wal ch'en espada lanan jayocok, watx'xa yayji yet chi mak'wi cam anima, jopopixac'al yili, toxac'al chi jopnaj axca rayo yet chi yak'on lajwok. 29A tzet max yil eb naom el k'anej, c'al juntzan k'anej max al-lay e yin, man yelok. Ok low ch'en espada yin is nuk' eb yobtakwom. Mayal jayoc c'ual lajub yailal eb.
30Aek aytok e yespada yul tz'umal. Ok ach in beyc'ulnej bay a tx'otx'al bay max ach alji. 31Axca wal junok bolob, caywal tu' ok wut wion el yowal in c'ul e yin; ok ex waoc yul k'ab eb anima yob is nabal, c'al jelan yin yak'on lajwok. 32Tol ok ex lajwok, ok ex tz'aayok; tol ok pulcantok e chiq'uil bay masanil yul e tx'otx'al. Ayin wal caw Jehová in chi wala' tol c'am mactxel okto ex naontek, ẍi Cham.
Currently Selected:
Ez 21: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
